Pryjorbank pieravioŭ na rachunki dziaržavy minimum 800 miljonaŭ rubloŭ
Mahčyma, heta faktyčna hihancki kešbek, jaki Mikałaj Varabiej vypłaciŭ dziaržavie za dazvoł na pryvatyzacyju Pryjorbanka.
U kancy 2024 hoda padstaŭnaja emirackaja kampanija Soven 1 vykupiła Pryjorbank u aŭstryjskaha Raiffeisen z hihanckim dyskontam da bałansavaha koštu.
Pavodle Raiffeisen, cana kupli była ŭsiaho 215 miljonaŭ jeŭra, choć realistyčnaja cana aŭstryjskaj doli składała 526 miljonaŭ jeŭra — i heta biez uliku budučych prybytkaŭ.
Mutnaja struktura ździełki — praz padstaŭnuju kampaniju ŭ Emiratach z raniej nikomu nieviadomym arabam Machamiedam Aldasary na čale, — a taksama insajdarskaja infarmacyja z bankaŭskich kołaŭ naradziła dumku, što sapraŭdnym bienieficyjaram Pryjorbanka źjaŭlajecca adzin z łukašenkaŭskich «biznesmienaŭ udačy», a mienavita — Mikałaj Varabiej.
Hetaja infarmacyja nikoli nie paćviardžałasia aficyjna pa zrazumiełaj pryčynie — Vierabiej znachodzicca pad sankcyjami. Aficyjnaje pryznańnie viało b da adpaviednych nastupstvaŭ dla banka.
Čytajcie taksama: Kupić miljard za €230 miljonaŭ. Prodaž Pryjorbanka azałaciŭ biznesmienaŭ udačy pry Łukašenku
Analiz niadaŭna apublikavanaha dadatku da hadavoj finansavaj spravazdačnaści AAT «Pryjorbank» za 2025 hod padmacoŭvaje fakt taho, što kancavym bienieficyjaram banka staŭ čałaviek z hihanckim santymientam da dziaržavy i mocnaj vieraj u dziaržaŭny siehmient ekanomiki.
Apošnija hady prybytki bankaŭskaha siektara rastuć, Pryjorbank nie vyłučajecca z trendu. Za 2025 hod pracentnyja dachody vyraśli na 30% da ŭzroŭniu minułaha hodu. Ale čysty prybytak niaznačna ŭpaŭ — da 461,9 miljona rubloŭ suprać 484,1 miljona hodam raniej.
Kudy pajšoŭ prybytak?
Heta tłumačyć samaja anamalnaja ličba ŭ spravazdačnaści — vydatki na «dary, achviaravańni i biezapłatnuju sponsarskuju dapamohu». U raniejšyja časy ličba ŭ hetaj hrafie ledź pieravyšała 5 miljonaŭ rubloŭ, a letaś bank addaŭ na dabračynnaść piatuju častku svajho prybytku, 119 miljonaŭ rubloŭ.
Kamu pajšli hrošy? Nieviadoma. Sam bank nie šukaje pijaru i ścipła maŭčyć, roŭna jak i nijaki atrymalnik dapamohi ŭ 2025 hodzie publična nie padziakavaŭ banku za hihanckija danaty.
Na adpaviednaj staroncy arhanizacyi skazana, što Pryjorbank udzielničaje ŭ adnaŭleńni Lubčanskaha zamka, u letniaj reabilitacyi śmiarotna chvorych dziaciej, nabyvaje miedycynskaje abstalavańnie dla ankacentraŭ. Taksama, «razumiejučy važnuju rolu sportu i ŭličvajučy nacyjanalny prestyž spartyŭnych dasiahnieńniaŭ», dapamahaje fiederacyjam i kłubam.
Taksama varta adznačyć, što ŭ 2025 hodzie Pryjorbank vykupiŭ u dziaržavy (u asobie Dziaržaŭnaha kamitetu pa majomaści) 6,31% svaich akcyj. Biudžet zarabiŭ na apieracyi 162,8 miljona rubloŭ.
Vypłačanyja ŭ 2025 hodzie dyvidendy za 2024 hod byli faktyčna nulavyja, a voś za 2025 hod akcyjanier atrymaje prykładna 176,97 miljona rubloŭ dyvidendaŭ (jany jašče nie vypłačanyja, rašeńnie ab vypłacie i pamiery na akcyju pryniata 30 sakavika 2026 hoda, a voś aŭstryjcy ŭ svoj čas vypłačvać sabie dyvidendy nie mahli — NN).
I što jašče varta adznačyć jak źmienu bankaŭskaj palityki, dyk heta staŭleńnie da abaviazkaŭ dziaržavy.
Pryjorbank u 2025 hodzie staŭ klučavym kredytoram biudžetu praz vykup dziaržaŭnych ablihacyj, jakija aktyŭna raźmiaščaŭ Minfin: partfiel dziaržaŭnych doŭhaterminovych ablihacyj Pryjorbanka za hod vyras z 503 miljonaŭ da 971 miljona rubloŭ.
Taksama bank staŭ radziej admaŭlać u kredytach dziaržaŭnym pradpryjemstvam, ich abaviazki pa hetaj hrafie vyraśli bolš čym udvaja: z 52 miljonaŭ u 2024‑m da 122,4 miljona rubloŭ u 2025-m. Vyłučyć kankretnych dziaržaŭnych atrymalnikaŭ kredytaŭ niemahčyma, ale najbolš imavierna, što jany adnosiacca da apracoŭčaj pramysłovaści.
Takim čynam, kali ličyć, što i sponsarskaja dapamoha pajšła dziaržaŭnym jurasobam, to ahułam praz roznyja instrumienty z Pryjorbanka da dziaržavy pieraciakło bolš za 800 miljonaŭ rubloŭ, abo bolšaja častka dyskontu da bałansavaha koštu, pa jakim byŭ vykupleny bank.
Adnačasova z hetym bank kratna pavialičyŭ svoj statutny fond — z 86 rubloŭ až da 566 miljonaŭ rubloŭ, nakiravaŭšy tudy nieraźmierkavany prybytak apošnich hadoŭ. Uskosna heta moža śviedčyć ab namiery naroščvać i kredytavańnie i maksimalnyja sumy kredytaŭ, abo pryciahvać finansavańnie z trecich jurysdykcyj, u jakich bolšyja patrabavańni da pamieraŭ narmatyŭnaha kapitału.
Kamientary
Miž tym adcisnuty ŭ Rajfajzena Priorbank nie chavaje taho, što jon faktyčna źjaŭlajecca dziaržaŭnym bankam, bo adličavajučy 20 adsotkaŭ čystaha prybytku na karyść dziaržavy jon dabraachvotna abkradaje minarytarnych akcyjanieraŭ.
U svoj čas hałoŭnym arhumientam u spravie Biełšyny suprać Jeŭrakamisii pa pytańni admieny sankcyj było mienavita toje, što jana stratnaja i nie finansuje dyvidendami svajho akcyjaniera - dziaržavu. Tady jašče nie było surjeznych dokazaŭ pracy Biełšyny na rasiejski vajenpram i sankcyi ź jaje byli źniatyja.
Tamu Priorbank vyjšaŭ na ślizki šlach, vynikam čaho jon moža stać uviadzieńnie prynamsi jeŭrapiejskich sankcyj suprać jaho. A ŭsim amataram doŭhich inviestycyj u Biełaruś kštałtu klijentaŭ "Priorstrachovanija" možna tolki pažadać dobraha nastroju.