Fiłaret staŭ hanarovym hramadzianinam Minskaj vobłaści

Rašeńniem Minskaha abłasnoha Savieta deputataŭ zvańnie hanarovaha hramadzianina Minskaj vobłaści prysvojena Mitrapalitu Minskamu i Słuckamu Fiłaretu, Patryjaršamu Ekzarchu ŭsiaje Biełarusi, pasłu Biełarusi ŭ Litvie i Finlandyi pa sumiaščalnictvu Uładzimiru Dražynu, narodnamu artystu Biełarusi, mastackamu kiraŭniku i hałoŭnamu dyryžoru Nacyjanalnaha akademičnaha narodnaha arkiestra Biełarusi imia I.Žynoviča Michaiłu Kazincu. Siońnia ŭ Pałacy kultury Maładziečna adbyŭsia ŭračysty schod, pryśviečany 75-hodździu ŭtvareńnia Minskaj vobłaści.

Zvańnia «Hanarovy hramadzianin Minskaj vobłaści» ŭdastojeny ludzi, jakija ŭnieśli istotny ŭkład u raźvićcio staličnaha rehijonu i ŭsioj respubliki — dziaržaŭnyja dziejačy, pradstaŭniki industryi, tyja, chto rušyć napierad navuku, mastactva i kulturu, zadaje duchoŭnyja i hramadzianskija aryjenciry sučasnaści.

Mitrapalit Fiłaret u videazvarocie da prysutnych na ŭračystym schodzie vykazaŭ upeŭnienaść, što dabrabyt žycharoŭ Minskaj vobłaści z kožnym hodam budzie ŭzrastać. «Adnak u baraćbie za ekanamičnyja i kulturnyja pakazčyki my nie pavinny zabyvać ab duchoŭnym baku našaha žyćcia. Spadziajusia, što supracoŭnictva carkvy i kiraŭnictva Minskaj vobłaści znojdzie svoj praciah u sumiesnych sacyjalnych mierapryjemstvach — u śfiery maralnaha i patryjatyčnaha vychavańnia moładzi, u akcyjach u padtrymku siamji», — skazaŭ jon.

Uładzimir Dražyn šmat času addaŭ raźvićciu staličnaha rehijonu, kuryravaŭ sacyjalnyja pytańni va ŭradzie, ciapier unosić značny ŭkład u stvareńnie stanoŭčaha imidžu Biełarusi na dypłamatyčnaj nivie. Jon vykazaŭ udziačnaść za prysvajeńnie zvańnia i skazaŭ: «Rabota ŭ staličnym rehijonie dała mahčymaść mnie atrymać važki vopyt u sistemie dziaržaŭnaha kiravańnia. Vinšuju Minščynu ź jubilejem i žadaju pradaŭžeńnia raźvićcia jaje patencyjału — kadravaha, pramysłovaha, ahrarnaha, sacyjalnaj śfiery».

Michaił Kaziniec na cyrymonii prysvajeńnia zvańnia padkreśliŭ: «75 hadoŭ — heta ništo dla historyi, ale za hety čas Minskaja vobłaść dasiahnuła niebyvałych vyšyń va ŭsich śfierach dziejnaści. Važna zaŭsiody zastavacca patryjotam svajoj krainy i małoj radzimy. Ja i dalej budu rabić usio, što ad mianie zaležyć dla raźvićcia nacyjanalnaj kultury».

15 studzienia 1938 hoda pieršaja siesija Viarchoŭnaha Savieta SSSR pryniała pastanovu ab źmianieńni i dapaŭnieńni artykułaŭ Kanstytucyi SSSR «Ab uviadzienni ŭ BSSR abłasnoha administracyjnaha padziełu», zhodna ź jakim była ŭtvorana Minskaja vobłaść.-

• 0
• 0
• 0
• 0
• 0
• 0
• 0
• 0