Varaškievič pryśviaciŭ pieśniu Saładuchu

Hurt «Krama» daŭ viasioły i miły kancert u «Hrafici».

Varaškievič kpiŭ z Saładuchi i Michałka dy pradstaviŭ novuju ołdskulnuju reč z budučaha alboma klasykaŭ biełaruskaha rok-n-rołu.

Svoj pieršy ŭ 2014-m kancert «Krama» pačała, viadoma ž, ź vinšavańniaŭ z Novym hodam. Dla muzykaŭ jon abiacaje stać asablivym choć by z toj pryčyny, što jany rychtujuć da vydańnia novy albom u tradycyjnym dla siabie hučańni. Ihar Varaškievič na pryvitańnie hraje «Žyćcio – dziŭny son», a potym kolki starych hitoŭ. Usie z achvotaju padpiavajuć, ale čakajuć: ci pakaža «Krama» zusim novyja i nie čutyja dahetul pieśni.

Hučyć «Kamendant», a zatym «Mein Faterland». Varaškievič papiaredžvaje, što kancert dajecca biez papiaredniaj repietycyi, ale vidavočna, što i bieź jaje muzyki hučać zładžana. Lider hurta moža časam dazvolić sabie adchinucca ad mikrafona padčas śpievu, kab publika za im praciahnuła frazu: «Padniasuć tabie vino i kavałak chleba», naprykład. Kančatkova darešty zapoŭnienaja zała «Hrafici» razvarušycca padčas dylohii «Stefka» – paśla źjaŭleńnia «Stefki praz 20 hod» jany razam z aryhinalnaj «Stefkaj», «bondaŭskich» jašče časoŭ, vykonvajucca zaŭždy razam i biez paŭzy miž pieśniami.

«Dziaŭčynku sa šklanymi vačyma» Varaškievič pradstaŭlaje jak pieśniu vielmi sumnuju, ale pry hetym ramantyčnuju. Jaje možna pryniać za niavydadzieny «kramaŭski» rarytet pačatku 90-ch,

adnak nie – jana ŭvojdzie jakraz u hety samy novy albom hurtu. Niečakana Ihar zhadvaje pra Saładuchu i vykazvaje škadavańnie, što taho nie adpravili na «Eŭraviziju», bo rokier uraziŭsia vobrazam hihanckaha matyla, u jakim paŭstaŭ pop-śpiavak. «Ale

nia budziem jaho kryŭdzić, jon ža «Kramu» lubić», – zaŭvažyŭ Ihar i praktyčna pryśviaciŭ Saładuchu pieśniu «Nieba – los arła», bo «jon ža aroł!»

Samy intryhoŭny momant u kancercie «Kramy» pryśpieŭ. Daŭno takoha nie było, kab muzyki ŭpieršyniu pradstaŭlali sa sceny svaju pieśniu.

Novy tvor zaviecca «Vyšej za dachi», słovy da jakoha napisaŭ Źmicier Łukašuk.

«Pra što pieśnia, nie pytajciesia, bo jana ni pra što. Napeŭna, pra niejkuju dziaŭčynu, chalera jaje viedaje», – ščyra pierakazaŭ jaje źmiest Varaškievič. Paśla premjery

śpiavak dadaŭ, što jamu padabajecca rabić ołdskulnyja rečy i jon razumieje, što takoje na radyjo nia voźmuć. «Chaj nie biaruć, my budziem da kanca žyćcia ŭ «Hrafici» kancerty davać.

I, darečy, heta nie najhoršy varyjant. Bo publika tut źbirajecca najlepšaja!»

U peŭny momant Varaškievič aktyŭna zaklikaje nalivać piŭko dy harełačku. Heta znak taho, što zahučyć pieśnia, bieź jakoj voś užo 20 hod nie abychodzicca nivodzin kancert hurta – «Hej, tam, nalivaj».

«Kramaŭcy» lubiać zhadvać historyju z časoŭ rasijskich hastrolaŭ, kali da ich padyšoŭ vakalist hurtu «Tiechnołohija» Roma Rabcaŭ, kab pachvalić za vydatnuju pieśniu pra hiejaŭ.

«Čykaha najts» Varaškievič pradstaviŭ jak ulubionuju pieśniu hurtu «Pałac», što častkova tut prysutničaŭ u asobie Jurasia Bielakova. Jašče adzin udzielnik «Pałaca», Andrej Cierachovič, taksama byŭ na kancercie, adnak užo ŭ jakaści ŭdzielnika. Zusim niadaŭna jon zamianiŭ Andreja Fiłatava, jaki syšoŭ praz tatalnuju zaniataść.

Varaškievič u hety viečar lohka kpiŭ nia tolki z Saładuchi. «Ja voś dumaju, moža, taksama «Ruski albom» zapisać, – kazaŭ jon z uśmieškaju. – Moža, tady zaprosiać u Vilniu ci ŭ Kijevie na Majdanie vystupić».

Lider «Kramy» pažadaŭ usim dobrym ludziam bolš ščaścia i svabody ŭ novym hodzie, choć i pryznaŭsia, što nie ŭjaŭlaje, jak heta pavinna vyhladać, i paabiacaŭ radavać novymi pieśniami na kožnym kancercie pa miery taho, jak jany buduć dapisanyja.

Na nastupnym vystupie 25 lutaha «Krama» rychtuje jašče jak minimum dźvie premjery.

Tekst i fota – Budzma.org, videa – Jaŭhien Šapčyc, Tuzin.fm

• 0
• 0
• 0
• 0
• 0
• 0
• 0
• 0