Kolki ŭ Biełarusi vajskoŭcaŭ majuć takoje zvańnie, ci šmat jany zarablajuć i jak im žyviecca?
Alaksandar Łukašenka da 23 lutaha razdavaŭ hieneralskija pahony. Na piać hienerałaŭ u Biełarusi stała bolš. Kolki ŭ Biełarusi hienerałaŭ, ci šmat jany zarablajuć i jak im žyviecca?
Siarod piaci novych hienerałaŭ — načalnik mienskaj milicyi Alaksandar Barsukoŭ, jakoha Eŭraźviaz uklučyŭ u śpis nieŭjaznych u Eŭropu za datyčnaść da represijaŭ suproć apazycyi.Namieśnik staršyni zarehistravanaha ŭ Čechii «Maładoha frontu» Mikałaj Dziemidzienka nie sumniavajecca, što Barsukoŭ staŭ hienerałam dziakujučy svajoj asabistaj addanaści Alaksandru Łukašenku:
«U hetaj dziaržavie hienerała dajuć chutčej za asabistyja jakaści, čałaviečyja jakaści. Voś Barsukoŭ — vielmi žorstki čałaviek. Jon žorstki da tych, chto niazhodny z palitykaj Łukašenki. Ja sutykaŭsia z Barsukovym u sytuacyjach, kali jon staviŭsia nienaležnym, jak mnie padajecca, čynam da tych, chto za jaho značna starejšy. Da tych ža babulek, jakija prychodziać na apazycyjnyja akcyi. Heta było vielmi nieadekvatna».
Prafesijanały miž tym pierakananyja, što stać hienerałam milicyi biaz peŭnych prafesijnych dadzienych niemahčyma.Były staršynia Viarchoŭnaha Savietu, hienerał-lejtenant milicyi ŭ adstaŭcy Miečysłaŭ Hryb pieraličyŭ hieneralskija pasady: kiraŭniki abłasnych i Mienskaj upravaŭ milicyi, ministar i jahonyja namieśniki, kiraŭnik Akademii milicyi i kamandujučy ŭnutranymi vojskami. Takim čynam, atrymlivajecca kala 10 dziejnych hienerałaŭ, a kolki adstaŭnikoŭ — spadar Hryb padličyć nie biarecca. Jon dakładna viedaje, što da hienerał-pałkoŭnika nie dasłužyŭsia nichto, a hienerał-lejtenantaŭ milicyi ŭ adstaŭcy — ažno 7 čałaviek. Heta jon, Savičaŭ dy byłyja ministry, siarod ich Kulašoŭ, Navumaŭ, Jahoraŭ.
U najnoŭšaj historyi biełaruskaj milicyi byŭ adzin hienerał, jakoha pazbavili hieneralskaha zvańnia — Jury Zacharanka, jakoha Alaksandar Łukašenka źniaŭ z pasady ministra ŭnutranych spraŭ u 1995 hodzie.Zacharanka sprabavaŭ asprečyć ukaz Łukašenki, i choć heta nie atrymałasia, da traŭnia 1999 hodu, kali jaho vykrali nieviadomyja, praciahvaŭ ličyć siabie hienerałam.
Kolki zarablajuć biełaruskija hienerały milicyi? U presavaj słužbie MUS ličbaŭ nie nazyvajuć, ale kažuć, što zarobki nia tyja, jakimi možna hanarycca. Miečysłaŭ Hryb aryjentujecca na svaju pensiju — 4,5 miljona rubloŭ. Pavodle jaho, heta kala 45% ad zarobku dziejnaha hienerała.
Ci jość u milicejskaha hienerała ŭ adstaŭcy niejkija pryvilei? Miečysłaŭ Hryb śmiajecca i kaža, što lecišča hienerałam nie dajuć, jak i biaspłatnaha prajezdu na transparcie. Lačycca možna ŭ špitali MUS, a voś z sanatornym lačeńniem — bolš składana. «Napisaŭ zajavu na pucioŭku, ale pakul nie padpisali», — kaža hienerał-lejtenant u adstaŭcy Miečysłaŭ Hryb.
A što nakont hieneralskaj formy? Ci možna za košt dziaržavy adnavić staruju formu?
«Kali forma sastareła, to ja mahu pašyć novuju, ale tolki za svoj košt. Viadoma, kamu ž ja patrebny na pensii, kab mnie šyli biaspłatna? Ale kali ščyra, to raniej nia vielmi i nasili milicejskuju formu ŭ adstaŭcy, bo nieprestyžna. I ciapier zbolšaha hetak zastałosia.Ja apošni raz nadziavaŭ hieneralskuju formu ŭ hodzie 93-m ci 94-m. Nie nadziaju i ŭžo nie chaču. Ja ŭžo nia ŭ tym vieku, kab forma mianie ŭpryhožvała, i ŭ samoha nia taja vypraŭka. A našto ździekavacca z formy? Nie chaču i nia baču ŭ hetym nijakaj patreby», — kaža Hryb.
Były ministar abarony, hienerał-pałkoŭnik u adstaŭcy Pavał Kazłoŭski kaža, što ŭ siaredzinie 1990-ch hadoŭ u biełaruskim vojsku było kala 50 hieneralskich pasadaŭ. Z taho času adbyvalisia skaračeńni, i Pavał Kazłoŭski nie vyklučaje, što dziejnych hienerałaŭ stała mieniej, ale nie našmat.
Pra hieneralskija pryvilei Pavał Kazłoŭski skazaŭ toje ž, što i Miečysłaŭ Hryb: što było tych pryvilejaŭ mała, a ciapier i tyja ŭsie skončylisia. «Raniej hienerałam davali kvitok u vahonie z pavyšanaj kamfortnaściu, a ciapier za svaje hrošy i jedź u miakkim choć kudy, ale chto ž pajedzie?» — kaža Pavał Kazłoŭski.
Pavodle Paŭła Kazłoŭskaha, kamandzir bataljonu, a heta pałkoŭnickaja pasada, — 6 miljonaŭ rubloŭ, albo kala 700 dalaraŭ. Načalnik upravy ŭ Ministerstvie abarony, jak i kamandujučy bryhadaj — pasada hienerał-majora — heta kala 9 miljonaŭ, ci 1100 dalaraŭ. Šmat heta ci nie? Pavodle Paŭła Kazłoŭskaha, dla hienerała heta vielmi mała, i niezdarma achvotnych dasłužycca da hienerała siarod biełaruskich vajskoŭcaŭ niašmat:
«Čamu sa słužby šmat chto zvalniajecca? Mahčyma, z toj pryčyny, što dumajuć: ci varta stanavicca kamandziram bryhady, hienerał-majoram? Prykładam, staŭ jon padpałkoŭnikam, začapiŭsia dzie ŭ Bieraści, kvatera ŭžo jość, haraž jość, a moža ŭžo i kavałak ziamli atrymaŭ, pačaŭ što tam budavać, — i jon nia choča słužyć dalej. Jon nia choča być hienerałam — jon prosta choča ŭ Bieraści dasłužyć. Dy pajści chutčej na pensiju, kab jašče znajści pracu, pakul małady. Takija nastroi ŭ vojsku — heta žachlivaje stanovišča, kali ludzi nie imknucca zrabić vajskovuju karjeru».
Naziralniki adznačajuć, što adna ź jaŭnych pieravah vysokaha stanovišča ŭ vojsku, milicyi ci inšaj siłavoj struktury — mahčymaść praz paraŭnalna tanny kredyt pabudavać kvateru, pryčym pažadana ŭ prestyžnym miescy.U Miensku ŭ suviazi z takimi budoŭlami rehularna ŭźnikajuć kanflikty sa zvyčajnymi mienčukami, bo novyja damy ŭščylniajuć zabudovu.
Niekatoryja vysokapastaŭlenyja milicyjanty znachodziać mahčymaść budavać nia tolki kvatery, ale i katedžy. Były ministar unutranych spraŭ Uładzimier Navumaŭ u kancy 2010-ch hadoŭ pryznavaŭsia žurnalistam, što buduje katedž u prestyžnym pasiołku kala Drazdoŭ, uziaŭšy ŭ kredyt 75 tysiač dalaraŭ. Ź jakich zarobkaŭ hienerał Navumaŭ źbiraŭsia viartać hety kredyt, jon nie ŭdakładniaŭ.
U kancy 2008 hodu niekalki vysokapastaŭlenych milicyjantaŭ, u tym liku hienerałaŭ, stracili svaje pasady z-za taho, što pasprabavali pabudavać katedžy ŭ pryrodaachoŭnaj zonie kala Mienskaha mora.
Ciapier čytajuć
Na Dzień Voli i dzień inaŭhuracyi Łukašenki ŭ Biełarusi abmiažujuć internet8
Kamientary