U Voršy prajšła štohadovaja impreza, pryśviečanaja čarhovym uhodkam piśmieńnika-ziemlaka.
Kala pomnika Uładzimieru Karatkieviču prajšli litaraturnyja čytańni «I nie źnikać paetam viečna», jakija zaviaršylisia ŭračystym uskładańniem kvietak, paviedamlaje radyjo «Svaboda».
Štohod 26 listapada kala pomnika piśmieńniku ŭ haradpkim parku źbirajucca vučni i nastaŭniki, rabotniki sfery kultury i demakratyčnyja aktyvisty horada, supracoŭniki muzeja Ŭładzimira Karatkieviča, siabry «Tavarystva biełaruskaj movy», miascovyja litaratary i prosta haradžanie, jakija pamiatajuć hetuju datu.
Sioleta va ŭradženca Voršy Ŭładzimira Karatkieviča — 83-ja ŭhodki, i ŭžo amal 20 hod jaho niama na hetym śviecie. Ale jahonaja zaŭsiodnaja prysutnaść u Voršy duža adčuvalnaja: jahonaje imia nosić vulica, dzie dahetul staić chata svajakoŭ Karatkieviča.
Haściujučy tut, jon pisaŭ apovieść «Dzikaje palavańnie karala Stacha», i pra heta nahadvaje memaryjalnaja šylda.
Tut jość haradzki muzej, dzie ekspanujucca i asabistyja rečy piśmieńnika, i ŭsio, što sabrana pra jaho ŭ litaraturnym, muzyčnym, mastackim vyjaŭleńni: knihi, karciny, aŭdyjozapisy.
Imia Ŭładzimiera Karatkieviča nosiać dziciačaja biblijateka i siaredniaja škoła № 3, vučni jakoj tradycyjna biaruć udzieł i ŭ litaraturnych čytańniach u honar ziemlaka, i ŭ inšych imprezach.
Sioleta, jak i zazvyčaj, śviatkavańnie ŭhodkaŭ budzie doŭžycca ŭvieś hety apošni listapadaŭski tydzień. Muzej zaprašaje na teatralizavanyja ekskursii «Planeta Karatkieviča» z udziełam tvorčych kalektyvaŭ Voršy.
U dziciačaj biblijatecy imia U. S. Karatkieviča projdzie litaraturny viečar «Piaśniar dušeŭnaj ščodraści.
Na zaŭtra zaplanavanaja prezentacyja aŭdyjoalbomu Źmiciera Vajciuškieviča «Ja naradziŭsia tut» na vieršy Karatkieviča, na paślazaŭtra — litaraturna-muzyčnaja haścioŭnia «Žyvie Karatkievič u horadzie rodnym, u tvorach, muzei, u sercy narodnym».
Aršancy šanujuć pamiać słavutaha ziemlaka, viedajuć miaściny, dzie jon žyŭ, i dzie lubiŭ bavić čas. A voś u abłasnym Viciebsku ŭhodki Karatkieviča sioleta praktyčna nie adznačajucca.
Ciapier čytajuć
Čamu YouTube vydaliŭ kanały BiełTA, STB i ANT? Voś što viadoma30
Kamientary