Miaśnikovič: Z 1 śniežnia «Čyžoŭka-Arena» pavinna pracavać

Prem'jer-ministr Biełarusi Michaił Miaśnikovič pastaviŭ zadaču zaviaršyć padrychtoŭku asnoŭnych abjektaŭ Minska da chakiejnaha čempijanatu śvietu-2014 da kanca hetaha hoda. Takoje daručeńnie jon daŭ 12 červienia na pasiadžeńni arhanizacyjnaha kamiteta pa padrychtoŭcy i praviadzieńni ŭ Biełarusi čempijanatu śvietu pa chakiei, paviedamiła pres-słužba ŭrada.

Tak, da 7 listapada pavinien być zdadzieny ŭ ekspłuatacyju šmatfunkcyjanalny spartyŭna-zabaŭlalny kompleks «Čyžoŭka-Arena», da 1 śniežnia nieabchodna vykanać dobraŭparadkavańnie prylehłych da jaho terytoryj. «Z 1 śniežnia „Čyžoŭka-Arena“ pavinna pracavać», — adznačyŭ Miaśnikovič.

Da kanca hoda nieabchodna ŭvieści jašče adzin bujny kompleks — «Akva-Minsk» z prylehłaj da jaho infrastrukturaj. Uźviadzieńnie novaha budynka muzieja Vialikaj Ajčynnaj vajny pavinna zaviaršycca da 1 žniŭnia.

Akramia taho, prem'jer-ministr zapatrabavaŭ u zapłanavanyja terminy zaviaršyć raboty pa ŭvodzie ŭ ekspłuatacyju 10 novych hatelaŭ, a taksama padrychtoŭcy studenckich internataŭ da pryjomu haściej čempijanatu ŭ Minsku. Dla pracy ŭ novych hatelach spatrebicca pryciahnuć 1,2 tys. čałaviek. Miaśnikovič daŭ daručeńnie arhanizavać dla piersanału takich abjektaŭ majstar-kłasy, u tym liku pa anhlijskaj movie.

«Toje, što tyčycca padrychtoŭki transpartnaj infrastruktury, dobraŭparadkavańnia, usio heta treba zrabić sioleta, da 1 kastryčnika», — padkreśliŭ jon.

Miaśnikovič dadaŭ, što čempijanat śvietu pa chakiei «źjaŭlajecca znakavaj padziejaj dla Biełarusi i jon pavinien być praviedzieny na vysokim uzroŭni».

Jak paviedamiŭ na pasiadžeńni staršynia Minskaha harvykankama Mikałaj Ładućka, raboty pa najaŭnym utrymańni, rekanstrukcyi, kapitalnym ramoncie i budaŭnictvie abjektaŭ transpartnaj infrastruktury ŭ Minsku da čempijanatu śvietu pa chakiei buduć zavieršany va ŭstanoŭlenyja terminy. U červieni ŭviaduć pieršuju čarhu transpartnaj raźviazki Arłoŭskaja — Cimirazieva. Da kanca vieraśnia płanujecca zapuścić druhuju čarhu abjekta. Da kastryčnika taksama ŭviaduć u ekspłuatacyju druhuju čarhu raźviazki pa praśpiekcie Dziaržynskaha. «Takim čynam, transpartnyja raźviazki, jakija byli zapłanavany z ulikam aptymizacyi ŭ Minsku, buduć zavieršany», — kanstatavaŭ jon.

Ładućka taksama zapeŭniŭ, što da kanca hetaha hoda budzie vyrašana zadača pa stvareńni 20 tys. miescaŭ dla adnačasovaha raźmiaščeńnia ŭ Minsku fanataŭ, turystaŭ i haściej čempijanatu śvietu pa chakiei.

Asobnaja ŭvaha nadajecca abnaŭleńniu pasažyrskaha transpartu horada: zakuplajucca novyja aŭtobusy i vahony mietro.

Da čempijanatu śvietu pa chakiei, zajaviŭ Ładućka, źmienicca i vonkavaje abličča Minska — źmienicca mastackaje afarmleńnie horada, na centralnych vulicach źjaviacca novyja elemienty iluminacyi.

Maryna Nosava, BiełaPAN

http://by.belapan.by/archive/2013/06/12/630442_630463/

• 0
• 0
• 0
• 0
• 0
• 0
• 0
• 0