Razvaluchu kala Drazdoŭ pradajuć za 750 tysiač dalaraŭ: cana ziamli ŭ rajonie Carskaha Siała dasiahnuła $50 tysiač za sotku
Vulica Viaśninka — byłaja vioska — mieścicca praz pole ad Drazdoŭ. Joj, viadoma, daloka da blasku i dahledžanaści «Carskaha siała». Tratuary ŭ Viaśnincy niačyščanyja, darohi raźbityja, tut i tam bačacca zakinutyja, a to i napaŭrazburanyja chaty.
Ale niachaj vas nie ŭvodzić u zman nieprezientabielny vyhlad. Ziamla tut kaštuje sotni tysiač dalaraŭ.
Voś, naprykład, zvyčajny draŭlany damok z cahlanaj prybudovaj pa adrasie Viaśninka, 9. Učastak płoščaj 15 sotak, na jakim staić chata, pradajecca za $750 tysiač. Haz i vada da ŭčastka nie padviedzienyja, ale adpaviednyja kamunikacyi pobač jość.
Dom №29 pa toj samaj vulicy vyhladaje pryvabniej, na ŭčastak płoščaj 12,5 sotki padviedzieny haz. Haspadar pradaje žytło pad znos. Cana — $520 tysiač.
Ryełtary tłumačać darahaviznu ziamli na Viaśnincy susiedstvam Drazdoŭ, dzie atrymali damy ŭsie vysokija čynoŭniki i blizkija da ŭłady biznesoŭcy, spartoŭcy i daktary.Tam sotki kaštujuć jašče daražej. Hetaje miesca — łasy kavałak. Zusim pobač Drazdy, handlova-zabaŭlalnyja centry, Zasłaŭskaje vadaschovišča. Akramia taho, zručnaje transpartnaje złučeńnie z centram horada.
Siarod pachilenych chałupaŭ na Viaśnincy ŭžo paŭstaŭ dobry dziasiatak darahich katedžaŭ. Niekatoryja ź ich pakul chavajucca za kronami starych sadoŭ i viaskovych chat. Ale vyhladaje, što heta časovyja niazručnaści dla novych žycharoŭ vulicy.
Siamion Piečanko
Pavodle Kamiteta architektury i horadabudaŭnictva Minharvykankama, terytoryja žyłoj siadzibnaj zabudovy ŭ miežach vuł. Viaśninka — zav. Viaśninka — pr. Pieramožcaŭ budzie zabudavanaja pad žytło i abjekty hramadskaha pryznačeńnia.
Uzdoŭž praśpiekta Pieramožcaŭ zachavajecca parkavaja zona. Staryja siadziby Viaśninki nie padlahajuć znosu.
U pačatku maja musić być skončanaja 1-ja čarha kompleksnaj rekanstrukcyi kvartałaŭ siadzibnaj zabudovy.
* * *
«Ctalinka» nasuprać rezidencyi kaštuje $2,1 miljona
Rejtynh samych darahich kvater u kožnaj z abłaściej krainy.
Nieruchomaść u Biełarusi daražeje ŭśled za rostam zarobkaŭ. Siaredniaja cana kvadratnaha mietra ŭ stalicy voś-voś pieraadoleje simvaličnuju miažu ŭ $1500. Realnaja cana ŭhodaŭ nižejšaja na $30—60, adnak raście i jana.
Pavodle źviestak Nacyjanalnaha kadastravaha ahienctva, pa vynikach 2012 košt kvadratnaha mietra kvater u Minsku skłaŭ u siarednim $1372. Pa hetym pakazčyku stalica apiaredžvaje inšyja harady krainy ledź nie ŭdvaja.
Samaja darahaja staličnaja kvatera — dvuchuzroŭnievy cahlany asabniak ahulnaj płoščaj 300 m2, jaki ŭtvaryŭsia šlacham abjadnańnia dźviuch «stalinak» na Vajskovym zavułku.Heta rajon płoščy Pieramohi, naŭprost nasuprać rekordna darahoj kvatery znachodzicca haściavaja rezidencyja Alaksandra Łukašenki. Achvotnych vykłaści dva miljony dalaraŭ nie bačna, tamu ŭłaśniki patrochu skidajuć canu.
Zrešty, u Minsku niama prablem z prapanovaj novabudoŭlaŭ. Siaredniaja cana kvadratnaha mietra ŭ ich składaje $1400, ale možna adšukać jak «elitnyja», tak i paraŭnalna niedarahija prapanovy (kala $1200).
Biudžetnyja novabudoŭli ŭ stalicy mohuć kankuravać z kamiercyjnym žyllom u rehijonach. Zabudoŭščyki ŭ abłasnych centrach prosiać kala $1000 za kvadratny mietr. Dziaržaŭnyja budtresty tym časam budujuć panelnyja damy dla čarhavikoŭ pa $600—650. Heta tańniej za siarednija ceny ŭ haradach.
Siarod astatnich haradoŭ Biełarusi nieruchomaść daražejšaja na zachadzie krainy, u Breście i Hrodnie, — pa $796 za m2, adnak kolkaść pradadzienych kvater u horadzie na Niomanie bolšaja. Darečy, samaja darahaja kvatera ŭ Hrodnie kaštuje $280 tysiač.Heta trochpakajoŭka płoščaj 140 m2, pabudavanaja piać hadoŭ tamu ŭ rajonie aŭtavakzała i Skidzielskaha rynku. Vysokaja cana dasiahajecca za košt unutranaha azdableńnia — dva sanvuzły, džakuzi, mebla, ubudavanyja šafy…
Brescki rekardsmien, čatyroch-pakajoŭka takoj samaj płoščy, pradajecca za $225 tysiač. Skuranaja mebla, dubovy parkiet, padłoha z padahrevam… Kvatera znachodzicca na ŭjeździe ŭ horad z boku Minska, kala Muchaŭca.
Salihorsk, horad z samym vysokim siarednim zarobkam, abahnaŭ try abłasnyja centry.U horadzie «Biełaruśkalija» kvatery pradavalisia pa $773 za m2. I heta ŭnikalny vypadak dla Biełarusi — siaredni miesiačny zarobak ($740 u śniežni ŭ rajonie) pryblizna roŭny koštu kvadratnaha mietra. Da takoj raŭnavahi imknucca ŭ zachodnich krainach. A voś samaja darahaja kvatera ŭ Salihorsku kaštavała nie bolš za $90 tysiač.
Kvatery ŭ Viciebsku i Homieli iduć prykładna ŭ adnoj vahavaj katehoryi ($740 i $728 za mietr adpaviedna).Voś tolki ŭ paŭdniovym horadzie cana za trochpakajoŭku z ružovym sanvuzłom na praśpiekcie Lenina składaje $225 tysiač, a ŭ paŭnočnym samaja darahaja kvatera kaštuje ŭsiaho $125 tysiač. Praŭda, trochpakajoŭka na Haharyna pradajecca biez azdableńnia — hołyja ścieny.
Narešcie, u Mahilovie siaredniaja cana kvadratnaha mietra zafiksavana na adznacy $691.Horad nienašmat adarvaŭsia ad bujnych rajcentraŭ. Samaja darahaja kvatera ŭ im kaštuje $200 tysiač. Heta piacipakajoŭka na Leninskaj ahulnaj płoščaj 200 kvadratnych mietraŭ.
Jahor Marcinovič
* * *
Samyja darahija harady Biełarusi
pa košcie nieruchomaści na druhasnym rynku (za 2012 hod), cana ŭ dalarach za kv. mietr
1. Minsk 1372
2. Hrodna 796
3. Brest 796
4. Salihorsk 773
5. Viciebsk 740
6. Homiel 728
7. Mahiloŭ 691
8. Maładziečna 678
9. Žodzina 674
10. Lida 618
11. Navapołack 601
12. Baranavičy 585
13. Barysaŭ 584
14. Žłobin 565
15. Połack 565
16. Pinsk 557
17. Biaroza 538
18. Słuck 536
19. Mazyr 528
20. Vaŭkavysk 523
***
Pustyja ŭčastki pad Minskam pradajuć pa $70 tysiač
Jak dvuchpakajoŭku ŭ spalnym rajonie.
Ziamielnyja nadzieły pad Minskam zaŭsiody karystalisia popytam. Adnak ciapier cana bje ŭsie rekordy.
Ziamielny ŭčastak płoščaj 0,15 ha pasiarod Baraŭlanaŭ (niekalki kiłamietraŭ na poŭnač ad Minska) na adkrytym aŭkcyjonie kaštavaŭ… 600 miljonaŭ rubloŭ! Heta kala $70 tysiač.
Jak tłumačać u sielsaviecie, takaja vysokaja cana atrymałasia, bo da ŭčastka ŭžo praviedzienyja ŭsie kamunikacyi.«Moža, tam niejkaje admietnaje miesca?» — «Dy nie, prosta ŭčastak pasiarod vioski». Achvotnych zapłacić šalonyja hrošy pakul nie znajšłosia.
Ciapier za $70 tysiač pradajecca ŭčastak u Raŭbičach. Heta niepadaloku ad Baraŭlanaŭ. Tudy taksama praviedzienyja kamunikacyi.
Zvykłaja cana na aŭkcyjonie na pustyja ŭčastki ŭ susiednich prestyžnych vioskach utraja mienšaja. Ale pra elektryčnaść z hazam daviadziecca kłapacicca samomu.
Ciapier čytajuć
«Na 15 chvilin vyklučyli śviatło — boža moj, z Ukrainaj paraŭnali». Łukašenka patłumačyŭ, kolki ekanomić na vuličnym aśviatleńni22
Kamientary