«Ja nie haspadzin, ja — tavaryš!»: piać faktaŭ pra Barysa Baturu

Barys Batura zvolnieny z pasady staršyni Minskaha abłvykankama i pryznačany dyrektaram «Barysaŭdreva». «NN» sabrała samyja cikavyja fakty pra hetaha charyzmatyčnaha čynoŭnika.

1. Byŭ ministram jašče ŭ BSSR

Barys Batura – vieteran čynoŭnickaha korpusu. Jamu ŭžo 66 hadoŭ. Naradziŭsia ŭ Vaŭkavysku. Skončyŭ Politechničny instytut. Karjeru pačaŭ budavać u śfiery žyllova-kamunalnaj haspadarki. Naprykancy isnavańnia BSSR navat pabyŭ ministram ŽKH. Da jaho hetuju pasadu zajmaŭ siońniašni premjer Michaił Miaśnikovič. Ich źviazvajuć daŭnija suviazi i znajomstva.

Potym Batura uznačaliŭ hetaje ministerstva ŭžo ŭ niezaležnaj krainie. Pryčym, mieŭ partfiel ministra i pry Kiebiču, i pra Łukašenku. Ahułam ministram ŽKH Batura prabyŭ ad 1987 da 1999 — niezvyčajna doŭha dla taho burlivaha pieryjadu.

2. Načalnik Mahiloŭščyny

U svoj čas (2000), kali Baturu pryznačali kiraŭnikom Mahiloŭščyny, vobłaść była ŭ ekanamičnaj jamie. Adnak za hady kiravańnia Batury kryzis atrymałasia pieraadoleć. Vobłaść była adnoj ź pieršych u krainie pa pryciahvańni zamiežnych inviestycyj, najpierš rasiejskich. Uvohule, Batura maje dobryja kantakty z rasiejskimi biznesoŭcami. Kazali, što niekali jamu stavili ŭ vinu ŭ Administracyi prezidenta častyja kamandziroŭki ŭ Rasiju. Za čas jahonaha znachodžańnia na pasadzie staršyni abłvykankamu abličča Mahilova źmianiłasia tolki ŭ lepšy bok.

3. U žančyn dychańnie stanovicca bolš častym

Na nievialiki čas z Mahilova Baturu pieraviali ŭ Minsk na pasadu śpikiera savieta respubliki. Prajšoŭ jon tudy pa «prezidenckaj kvocie». Były staršynia Homielskaha abłvykankama, a siońniašni staršynia Kamiteta dziaržkantrolu Alaksandr Jakabson tak pradstaviŭ Baturu: «Jon impazantny mužčyna, kali žančyny prachodziać mima, to ŭ ich dychańnie stanovicca bolš častym». Staršynia CVK Lidzija Jarmošyna tady papytałasia, a ci nie pieraškodzić heta ŭ pracy.

Budučy na pasadzie śpikiera, Batura zaklikaŭ uzmacnić ideałahičnuju pracu na miescach. Abvinavačvaŭ Jeŭraparłamient u dyskryminacyi biełaruskich deputataŭ. Mienavita jon reprezientavaŭ Biełaruś na pachavańni prezidenta Polščy Lecha Kačynskaha.

4. Kazaŭ, što zarablaje 14 miljonaŭ

Praŭda, siadzieŭ na sinekury ŭ parłamiencie Batura niadoŭha. Pryčym, jak pakazvajuć niekatoryja śviedčańni, jon sam paprasiŭsia zajmać pasadu staršyni Minskaha abłvykankama. «Dziakuj prezidentu, što adhuknuŭsia na maju prapanovu. Minskaja vobłaść — adkazny ŭčastak. Budziem ukałvać pa poŭnaj», - skazaŭ jon tady.

U kastryčniku 2012 Barys Batura ŭ intervju telekanału STV pryznavaŭsia, što sam jeździć na pracu na mašynie, šafiora nie maje, a taksama ahučyŭ zarobak. «Nu, narmalny zarobak. Dziakuj kiraŭniku dziaržavy. Apošnim časam vychodzić dzieści 14 miljonaŭ».

Adzinym svaim chobi Batura nazyvaŭ hulniu ŭ vialiki tenis. Chacia sam uznačalvaŭ fiederacyju valejboła.

5. «Ja ničoha nie płanuju, u nas prezident usio płanuje»

Za čas pracy «hubiernataram» Minščyny Batura zapomniŭsia łabiravańniem intaresaŭ kitajskaj technałahičnaha parku pad Smalavičami, praciŭnikaŭ ža nazyvaŭ «piačornym ludźmi». Razmaŭlajučy ź miascovymi žycharami ŭ 2012 hodzie jon skazaŭ nastupnuju frazu: «Ja nie haspadzin, ja — tavaryš».

Chacia heta nie adziny afaryzm ad čynoŭnika. Jašče byŭšy na pasadzie staršyni Mahiloŭskaha abłvykankama Batura skazaŭ cikavuju frazu: «Ja ničoha nie płanuju. U nas prezident usio płanuje…» Ciapier prezident zapłanavaŭ dla Batury pracu na «Barysaŭdrevie», Baturu ž zastajecca tolki zhadzicca i z hetym.

• 0
• 0
• 0
• 0
• 0
• 0