Biełaruś niasie vialikija vydatki z-za najaŭnaści šmatlikich vyklučeńniaŭ u Mytnym sajuzie i Adzinaj ekanamičnaj prastory.
Ab hetym zajaviŭ pieršy vice-premjer Uładzimir Siamaška, vystupajučy siońnia na sumiesnym pasiadžeńni dźviuch pałat parłamienta.
«Z-za niedaskanałaści zakanadaŭčaj bazy Mytnaha sajuza i Adzinaj ekanamičnaj prastory sa šmatlikimi vyklučeńniami i abmiežavańniami my niasiom vialikija vydatki, časta stračvajem cełyja nišy na rynku MS», - skazaŭ Uładzimir Siamaška.
Jon pryvioŭ u jakaści prykładu pastanovu №1432 urada Rasii ad 27 śniežnia 2012 hoda, jakaja faktyčna zakryła pastupleńnie biełaruskaj sielskahaspadarčaj techniki na rasijski rynak.
Uładzimir Siamaška taksama źviarnuŭ uvahu na situacyju, jakaja siońnia składvajecca ŭ Rasijskaj Fiederacyi i ŭ cełym u Mytnym sajuzie pa ŭtylizacyjnamu zboru. «Niadaŭna pryniaty zakon Rasijskaj Fiederacyi ab tym, što ŭtylizacyjny zbor budzie źbiracca pa krainie pryznačeńnia. Dla Biełarusi, kali ničoha nie rabić, dla biełaruskich vytvorcaŭ heta aznačaje stratu kankurentazdolnaści», - skazaŭ jon.
Pieršy vice-premjer ličyć, što dla minimizacyi strat biełaruskich vytvorcaŭ nieabchodna ŭ ramkach padrychtoŭki narmatyŭnaj bazy Adzinaj ekanamičnaj prastory Biełarusi, Kazachstana i Rasii ŭstanavić adzinyja praviły vytvorčaści i realizacyi pradukcyi.
«Staić zadača - vyrašyć hetu prablemu da 1 studzienia 2015 hoda. Ale niekatoryja pytańni nieabchodna vyrašyć značna raniej. Chto b što ni havaryŭ, ale rynak Rasii i Mytnaha sajuza zastajecca adnym z asnoŭnych našych rynkaŭ, i my pavinny mieć na im vyznačanyja i zrazumiełyja praviły hulni. Heta budzie załoham paśpiachovaj raboty našaj pramysłovaści i ŭ cełym narodnahaspadarčaha kompleksu», - adznačyŭ Uładzimir Siamaška.
Kamientary