Łatuška: Łukašenka asabista zahadaŭ mnie skaracić Śpis pomnikaŭ udvaja, bo jany «zaminajuć inviestaram»
Były ministr kultury raspavioŭ «Našaj Nivie», što centralizavanaja kampanija pa źniščeńni histaryčnaj spadčyny pačałasia nie siońnia. Jašče 15 hadoŭ tamu Łukašenka prama patrabavaŭ vyklučyć sa Śpisu kaštoŭnaściej tysiačy abjektaŭ, kab jany nie pieraškadžali zabudoŭščykam.
Ciapierašniaja ŭradavaja kampanija pa začystcy Dziaržaŭnaha śpisa pomnikaŭ — nie spantannaje rašeńnie, a praciah šmathadovaj dziaržaŭnaj palityki. Jak raspavioŭ «Našaj Nivie» były ministr kultury (2009—2012) i ciapierašni kiraŭnik Narodnaha antykryzisnaha ŭpraŭleńnia Pavieł Łatuška, pramy zahad skaracić kolkaść abjektaŭ pad achovaj jon asabista atrymlivaŭ ad Alaksandra Łukašenki.
Pa słovach Łatuški, heta adbyłosia padčas adkryćcia mastackaj halerei Michaiła Savickaha ŭ Minsku, u adrestaŭravanym histaryčnym budynku haradskoj siadziby Pšaździeckich na płoščy Svabody.
«Łukašenka stajaŭ, hladzieŭ na hety budynak i, źviartajučysia da tahačasnaha mera Minska Ładućki, skazaŭ: «Zašmat u nas pomnikaŭ u krainie, mnie skardziacca inviestary, treba ich źmienšyć». U toj čas u nas było krychu bolš za 5000 pomnikaŭ. Na što ja adkazaŭ: «A ŭ Litvie 15 tysiač». Łukašenka zajaviŭ, što heta zaminaje inviestycyjnym prajektam: «Vyrašycie hetuju prablemu, skaracić treba ŭdvaja».
Łatuška ŭspaminaje, što adrazu skazaŭ tahačasnamu vice-premjeru Anatolu Toziku, jaki stajaŭ pobač: «Nikoli hetaha nie padpišu». Pa słovach palityka, jon by zvolniŭsia, kali b ad jaho patrabavali heta zrabić.
Były ministr taksama pryhadvaje, što jaho pazicyja pa abaronie spadčyny časta pryvodziła da pramych kanfliktaŭ z kiraŭnictvam krainy.
«Pieršaja minskaja elektrastancyja, dzie paźniej pabudavali hatel «Kiempinski». Heta asobnaja historyja maich kanfliktnych razmoŭ z Łukašenkam i premjeram Sidorskim. Heta toje, što mnie balić dahetul, i toje, u čym ja liču, što ździejśniŭ pamyłku. Ja nie zavizavaŭ rašeńnie pra znos elektrastancyi i nikoli b hetaha nie zrabiŭ, ale biurakratyja mianie pierajhrała», — kaža Łatuška.
Toje, što siońnia adbyvajecca z historyka-kulturnaj spadčynaj, były čynoŭnik nazyvaje «antydziaržaŭnaj i antynacyjanalnaj palitykaj».
Pavodle jaho ŭspaminaŭ, cisk na čynoŭnikaŭ, jakija sprabavali błakavać znos pomnikaŭ, časam pierachodziŭ u adkrytyja pahrozy. Pra pahrozy raspravy jamu ŭ bytnaść ministram paviedamlaŭ načalnik upraŭleńnia achovy historyka-kulturnaj spadčyny Ministerstva kultury Biełarusi.
«Jon mnie raskazaŭ historyju pra toje, što jon zabłakavaŭ znos pomnika historyka-kulturnaj spadčyny. A ŭ adkaz jamu pryjšła pahroza, što zabjuć jaho dačku.
Ja byŭ u šoku. Heta Biełaruś, 2011 hod. Na što skazaŭ jamu: «Davajcie tak, damovimsia na budučyniu. Kali kali-niebudź chto-niebudź vam budzie pahražać u suviazi z tym, što vy błakujecie znos pomnikaŭ, kažycie, što heta asabistaje rašeńnie ministra kultury Łatuški. Chaču pahladzieć, chto advažycca zabić ministra kultury Biełarusi», — padzialiŭsia Łatuška.
«Naša Niva» — bastyjon biełaruščyny
PADTRYMAĆCiapier čytajuć
U harach Kyrhyzstana z drona adšukali cieły źnikłych biełaruskich alpinistaŭ7
Kamientary
Po krajniej mierie do miełkich pakostiej nie opuskałsia i nie opuskajetsia. Da, byvał zanosčiv.