Francuzskija fieministki aburanyja kamientaryjami Bryžyt Makron ab aktyvistkach
Pieršaja łedzi Francyi trapiła ŭ skandał.
Francuzskija znakamitaści i fieministki vykazali abureńnie z nahody słoŭ pieršaj łedzi Bryžyt Makron ab pratestujučych aktyvistkach na šou komika, paviedamlaje Bi-bi-si.
Aktyvistki ŭ maskach z tvaram Ary Abitana pierapynili jaho stendap-šou ŭ subotu, vykrykvajučy «Abitan — hvałtaŭnik». Abitana abvinavacili ŭ zhvałtavańni ŭ 2021 hodzie, ale śledčyja paźniej zakryli spravu, spasłaŭšysia na niedachop dokazaŭ.
Spadarynia Makron sustrełasia z Abitanam pierad jaho vystupam u niadzielu. Na videa jon kaža, što adčuvaje siabie «spałochanym», na što Makron adkazvaje: «Kali buduć niejkija tupyja s*čki, my ich vyhanim», — paśla čaho ŭśmichajecca i śmiajecca.
Pradstaŭniki Makron zajavili AFP, što jaje słovy byli nakiravany na krytyku «radykalnych mietadaŭ» pratestu.
«Bryžyt Makron nie ŭchvalaje hetyja radykalnyja mietady», — dadaŭ člen jaje kamandy.
Słovy pieršaj łedzi — «sales connes» (što pierakładajecca jak «tupyja s*čki») — byli padchopleny znakamitaściami i fieministkami ŭ internecie, jakija asudzili jaje dziejańni i hvałt u dačynieńni da žančyn.
Demanstracyju arhanizavała Nous Toutes — francuzskaja arhanizacyja, jakaja zmahajecca suprać hvałtu nad žančynami.
Bolšaść tych, chto vykarystoŭvaje chešteh #salesconnes u sacsietkach, robiać heta, kab vykazać padtrymku fieminisckaj supolnaści.
Aktrysa Žudzit Hadre — jakaja abvinavačvała režysiora ŭ zhvałtavańni, jakoje jon admaŭlaje — taksama dałučyłasia da kampanii.
«Ja taksama tupaja s*čka», — napisała jana ŭ sacsietkach, a bielhijskaja kamiedyjantka Fłarens Miendes zajaviła, što hanarycca być adnoj ź ich.
Aktrysa i śpiavačka Nadziež Baŭson-Dźjan taksama pryniała hety termin, napisaŭšy ŭ instahramie: «Ja taksama tupaja s*čka letam, zimoj, viasnoj i vosieńniu».
Jana nazvała «advažnaj» žančynu, jakaja abvinavaciła Abitana ŭ zhvałtavańni, i vykazała padtrymku hrupie Nous Toutes, dadaŭšy, što arhanizacyja stanie «macniejšaj, kab razam zmahacca suprać seksualnaha hvałtu».
Aktrysa Rašyda Brakni taksama padziakavała «s*čkam» i adznačyła Nous Toutes u svaim paście.
Tym časam stendap-kamiedyjantka Maryn Leanardy napisała ŭ instahramie: «Fieministki nikoli nie byvajuć tupymi s*čkami».
Bryžyt Makron naviedvała šou Abitana razam z dačkoj.
Kamientary