«Heta była karotkaja, dvuchhadzinnaja, sustreča praz kraty i dvajnoje škło, praz telefon».
— Heta była karotkaja, dvuchhadzinnaja, sustreča praz kraty i dvajnoje škło, praz telefon…, — raskazvaje Maryna Adamovič, paviedamlaje statkevich.org. — Za ŭvieś čas źniavoleńnia Mikałaja, a heta ŭžo bolš za dva hady i siem miesiacaŭ, ja tolki adnojčy mieła mahčymaść apynucca pobač ź im, dakranucca, abniać: u śniežni 2011 hoda, jašče ŭ Škłovie, bolš, za 1,5 hady tamu.
Heta viedajuć usie svajaki siońniašnich palitviaźniaŭ: kali źjaŭlajecca chacia b tearetyčnaja mahčymaść sustrečy, marudzić nielha, bo zaŭtra jaje moža ŭžo nie być. Uvieś naš dośvied minułych 2,5 hadoŭ ab hetym śviedčyć. Tamu, kaniešnie ž, ja skarystałasia hetaj mahčymaściu, jak tolki jana źjaviłasia…
Mikałaj nie źmianiŭsia: jon taki ž, jak zaŭsiody: upeŭnieny, spakojny, mocny i vielmi pazityŭny. Vyvodziać na spatkańnie niekalki čałaviek adrazu i navat źniešnie heta vielmi bačna: pryhožy, mocny, volny čałaviek…Navat zahareły krychu, bo, kaža, soniejka traplaje zaraz na bolšuju častku turemnaha dvoryka, i, kali ŭvieś čas ruchacca, to jaho chapaje abodvum — jany hulajuć udvoch z susiedam pa kamiery.
Kaniešnie ž, nie pamianiałasia i jaho sistema kaštoŭnaściaŭ — jon viedaje, što i dziela čaho robić.
Pra «inicyjatyvu babrujskich aktyvistaŭ», što ŭzrušyła sieciva, skazaŭ, što, navat, kali «ŭsia demakratyčnaja hramadskaść» źvierniecca da jaho, ci, prosta, jon zastaniecca adzin, ŭ poŭnaj izalacyi, to i tady nie zrobić hetaha.Prosta, nie zdoleje… Dziakavać Bohu, takich listoŭ z prapanovami «paprasicca» da jaho nie dachodziła, jak, zrešty, i inšych: apošnim časam listy z voli amal nie dachodziać. Mikałaj pažartavaŭ, što, mabyć, pomściać za jaho acenku dakłada spadara Paleckisa, jakaja trapiła ŭ druk (zapytaŭ: «svajho» baroniać ci što? (M.A.)), i list da litoŭskaha premjera.
Ad siabie (M.A.) dadam: Mikałaj adkazvaje na ŭsie listy, u jakich jość zvarotny adras (jaki možna razabrać) i, kali niechta pisaŭ jamu i nie atrymaŭ adkazu, prašu, nie pakidajcie heta biespakaranym — pišycie skarhi ŭ turmu i Departamient vykanańnia pakarańniaŭ na pieraškody ŭ listavańni.
Jašče adna balučaja tema, jakuju my zakranuli, heta — pavolnaja, ale zaŭvažnaja, praca pa «zacirańniu» patrabavańnia jeŭrapiejcaŭ ab poŭnaj reabilitacyi achviaraŭ palityčna matyvavanych prysudaŭ, jakaja zaraz viadziecca nie stolki ŭ Jeŭropie, kolki tut, u Biełarusi. Jakimi b vysokimi słovami i matyvami jana nie prykryvałasia, Mikałaj nazvaŭ heta «karyślivym zdradnictvam», bo «heta zakładaje padmurak pad novyja złačynstvy, robić mahčymym i spakuślivym dla ŭłady zachop novych zakładnikaŭ». Jon vielmi prasiŭ ahučyć jaho pazicyju.
Darečy, u turmie, u vializarnaj stupieni dziakujučy Mikałaju, ŭžo kolki miesiacaŭ zapar vydajuć viaźniam naležnyja pradmiety hihijeny. A za travień i červień vydali navat adnarazovyja brytvy. Jak kažuć, «kropla kamień točyć». A jak heta važna dla tych, u kaho nikoha nie zastałosia na voli!
Jon vielmi vysoka cenić tych «palityčnych», chto zaraz za kratami. Ličyć etych cudoŭnych mocnych ludziej patencyjnymi novymi liderami. Navat pažartavaŭ, što, mabyć, niejki tajemny prychilnik demakratyi va ŭładzie, nazirajučy za «razdrajem» u demakratyčnym asiarodku, vyrašyŭ stvaryć situacyju «kastynha», kab hramadstva mahło vybrać…
Naprykancy sustrečy skazaŭ: «My heta pieražyviem…»
Ja vieru, što tak i budzie. Chutka…
Ciapier čytajuć
Palčys, Andrejeva, Łojka i inšyja imiony — paśla vizitu amierykanskich dypłamataŭ u Minsk vyzvalili 250 palitviaźniaŭ15
Kamientary