Maładafrontaŭcy Kiryła Mackievič i Uładzimier Siarhiejeŭ asudžanyja na 10 i 15 sutak aryštu. 20 lipienia, u dzień narodzinaŭ Źmitra Daškieviča, u Miensku, na moście cieraź Niamihu, jany vyviesili vinšavalnuju raściažku.
Administracyjnuju spravu («drobnaje chulihanstva»), u adroźnieńni ad minułych palityčnych pracesaŭ u sudzie Centralnaha rajonu stalicy, razhladała nie Taćciana Paŭlučuk, jakaja niadaŭna aryštoŭvała moładzievych aktyvistaŭ za akcyju suprać admieny ilhotaŭ i adpraŭlała na Akreścina pastara Antosia Bokuna za niesankcyjanavanaje nabaženstva, a Natalla Paŭlučkova.
Chłopcaŭ dastavili u sud tolki a 13‑j. Paśla troch dzion, praviedzienych u specpryjomniku na Akreścina, maładafrontaŭcaŭ usiu ranicu trymali ŭ rajadździele. Sami sudovyja pracesy raspačalisia pa abiedzie. Śviedkami ŭ sudzie, jak zvyčajna, vystupali milicyjanty, jakija zatrymlivali Kiryłu j Uładzia.
Supracoŭnik DAI Turkin Siarhiej Fieliksavič nastolki ŭvajšoŭ u žanr, što zajaviŭ navat, što maleńki 18‑hadovy Kiryła padčas zatrymańnia pačaŭ kidacca na milicyjanta i raździrać jahonuju vopratku. Sudździa paličyła hetyja dokazy pierakanaŭčyja, i paśla nievialikaha pierapynku vyniesła maładafrontaŭcam maksimalnyja prysudy.
Kamientary