Sańnikaŭ pastupiŭ vučycca na prahramu Kalinoŭskaha

Eks-kandydat u prezidenty Biełarusi Andrej Sańnikaŭ staŭ stypiendyjatam polskaj navučalnaj prahramy imia Kastusia Kalinoŭskaha. Palityk atrymaje stypiendyju ŭ 1200 złotych (kala 370 dołaraŭ).

«Andrej Sańnikaŭ, Viačasłaŭ Siŭčyk, Darja Korsak, žonka Uładzimira Kobieca — usie jany pajšli na prahramu paśladypłomnaj adukacyi. Heta moža być tvorčaja praca na abranuju stypiendyjatam temu. Stypiendyja ŭ ich takaja ž, jak i ŭ studentaŭ-kalinoŭcaŭ, a raźličanaja prahrama navučańnia na hod», — raskazała kuratarka prahramy Ina Kulej i dadała, što ciapier stypiendyjalnaja prahrama achoplivaje nie tolki bakałaŭryjat i mahistraturu, ale i inšyja nakirunki — daktaranturu i paśladypłomnuju adukacyju, u pryvatnaści.

Sam były kandydat nie kamientuje svajho pastupleńnia i nie raskazvaje, jakuju pracu płanuje pisać i pry jakim univiersitecie.

Prahrama Kalinoŭskaha karystajecca papularnaściu siarod biełaruskich palitykaŭ i hramadskich dziejačoŭ, jakija apynulisia ŭ emihracyi. U pryvatnaści, hetaj stypiendyjaj skarystalisia palityki Aleś Michalevič, Źmicier Bandarenka, Źmicier Barodka. Polskaja biurakratyja pakidaje emihrantam niašmat mahčymaściaŭ dla vybaru. Tamu z prahramaj Kalinoŭskaha tym albo inšym čynam źviazany amal uvieś emihracyjny asiarodak.

Michalevič kaža, što vynikam zadavoleny.

«Ja znachodziŭsia ŭ Varšavie. Maja navukovaja kiraŭnica była ź Instytuta palityčnych daśledavańniaŭ Polskaj akademii navuk. Ale heta nie była vučebnaja prahrama, heta była navukovaja prahrama. U vyniku ja dapisaŭ svaju doktarskuju dysiertacyju i paśpiachova jaje abaraniŭ u traŭni hetaha hoda».

Siarod inšych viadomych u apazicyjnych kołach asobaŭ, jakija sioleta padali dakumienty na navučańnie pa prahramie Kalinoŭskaha, možna zhadać Viačasłava Dyjanava i Siarhieja Kavalenku. Pryčym, pieršy sprabuje adnavić navučańnie — u 2011 hodzie Dyjanava adličyli z polskaha ŭniviersiteta za prahuły. Zajmajucca navukovymi daśledavańniami na srodki prahramy Kalinoŭskaha sacyjołah Andrej Vardamacki i palitołah Valer Bułhakaŭ.

Nahadajem, što stypiendyjalnaja prahrama Urada Respubliki Polščy imia Kastusia Kalinoŭskaha była stvoranaja pad patranatam prem'jer-ministra Polščy ŭ sakaviku 2006 hoda. Jana stvarałasia z metaj dapamohi studentam, vyklučanym ź biełaruskich navučalnych ustanovaŭ pa palityčnych pryčynach. Ź ciaham času prahrama pašyryłasia taksama na tych, chto nie maje mahčymaści navučacca ŭ Biełarusi praz svaje palityčnyja pohlady.

• 0
• 0
• 0
• 0
• 0
• 0
• 0
• 0