Administracyja kałonii nie admianiła spahnańni ŭ dačynieńni da Alesia Bialackaha

Administracyja papraŭčaj kałonii № 2 Babrujska, dzie adbyvaje pakarańnie pravaabaronca Aleś Bialacki, nie znajšła padstavaŭ dla admieny nakładzienych na jaho spahnańniaŭ. Pra heta skazana ŭ liście načalnika kałonii Alaksandra Kakunina ŭ adkaz na zvarot hramadskaha abjadnańnia «Biełaruskaja asacyjacyja žurnalistaŭ» (BAŽ), členam jakoj źjaŭlajecca Bialacki.

Aficyjny zvarot arhanizacyi byŭ nakiravany ŭ kałoniju ŭ pačatku žniŭnia. Pradstaŭniki BAŽ paviedamlali, što majuć infarmacyju pra ŭžyvańnie da Bialackaha «nieabhruntavanych mier pakarańnia», u pryvatnaści, pazbaŭleńnia zapłanavanaha na lipień spatkańnia z žonkaj i mahčymaści atrymać čarhovuju praduktovuju pieradaču. Žurnalisty prasili admianić hetyja pakarańni i bližejšym časam dazvolić pravaabaroncu sustreču z žonkaj.

Jak vynikaje z adkazu načalnika kałonii, asudžany Bialacki «nieadnarazova dapuskaŭ parušeńni ŭstanoŭlenaha paradku adbyvańnia pakarańnia». Kakunin taksama adznačaje, što sam Bialacki nie abskardziŭ «ukazanyja ŭ zvarocie spahnańni». Takim čynam, robić vysnovu aŭtar lista, «padstavaŭ dla admieny spahnańniaŭ abo ich zamieny na inšyja niama».

«Kryminalna-vykanaŭčaje zakanadaŭstva RB zasnavanaje na pryncypach zakonnaści, humanizmu, demakratyzmu, roŭnaści asudžanych pierad zakonam, dyfierencyjacyi i indyvidualizacyi vykanańnia pakarańnia i inšych mier kryminalnaj adkaznaści, racyjanalnaha ŭžyvańnia mier prymusu i srodkaŭ vypraŭleńnia asudžanych, stymulavańnia ich pravapasłuchmianych pavodzin, spałučeńnia prymusovych mier z vychavaŭčym uździejańniem», — cytuje adkaz načalnika kałonii pres-słužba BAŽ.

Varta adznačyć, što 7 žniŭnia, praź niekalki dzion paśla taho, jak asacyjacyja žurnalistaŭ adpraviła ŭ kałoniju zvarot, Bialackamu ŭsio ž dazvolili pieradać pradukty — heta była pieršaja z pačatku hoda praduktovaja pieradača.

Aleś Bialacki, vice-prezident Mižnarodnaj fiederacyi pravoŭ čałavieka i kiraŭnik zakrytaha biełaruskimi ŭładami pravaabarončaha centra «Viasna», asudžany na čatyry z pałovaj hady pazbaŭleńnia voli ŭ kałonii ŭzmocnienaha režymu z kanfiskacyjaj majomaści za ŭtojvańnie dachodaŭ u asabliva bujnym pamiery. Pravaabaronca byŭ aryštavany 4 žniŭnia 2011 hoda, u listapadzie taho ž hoda nad im adbyŭsia sud.

Padstavaj dla kryminalnaha pieraśledu stała najaŭnaść u Bialackaha zamiežnych bankaŭskich rachunkaŭ, srodki ź jakich vykarystoŭvalisia dla pravaabarončaj dziejnaści. Adkryć rachunki ŭ Biełarusi nie źjaŭlałasia mahčymym, bo «Viasna» pracuje nielehalna — ułady nieadnarazova admaŭlali ŭ aficyjnaj rehistracyi arhanizacyi. Sud taksama nie ŭziaŭ pad uvahu toje, što ŭron, jaki nibyta nanios dziaržavie Bialacki, byŭ całkam kampiensavany za košt dobraachvotnych achviaravańniaŭ hramadzian.

Pravaabaronca aficyjna pryznany viaźniem sumleńnia.

• 0
• 0
• 0
• 0
• 0
• 0
• 0
• 0