Staŭki pa rublovych depazitach u biełaruskich bankach nabližajucca da hadavoha maksimumu

Biełaruskija banki, jakija masava pavyšali pracentnyja staŭki pa rublovych układach, praciahvajuć pavialičvać dachodnaść pa depazitach u nacvalucie. U asobnych vypadkach pracentnyja staŭki ŭžo nabližajucca da hadavoha maksimumu.

Varta adznačyć, što rost pracentnych stavak charakterny dla bolšaści bankaŭ, jakija źjaŭlajucca asnoŭnymi trymalnikami srodkaŭ fizasob.

Tak, «Biełahraprambank», adzin z najbujniejšych trymalnikaŭ depazitaŭ nasielnictva, z 22 lipienia pavialičyŭ dachodnaść pa ŭkładzie «Start!» ź fiksavanaj pracentnaj staŭkaj (pieryjad raźmiaščeńnia 95 dzion) da 34% hadavych. Jak paviedamlałasia raniej, hety bank raniej užo dvojčy (11 i 17 lipienia) pavialičvaŭ pracentnuju staŭku pa hetym układzie.

Z 22 lipienia taksama i «Biełarusbank», najbujniejšy trymalnik depazitaŭ nasielnictva, pryniaŭ rašeńnie ab pavyšeńni pryvabnaści rublovych depazitaŭ. Z paniadziełka dziaržbank ustanaviŭ dla svaich układčykaŭ, jakija zachoŭvajuć źbieražeńni ŭ biełaruskich rublach, zaachvočvalny pracentny dachod.

Pryvatnyja banki, jakija śpiecyjalizujucca na roźničnym kredytavańni, uklučajuć u svoj partfiel novyja depazitnyja pradukty z vysokimi pracentnymi staŭkami. Naprykład, «MTBank» z 23 lipienia pačaŭ prymać depazity, pracentnaja staŭka pa jakich u biełaruskich rublach składaje 33% hadavych.

U svaju čarhu «Delta Bank» abviaściŭ 22 lipienia pra novy depazit «Fłahman plus» z pracentnaj staŭkaj 39% hadavych, jakaja dla ŭkładčykaŭ moža zastavacca niaźmiennaj na praciahu paŭhoda.

Pavodle danych Nacbanka, siaredniaja pracentnaja staŭka pa rublovych układach u nacvalucie znachodziłasia sioleta na samym vysokim uzroŭni ŭ studzieni i składała tady 42,6%.

Jak paviedamlałasia raniej, biełaruskija banki ŭ druhoj dekadzie lipienia stali pavialičvać staŭki pa ŭkładach u nacvalucie paśla paviedamleńniaŭ ab tym, što ŭkładčyki stali pieravodzić rublovyja ŭkłady ŭ valutnyja.

Nahadajem, što ŭ červieni ŭpieršyniu ŭ hetym hodzie adbyłosia źnižeńnie terminovych depazitaŭ nasielnictva ŭ nacvalucie. Pa stanie na 1 lipienia terminovyja rublovyja ŭkłady nasielnictva skłali 22,9 trłn. rubloŭ i skaracilisia za červień na 71,8 młrd. rubloŭ.

U papiarednija miesiacy naziraŭsia pastajanny rost terminovych rublovych układaŭ nasielnictva.

Skaračeńnie prytoku terminovych rublovych układaŭ nasielnictva ŭ bankaŭskuju sistemu adbyvałasia na fonie pamianšeńnia dachodnaści pa rublovych depazitach, što było abumoŭlena źnižeńniem staŭki refinansavańnia. Akramia hetaha, u treciaj dekadzie červienia i pačatku lipienia naziraŭsia rost kursu dołara, što taksama źnižała pryvabnaść rublovych układaŭ u vačach nasielnictva.

• 0
• 0
• 0
• 0
• 0
• 0
• 0
• 0