U najbližejšyja dni biełarusam spatrebiacca parasony

Na hetym tydni ŭ Biełarusi čakajucca spačatku karotkačasovyja, a zatym bolš praciahłyja daždžy.

Pra heta siońnia ŭ čas videabryfinhu paviedamiła dziažurny sinoptyk Respublikanskaha hidramieteacentra Julija Chomič.

Pavodle słoŭ sinoptyka, antycykłon, jaki ŭ apošnija dni farmavaŭ u mnohich rajonach krainy suchoje i soniečnaje nadvorje, staŭ pieramiaščacca va ŭschodnim kirunku. Atmaśfierny cisk na terytoryi Biełarusi staŭ padać, pačali ssoŭvacca siudy bolš vilhotnyja pavietranyja masy z Zachodniaj Jeŭropy.

Hetaj nočču ŭ bolšaści rajonaŭ krainy jašče zachavajecca suchoje nadvorje. Ale ŭžo ŭ aŭtorak, u ranišnija i dzionnyja hadziny, stanie bolš abłokaŭ, miescami projduć karotkačasovyja daždžy.

Viecier budzie paŭdniovym, paŭdniova-ŭschodnim słabym, nočču i ranicaj u asobnych rajonach zhuściacca tumany.

Tempieratura pavietra ŭ načnyja hadziny składzie plus 6–11 hradusaŭ, pa zachadzie Bresckaj i Hrodzienskaj abłaściej — ad 12 da 13 hradusaŭ vyšej za nul.

U dzionnyja hadziny pavietra prahrejecca da 17–23 hradusaŭ.

U sieradu i čaćvier pad upłyvam niaŭstojlivaha pavietra z Zachodniaj Jeŭropy načnyja tempieratury pavietra składuć plus 7–13 hradusaŭ, u siaredzinie dnia budzie ad 15 da 22 hradusaŭ.

«Taki tempieraturny fon na 2–3 hradusy pieravyšaje klimatyčnuju normu, charakternuju dla hetych dzion vieraśnia», — adznačyła Julija Chomič. Miescami projduć karotkačasovyja daždžy, nočču i ranicaj isnuje vierahodnaść źjaŭleńnia ŭ asobnych rajonach tumanaŭ, jakija mohuć pahoršyć bačnaść na darohach da 300–900 m.

U piatnicu i vychadnyja dni paŭdniova-zachodnija viatry pačnuć pastaŭlać na terytoryju Biełarusi vilhotnaje pavietra ź Mižziemnaha mora.

«Akramia taho, nad poŭnačču Italii čakajecca ŭtvareńnie cykłonu, jaki budzie pieramiaščacca na Kijeŭskuju vobłaść praz Karpaty. Pad jaho ŭpłyvam na paŭdniovym uschodzie Biełarusi mohuć prajści bolš praciahłyja daždžy» , — dadała sinoptyk.

Tempieratura pavietra ŭnačy składzie plus 8–15 hradusaŭ, dniom u asnoŭnym čakajecca 13–18 hradusaŭ sa znakam plus.

U suviazi z tym, što miescami pa paŭnočnym zachadzie krainie sinoptyki abiacajuć prajaśnieńnie, pavietra tam moža prahrecca da 19–22 hradusaŭ. Viecier spačatku budzie paŭdniovym, paŭdniova-ŭschodnim, a ŭ niadzielu — paŭnočnym. Chutkaść vietru składzie 4–9 mietraŭ u siekundu.

• 0
• 0
• 0
• 0
• 0
• 0
• 0
• 0