… Ale vusny nia chočuć kazać "Hud baj, Raša!"
Takim čynam, "Hazprom" vycisnuŭ ź Miensku pieršuju tranšu. Toj vypadak, kali pahroza macniejšaja za vykanańnie. Piša ŭ svaim błohu Alaksandar Kłaskoŭski.
"Hazprom" vycisnuŭ ź Miensku pieršuju tranšu płaty za spažytaje "błakitnaje paliva". Toj vypadak, kali pahroza macniejšaja za vykanańnie.
Ale ŭ adkaz i Maskva atrymała pahrozu. Učora Łukašenka skazaŭ, što treba vychodzić na "bolej realistyčnyja stasunki" z Rasiejaj. A mienavita: "My paprosim Rasieju taksama za ŭsio zapłacić, što my dziela jaje robim". Heta čarhovaje ahučvańnie staroj idei "sustrečnaha pazovu". Ale čym dalej, tym ciažej hrać na tranzycie dy vajskovym čyńniku. Rasieja buduje truby ŭ abychod, dyj RŁS taksama, tak što jak-niebudź abydziecca.
Budzie doŭžycca ŭzajemnaja demanstracyja bajavych stojek. Łukašenka nahadaŭ, što rasiejcy dyskryminujuć nas u handlovaj sfery. Maŭlaŭ, "dziaŭbuć" za kandytarskija vyraby, za cukar, aryštoŭvajuć mašyny na miažy. Moža spraŭdzicca prahnoz datyčna zaklučanaha ŭviesnu pahadnieńnia ab handli: biełaruski bok stanie jaho sabatavać pad markaj adkazu na rasiejski "biespriedieł".
Dy i ŭ hazavym pytańni kropki nad "i" nie rasstaŭlenyja. Kali Rasieja nia daść kredyt (ci vyłučyć zanadta suvoryja ŭmovy), zastaniecca padstava zakidać, što Pucin nie strymaŭ słova. Tamu, maŭlaŭ, i ŭ nas ruki raźviazanyja.
Karaciej, budzie naziracca hetkaja viazkaja pazycyjnaja vajna, skiravanaja na maksymalnaje raściahvańnie płaty pa rasiejskich rachunkach. Miensk moža damahčysia drobnych pasłableńniaŭ, ale ŭ stratehičnym planie siły nadta niaroŭnyja. I kali "złoha" Pucina jašče možna procipastaŭlać "dobramu" Jelcynu, bo ciapierašni haspadar Kramla sapraŭdy jość kreaturaj pieršaha prezydenta Rasiei, to luby nastupny ŭžo nia budzie padpadać pad hetuju pijaraŭskuju antytezu. Z novym kramloŭskim lideram damaŭlacca budzie jašče horaj.
Kaniešnie, kali b voŭk u lesie zdoch i było raptam skazana: usio, hodzie, vykonvajem 12 umoŭ Eŭraźviazu i — hud baj, Raša! — naš siužet nabyŭ by zusim inšy źmiest. Ale, jak zaznačaje ekspert Leanid Złotnikaŭ, dla kiraŭnika Biełarusi "najaŭnyja alternatyvy nieprymalnyja palityčna i mała prymalnyja ekanamična". Tamu i nadalej daviadziecca čuć vysnovy-asiumarany pra niečuvany "biespriedieł" z boku bratniaj Rasiei.
Kamientary