«Chočaš, kab u ciabie nohi admovili, jak u Ihnatoviča?» Łosik raskazaŭ, jak pierasiakaŭsia ŭ turmie z asudžanymi za zabojstva Dźmitryja Zavadskaha
Były palitviazień Ihar Łosik napisaŭ na svajoj fejsbuk-staroncy čarhovyja ŭspaminy z časoŭ svajho źniavoleńnia. Hetym razam jon uspomniŭ, jak uskosna pierasiakaŭsia ŭ turmie z byłymi aficerami padraździaleńnia «Ałmaz», jakich pasadzili za vykradańnie i zabojstva žurnalista Dźmitryja Zavadskaha ŭ 2000 hodzie — Valeryjem Ihnatovičam i Alaksiejem Huzam.
Kali ja trymaŭ haładoŭku ŭ Žodzinie ŭ studzieni 2021 hoda, mianie vielmi roznymi sposabami sprabavali pierakanać jaje spynić. I načalnik miedčastki Žodzina adnojčy skazaŭ: ty što, chočaš, kab u ciabie nohi admovili ad doŭhaj haładoŭki, jak u Ihnatoviča? Jon nie prymaje ježu bolš za 50 dzion i ŭžo nie budzie chadzić. I ŭ ciabie budzie taksama, budziem praz trubačku karmić abo praz klizmu.
Užo ŭ sakaviku, kali ja ŭskryŭ vieny i mianie za heta kinuli ŭ karcar, ja čuŭ, jak tam niepadalok uvieś čas kryčaŭ i stahnaŭ ad bolu hety Ihnatovič. Zrazumieŭ ja heta, bo pradolnyja časam nazyvali jaho pa proźviščy. Jon kryčaŭ prosta sutkami — i ŭdzień, i ŭnačy, i heta było vielmi žudasna. Praŭda, pradolnyja z hetaha śmiajalisia i žartavali ź jaho.
Na mahiloŭskaj «krytcy» siadzieŭ Alaksiej Huz. Jon nikomu nie kaža, chto jon i za što siadzić. Hadoŭ z 20, a moža i bolš, jon znachodziŭsia ŭ adzinočcy. Jamu sprabavali zakidvać ludziej u kamieru, ale jon ich zaŭsiody biŭ, u tym liku supracoŭnikaŭ SIZA, tak što z časam jaho pakinuli adnaho i bolš takich sprobaŭ nie rabili.
Barada ŭ jaho nižej za pojas. Hulać vyvodziać u kajdankach na rukach i na nahach. Sam z saboj razmaŭlaje ŭžo, śmiajecca, ale dyjałoh padtrymać moža pa mižkamiernaj suviazi. Pra svaju «dzieluhu» nie kaža nikoli, typu «razboj, ničoha cikavaha». Jon pastajanna vykidvaje posud na pradoł, kali jamu prynosiać jaho ŭ kamieru. Byccam by pavinien užo vyzvalicca, bo jamu prysudzili 25 hadoŭ.
Ciapier čytajuć
Mižnarodny kryminalny sud pačaŭ rasśledavańnie złačynstvaŭ, ździejśnienych režymam Łukašenki20
Kamientary