«Biełaruski śpiecnaz razam z rasijskim moža apynucca ŭ Siryi…»

Sumiesnyja z Rasijaj stratehičnyja manieŭry «Zachad-2013» prademanstravali novyja tendencyi ŭ vajskovaj palitycy, miarkujuć niezaležnyja naziralniki i vajskovyja admysłoŭcy, piša radyjo «Svaboda».

«Maneŭry prajšli paśpiachova i prademanstravali, što Biełaruś rychtujecca da ŭdziełu ŭ mahčymych vajskovych kanfliktach, u tym liku za miežami Biełarusi».

Pra heta zajaviŭ Svabodzie hienerał-major u adstaŭcy, były parlamentaryj Valer Frałoŭ, aceńvajučy stratehičnyja maneŭry «Zachad-2013», jakija prachodzili ŭ Biełarusi i Rasiei z 20 pa 26 vieraśnia: «Miarkuju, supraćstajańnie Ŭschod — Zachad pacichu pieranosicca, kali chopić uzajemarazumieńnia ŭ eŭrapiejcaŭ i rasiejcaŭ, na liniju Poŭnač — Poŭdzień.

Pryjdziecca im šukać punkty parazumieńnia, bo sapraŭdnaja niebiaśpieka moža ŭźniknuć na Poŭdni ad hetak zvanych terarystaŭ».

Valer Frałoŭ miarkuje, što apošnim časam biełaruskija vajskoŭcy niedastatkova času pravodziać na vučeńniach, i z hetaj pryčyny ich vajskovaja padrychtoŭka mahła istotna źnizicca.

Scenar maneŭraŭ «Zachad-2013» składaŭsia z vajskovych aperacyjaŭ suproć hrup terarystaŭ, jakija nibyta pranikli na terytoryju sajuznaj dziaržavy Biełarusi i Rasiei.

Pakolki kulminacyja maneŭraŭ prachodziła na miežach z krainami NATO, ich pradstaŭniki ŭžo vykazali zaniepakojenaść tym, što Biełaruś i Rasieja rychtujucca da ahresii. U pryvatnaści, ad kiraŭnictva Estonii prahučali zajavy pra adpracoŭku ŭdaru pa Prybałtycy.

Biełaruski ahladalnik Dzianis Mieljancoŭ u mahčymaść vajskovaha kanfliktu Rasiei i jaje sajuźnicy Biełarusi z Zachadam nia vieryć: «Kažuć pra małuju imaviernaść kanfliktu Rasiei z Zachadam, ale ja b jaje ŭvohule adkinuŭ. Na siońniašni dzień i Rasieja, i Zachad znachodziacca ŭ takim stanie, što niepasrednaje sutyknieńnie pamiž imi možna całkam vyklučyć.

Pra Rasieju siońnia nielha kazać jak pra niejki inšy polus u źniešniaj palitycy, jaki supiarečyć zachodniamu polusu, jak heta było padčas chałodnaj vajny. Na siońnia Rasieja chutčej ździajśniaje toje, što adzin rasiejski analityk nazvaŭ kvazi-stratehijaj, kvazi-źniešniaj palitykaj, z čym ja zhodny».

Ahladalnik Dzianis Mieljancoŭ adznačyŭ našmat bolšuju, čym na minułych padobnych maneŭrach, kolkaść biełaruskich vojskaŭ, jakija brali ŭdzieł u maneŭrach «Zachad-2013», a taksama toje, što ŭ ich była vykarystana raznastajnaja vajskovaja technika i sučasnyja vajskovyja srodki kštałtu bieśpilotnikaŭ.

Na dumku Dzianisa Mieljancova, Biełaruś imkniecca prademanstravać svaim partneram vysoki ŭzrovień bojehatoŭnaści i nadziejnaści, kab nie zastacca ŭbaku ad aktualnych tendencyjaŭ.

Jakija heta tendencyi? Vajskovy ahladalnik Alaksandr Alesin miarkuje, što maneŭry «Zachad-2013» nasamreč stali adpracoŭkaj mahčymaj kropkavaj aperacyi na poŭdni.

Heta moža być albo Siaredniaja Azija, dzie paśla sychodu amerykanskich vojskaŭ z Aŭhanistanu možna čakać abvastreńnia sytuacyi, albo inšyja haračyja kropki, miarkuje Alaksandar Alesin paśla nazirańnia za maneŭrami «Zachad-2013»: «I nia tolki. Voś hetaja vysadka z mora, jakaja adbyvałasia pad Kalininhradam, padobna, śviedčyć pra toje, što biełaruski specnaz trenirujecca dla ŭdziełu ŭ aperacyjach i na inšych vajskovych teatrach.

To bok mahčymy ŭdzieł razam z rasiejcami dy inšymi krainami-siabrami ADKB u aperacyjach u rehijonach, dzie jość vychad da mora. Mahčyma, taja ž Syryja. Rasieja abiacała, što kali spatrebicca abaranić admysłoŭcaŭ, jakija buduć dezaktyvavać chimičnuju zbroju, to jana pašle tudy častku specnazu.

Ale z palityčnaha punktu hledžańnia Rasiei było b vielmi zručna, kab heta byŭ nia tolki jaje specnaz, ale i niejki kantynhient ź inšych krain ADKB, dzie Biełaruś — druhaja pa značnaści vajskovaja siła».

A jak być z tym, što biełarusy, kali jany trapiać u Syryju, mohuć być uciahnutyja ŭ vajenny kanflikt u hetaj krainie? «Źjaŭleńnie tam niejkich vojskaŭ mahčymaje tolki z sankcyi AAN. I kali sankcyja budzie, to vajskoŭcy sapraŭdy tam buduć i buduć ryzykavać.

Siemjam zahinułych miratvorcaŭ AAN vypłačvaje kampensacyi. Ale ryzyki nichto nie pazbaŭleny, tut ničoha nia źmieniš», — kaža ahladalnik Alaksandar Alesin.

• 0
• 0
• 0
• 0
• 0
• 0
• 0
• 0