Čamu Zachad nie budzie ŭmiešvacca ŭ siryjskuju vajnu, ale ŭrešcie ŭmiašajecca
2 hady vajny, 70 tysiač śmierciaŭ, bolš za miljon uciekačoŭ, ale śviet biezdapamožny. Piša Ryhor Astapienia.
Niekalki ŭstupnych zaŭvahaŭ. Pa-pieršaje, Zachad užo ŭdzielničaje ŭ vajnie ŭ Siryi. Jon pastaŭlaje zbroju i nie chavaje svajho namieru skončyć kiravańnie Bašara Asada. Pa-druhoje, pad paniaćciem umiašalnictva aŭtar u dadzienym tekście razumieje pieradusim intierviencyju vojskaŭ na terytoryju Siryi. Pa-treciaje, kažam «Zachad» — časta razumiejem ZŠA. Heta ad Złučanych Štataŭ zaležyć, ci pačnuć krainy Zachadu razam ź niekatorymi arabskimi krainami naziemnuju apieracyju ŭ Siryi.
Na minułym tydni Barak Abama abvieściŭ, što ŭžyćcie chimičnaj zbroi ŭ Siryi «mianiaje spravu». Dahetul krainy Zachadu nie chavali taho, što nie buduć ŭmiešvacca da taho momantu, pakul Asad nie vyprabuje zarynu na siryjskich pastaŭncach. Adnak siryjskija ŭłady parušyli ŭmoŭnaje parazumieńnie: niama ŭžyćcia hazu (Asad nie pierakročvaje «čyrvonuju liniju») — niama zachodnich vojskaŭ u Siryi. Haz užo jość — dzie Zachad?
Zachad užo atrymaŭ nie adzin urok ad arabskaha śvietu. Irak zastaŭsia miescam masavych zabojstvaŭ i paśla pačatku apieracyi Zachadu, livijskija fundamientalisty zabili ambasadara ZŠA, paśla taho, jak APAD (NATO) dapamahło paŭstancam zrynuć Kadafi.U Jehipcie taksama nie šmat čaho źmianiłasia: ci Mursi lepšy za Mubaraka? Tvar Arabskaj Viasny akazaŭsia nie nastolki pryjemnym, jak heta bačyłasia na pačatku. Zrynuŭšy Asada, demakratyi nie atrymaješ, i Zachad heta viedaje.
Siryjskija paŭstancy taksama pastaralisia zrabić usio, kab jak maha bolš zachodnich decision makers usprymali insurhientaŭ svaimi vorahami.
Dzialeńnie apazicyi (u biełaruskim styli) na 20 hrupaŭ pryviało da taho, što «niama kamu pazvanić, kab parazmaŭlać z paŭstancami». Da taho, častka insurhientaŭ mocna paviazanaja z Al-Kaidaj. Padtrymlivać džychad Zachad niejak nie vielmi choča.
Da taho dadajucca ŭnutranyja prablemy: litaralna nie staje hrošaŭ. Jeŭrasajuz naŭrad ci chutka vybiarecca z kryzisu, a vojny ŭ Iraku i Afhanistanie časta ŭsprymajucca, jak hałoŭnyja pryčyny ekanamičnych prablemaŭ ZŠA. (Varta dadać, što niahledziačy na mantru, što ZŠA pačali apieracyju ŭ Iraku tolki dziela ekanamičnych intaresaŭ — ZŠA našmat bolš zhubili.)
U ekanamičnym sensie vialikuju rolu moža adyhrać bahaty arabski śviet, jaki finansava i ideałahična (praz Al-Džaziru) padtrymlivaje siryjskich paŭstancaŭ. Kali b Liha arabskich dziaržavaŭ była hatovaja ŭziać hałoŭnuju adkaznaść za naziemnuju apieracyju, to i Zachad byŭ by bolš achvotny skončyć dni Asada.
I, mahčyma, pierastupić praz «vieta» Rasii i Kitaja ŭ Radzie biaśpieki AAN. Tut adnak možna čakać źmienaŭ. Rasija nie pradaje ŭ Siryju stolki zbroi, kab tak doŭha tryvać pavodziny Asada. Niazdolnaść militarna vyrašyć kanflikt ci znajści palityčny kampramis razdražniaje azijackich aŭtarytarnych partnioraŭ. Paśla ŭžyćcia chimičnaj zbroi padychod Kitaja i Rasii moh źmianicca. Siryjskija ŭłady hublajuć apošnich partnioraŭ.
Padsumoŭvajučy, varta skazać, što Zachad nie zmoža ŭvieś čas chavać hałavu ŭ piasok i budzie vymušany kaliści zareahavać.Siryjskaja vajna nie skončycca sama saboj, a kolkaść śmierciaŭ budzie pamnažacca — pakul Zachad nie voźmie spravu ŭ svaje ruki. Palitykam ES i ZŠA pryjdziecca z horyču ŭśviadomić, što kab spynić hetuju vajnu — pryjdziecca ŭziać u joj udzieł.
Śpievaka z «Marafonu adzinstva» asudzili za palityku — pryhadali kamientary 2020-ha. Baranić u sud jaho chadzili siostry Hruździevy16
Kamientary