Cichanoŭskaja: Biełaruskuju apazicyju chacieli b transfarmavać u rasijskuju

U dyskusii asnoŭnaj prahramy Miunchienskaj kanfierencyi ab biaśpiecy «Biełaruś — u centry ŭvahi» pryniali ŭdzieł lidarka biełaruskich demsił Śviatłana Cichanoŭskaja, ministr zamiežnych spraŭ Litvy Kiastucis Budrys i amierykanski sienatar Piter Uełč. Maderavała sustreču dyrektarka Centra ŭschodniejeŭrapiejskich i mižnarodnych daśledavańniaŭ Hviendalin Zase.

Pra «handal ludźmi» i sproby raskałoć demsiły

Śviatłana Cichanoŭskaja padkreśliła, što vyzvaleńnie častki palitviaźniaŭ — heta vynik cisku Zachadu, a nie humanizmu Alaksandra Łukašenki. Jana pieraścierahła zachodnich partnioraŭ ad usprymańnia hetych krokaŭ jak nahody dla źniaćcia sankcyj abo narmalizacyi adnosin.

«Važna padkreślić, što ŭsie hetyja vyzvaleńni byli b niemahčymyja biez mocnaj i pryncypovaj pazicyi Jeŭrapiejskaha sajuza. Kali Łukašenka vyzvalaje ludziej, to nie tamu, što jon raptam staŭ humannym, a tamu što ŭsia hetaja sankcyjnaja palityka, palityka izalacyi i niepryznańnia pracuje ŭ hety momant.

Humanitarny trek nie roŭny narmalizacyi situacyi, pryznańniu abo lehitymizacyi Łukašenki. My pavinny padzialać hetyja treki, tamu što pakul Łukašenka handluje ludźmi, u krainie niama nijakich źmien. Jon toj ža nielehitymny čałaviek, jaki zachapiŭ uładu, tamu jon praciahvaje represii ŭ krainie i čynić transnacyjanalnyja represii», — padkreśliła lidarka biełaruskich demsił.

Cichanoŭskaja taksama prakamientavała vyzvaleńnie znakavych lidaraŭ pratestu, takich jak Maryja Kaleśnikava i Viktar Babaryka. Na jaje dumku, ułady chacieli b vykarystać heta dla sproby ŭnieści razład u demakratyčnyja siły.

«My bačym hetyja naratyvy režymu: jak raskałoć nas, padzialić, transfarmavać nas u svajho rodu «rasijskuju apazicyju», dzie tak šmat hrup, jakija kankurujuć adna z adnoj. I maja zadača — zachavać adzinstva našych demakratyčnych sił. My pabudavali alternatyŭnyja instytuty ŭłady, jakija pracujuć davoli efiektyŭna, tamu my znachodzimsia ŭ pastajannaj kamunikacyi z usimi ludźmi, jakija byli vyzvalenyja […]. My robim heta, kab zachavać našy abjadnanyja naratyvy, choć, viadoma, taktyki mohuć być roznymi».

Litva: Biełaruś jak «zadni dvor dla haražnaha rasprodažu»

Ministr zamiežnych spraŭ Litvy Kiastucis Budrys zajaviŭ, što Vilnia nie maje iluzij nakont režymu Łukašenki. Jon adznačyŭ, što Biełaruś za apošnija hady straciła reštki suvierenitetu, staŭšy płacdarmam dla rasijskaj ahresii i raźmiaščeńnia jadziernaj zbroi.

Budrys rezka vykazaŭsia pra ideju dałučeńnia aficyjnaha Minska pa zaprašeńni ZŠA da «Rady miru».

«Heta była, ja b skazaŭ, niaŭdałaja prapanova. U nas jość lidar [Łukašenka], na jakoha my ŭ Litvie nakiravali [materyjały] ŭ Mižnarodny kryminalny sud za złačynstvy suprać pravoŭ čałavieka praz departacyju ludziej. My taksama nakiravali ich u Mižnarodny sud AAN za instrumientalizacyju mihracyi suprać nas. I bačyć jaho ŭ luboj arhanizacyi abo farmavańni, u naźvie jakoha jość słova «mir» — heta sapraŭdy ŭskładniaje našy mierkavańni nakont taho, kab taksama być častkaj hetaha […] Ja nie baču, što Biełaruś moža być aktaram abo niejkaj krainaj, jakaja maje tam prava hołasu. Ja baču Biełaruś jak zadni dvor dla haražnaha rasprodažu rasijan».

Pry hetym litoŭski ministr zapeŭniŭ, što jaho kraina praciahnie padymać temu Biełarusi na mižnarodnym uzroŭni, kab nie dapuścić narmalizacyi adnosin z dyktaturaj.

«Ja dumaju, my pavinny praciahvać toje, što my ŭžo robim. Finansavaja i palityčnaja padtrymka apazicyi, arhanizacyj — heta pieršaje. Pa-druhoje, my pavinny praciahvać našy namahańni, kab trymać hetaje pytańnie vysoka ŭ palityčnym paradku dnia. Heta niaprosta, kali vakoł adbyvajecca stolki ŭzrušeńniaŭ. […] I treciaje: my pavinny taksama pradstavić alternatyvu dla Biełarusi, jakuju my možam sumiesnymi namahańniami stvaryć dla biełaruskaha hramadstva».

Ofis u Varšavie i sustreča ź Zialenskim

Śviatłana Cichanoŭskaja prajaśniła situacyju ź pierajezdam častki svajoj kamandy ŭ Polšču. Jana adznačyła, što heta nie aznačaje zakryćcia pradstaŭnictva ŭ Litvie.

«Z punktu hledžańnia pracy Ofisa Śviatłany Cichanoŭskaj ničoha nie źmianiłasia, my prosta pašyryli našu prysutnaść u Varšavie. Naš ofis zastaŭsia ŭ Vilni — pałova majoj kamandy praciahvaje pracavać tam. Niekatoryja ludzi buduć rełakavanyja ŭ Varšavu, [tak jak] u Polščy značna bolš [biełaruskich] hramadzianskich hrup, miedyja i nam treba mieć bolš prysutnaści tam. Litva i Polšča — najbolš stratehična važnyja krainy dla Biełarusi, i mienavita tamu hetaja pastanova była pryniataja».

Lidarka demsił taksama prakamientavała svaju niadaŭniuju sustreču z prezidentam Ukrainy Uładzimiram Zialenskim, nazvaŭšy jaje važnym sihnałam.

«Sustreča i moj vizit u Kijeŭ, jaki budzie paśla jaje, — heta vyrazny sihnał Kijeva pra toje, jaki bok jon abraŭ. Što jon nie źbirajecca prabačać Łukašenku abo zabyvać jaho złačynstvy. Što jon vybiraje svabodnuju demakratyčnuju Biełaruś i vieryć u demakratyčnyja siły [Biełarusi]».

• 17
• 0
• 1
• 2
• 0
• 0
• 0
• 1