U 50 metrach ad miažy, u litoŭskaj vioscy Narviliški 25‑26 žniŭnia prajšoŭ mižnarodny muzyčny fiestyval «Budźma razam».
«Muzyka adčyniaje miežy». Pad takim łozunham 25‑26 žniŭnia na litoŭska‑biełaruskim uźmiežžy prajšoŭ mižnarodny muzyčny fiestyval «Budźma razam». Akramia čysta muzyčna‑zabaŭlalnaj, mierapryjemstva niesła i peŭnuju palityčnuju nahruzku.
Nie vypadkova mierapryjemstva prachodziła litaralna za 50 mietraŭ ad biełaruskaj miažy, u litoŭskaj vioscy Narviliški. Hałoŭnym sponsaram fiestyvala vystupiła Ministerstva zamiežnych spraŭ Litvy, a łozunh mierapryjemstva — «Muzyka adčyniaje miežy» — byŭ vidavočna nakiravany ŭ bok susiedniaj Biełarusi.
Zapłanavany fiestyval byŭ jak hrandyjoznaja fijesta — najvialikšy muzyčny prajekt u Prybałtycy. Ci atrymałasia ŭsio jak zadumana, i ci apraŭdała siabie zadumka fiestyvala jak krok litoŭcaŭ nasustrač biełarusam — pytańnie, ale arhanizatary staralisia. Kolkaść udzielnikaŭ, praŭda, vidavočna nie daciahnuła ani da zajaŭlenych 15, ani da 10 tysiač. Adnak jakaść muzyki i arhanizacyi mierapryjemstva ad hetaha zusim nie paciarpieła.
Biełaruskija hurty i ŭdzielniki na mierapryjemstvie vidavočna hublalisia siarod inšych, tamu ab «prabiełaruskaj» nakiravanaści fiestyvala možna było zdahadacca tolki pa asobnych zajavach niekatorych vykanaŭcaŭ (pieravažna litoŭskich). Adzinym jaskrava‑biełaruskim momantam staŭsia vystup hurta «Lapis Trubieckoj». Charyzmatyčny lidar hurta Siarhiej Michałok nia hrebavaŭ biełaruskaj movaj ŭ svaich zvarotach da hledačoŭ i ŭ pieśniach.
Padčas vystupu «Lapisaŭ» kala sceny sabralisia ci nia ŭsie biełarusy, jakija źjechalisia ŭ tyja dni ŭ Narviliški. Chiba heta byŭ adziny raz, kali biełarusy adčuli siabie haspadarami na fiestyvali. Lidar hurta salidaryzavaŭsia z łozunhami mierapryjemstva — «Budźma razam» i «Muzyka adčyniaje miežy».
Akramia hetaha hurta, na fiestyvali ŭ Litvie vystupali jašče dźvie biełaruskija kamandy i bieźlič zachodnich dy litoŭskich hurtoŭ. Možna skazać, što prośba biełaruskaha ministerstva zamiežnych spravaŭ da arhanizataraŭ fiestyvala paźbiehčy «antybiełaruskich zajaŭ i pravakacyj» była zadavolenaja. Ani parušeńniaŭ dziaržaŭnaj miažy, ani jakich‑niebudź nadta palityzavanych vystupaŭ ci ekscesaŭ — ničoha takoha nie było. Adny namioki. Dy i tyja — vielmi družalubnyja, nu voś choć by takija, jak z vusnaŭ adnoha z haściej fiestyvala, ministra zamiežnych spravaŭ Litvy, byłoha jaje ambasadara ŭ Biełarusi Piatrasa Vajciekunasa:
«Hałoŭnaje — skazać usim, i biełarusam, i litoŭcam, i Jeŭraźviazu, što my, jeŭrapiejcy, možam i musim być usie razam. Razam ź biełarusami, razam z rasiejcami, razam z ukraincami».
kazaŭ kiraŭnik ministerstva zamiežnych spraŭ Litvy, hałoŭnaha sponsara fiestyvala «Be 2 gether». Ci pryžyviecca fiestyval u litoŭskim apiendyksie, kala samaj‑samaj biełaruskaj miažy — prahnazavać ciažka. Jak kamiercyjny prajekt «Budźma razam» naŭrad ci ŭtrymajecca. Zastajecca spadziavacca, što vinšavańni i pažadańni z boku Jeŭrapiejskaj kamisii i prezidenta Litvy, kab fiestyval byŭ paśpiachovy, i ŭ nastupnym hodzie buduć padmacavanyja salidnym finansavańniem. Prynamsi biełarusy buduć dakładna «ZA», kab siabroŭstva Biełarusi i Litvy dalej zaachvočvałasia takimi voś fiestyvalami.
Fota pbg.livejournal.com
Kamientary