Na pasiadžeńni Mahiloŭskaha abłasnoha suda 11 śniežnia były staršynia Homielskaha harvykankama Viktar Pilipiec zajaviŭ, što nie ličyć siabie vinavatym i ŭsie jaho dziejańni byli zakonnymi.
4 listapada Mahiloŭski abłsud pačaŭ razhlad kryminalnaj spravy, raspačataj u dačynieńni da słužbovych asob Homielskaha harvykankama. Pavodle źviestak Śledčaha kamiteta, abvinavačvanyja ŭ vieraśni—kastryčniku 2011 hoda niezakonna raźmierkavali pamiž saboj, svaimi svajakami, blizkimi i znajomymi 27 kvater u šmatkvaternych žyłych damach, pryniatych u ekspłuatacyju ŭ studzieni—krasaviku 2011 hoda. Častka žyłych pamiaškańniaŭ była aformlena na padstaŭnych asob.
11 śniežnia sud zakončyŭ apytańnie śviedak i pierajšoŭ da dopytu abvinavačvanych, siarod jakich akramia Pilipca były dyrektar upraŭleńnia kapitalnaha budaŭnictva (UKB) Homiela Ihar Adarčanka, jaho namieśnik pa ekanomicy i finansach Valeryj Barysievič, načalnik žyllova-inviestycyjnaha adździeła Antanina Zielanok i načalnik płanava-dahavornaha adździeła Ała Nizkoŭskaja. Pilipiec i Nizkoŭskaja ŭtrymlivajucca pad vartaj u Mahiloŭskim SIZA. Usie jany abvinavačvajucca ŭ złoŭžyvańni ŭładaj abo słužbovymi paŭnamoctvami i ŭ saŭdziele ŭ złačynstvie.
«Pryznać vinu tam, dzie jaje niama, absurdna», — zajaviŭ siońnia Pilipiec, adkazvajučy na pytańni dziaržaŭnaha abvinavaŭcy Dzianisa Kičyhina.
Jak śćviardžaje abvinavačvany, pradadzienaje hramadzianam žyllo nielha było realizavać inšym sposabam, akramia jak adčužeńniem va UKB i nastupnym prodažam, i «dziejańni tych, chto zajmaŭsia adčužeńniem i zaklučeńniem dahavoraŭ, nie byli supraćpraŭnymi».
«Kali b jaho možna było realizavać inšym sposabam, to jaho b pradali, paśla taho jak adabrali ŭ tych, u kaho paličyli niezakonna nabytym», — skazaŭ Pilipiec.
«Na dumku śledstva, tanna pradali, ale dalejšymi dziejańniami z padačy śledstva, prakuratury i suda pa viartańni kvater i hrošaj tym, chto ich kupiŭ, heta naŭmysnaje dziejańnie pa naniasieńni ŭronu pradpryjemstvu», — zajaviŭ padsudny.
Jon raskazaŭ, što UKB ciapier vykupiła hetyja kvatery. «Ludzi, jakija zapłacili, nabyvajučy hetaje žyllo, addali hetaje žyllo UKB. Hrošy UKB ułasnyja viarnuła hetym ludziam. Ułasnych u jaho nie chapiła i jano ŭziała kredyty pad vysokuju pracentnuju staŭku, i siońnia niasie nie tolki kamunalnyja zatraty, ale i varjackija zatraty pa absłuhoŭvańni kredytu», — śćviardžaje były horadanačalnik. Pilipiec padkreśliŭ, što z-za takich dziejańniaŭ bałansatrymalnik žylla — UKB — niasie vielizarnyja raschody i pieratvaryŭsia ŭ pradpryjemstva na stadyi bankructva.
Prakuror Dzianis Kičyhin spytaŭ Pilipca, ci akazvaŭsia na jaho nacisk padčas śledstva.
«Nakont hetaha ja nie budu havaryć, tamu što historyja ŭsio rasstavić na svaje miescy. Nacisk… Kali b presy nie było, ja b skazaŭ pra inšych, jak akazvaŭsia nacisk. Heta prosta toje, ab čym treba zmaŭčać», — zajaviŭ były kiraŭnik Homiela.
«Kali b ja nie viedaŭ padaploki ŭsiaho hetaha, i ŭ bolš vuzkim kole ja b vam raskazaŭ inšaje, ale viedajecie, kali… Usio narmalna, nijakaha nacisku ni na kaho nie było», — skazaŭ jon.
U sieradu byŭ pačaty dopyt druhoha abvinavačvanaha Ihara Adarčanki. Nastupnaje pasiadžeńnie suda namiečana na 12 śniežnia.
Ciapier čytajuć
Capkała i Bałkuniec atakavali litoŭskaha palityka, jaki dapamahaŭ biełarusam paśla 2020‑ha i spryčyniŭsia da spravy, jakuju zavioŭ prakuror u Haazie27
Kamientary