Mianie nichto nie źviarhaŭ, uładu zachapili nacyjanalistyčnyja, fašysckija małodčyki, zajaviŭ były prezident Ukrainy Viktar Janukovič na pres-kanfierencyi ŭ Rastovie-na-Donie (Rasija). Havaryŭ jon pa-rasiejsku, błytana i supiarečliva. «Heta vynik palityki Zachadu, jaki patvorstvavaŭ Majdanu», — zajaviŭ jon pra ciapierašniuju situacyju. Jon paprasiŭ prabačeńnia ŭ naroda Ukrainy i «Bierkuta» za ŭsio, što adbyłosia. «Ja suprać uvarvańnia Rasii i parušeńnia cełasnaści Ukrainy», skazaŭ jon, ale «liču siabie dziejnym prezidentam Ukrainy».
Jon zaklikaŭ da vykanańnia damoŭlenaściaŭ ad 21 lutaha i praviadzieńnia vybaraŭ u śniežni 2014 hoda i zajaviŭ, što nie pryznaje zakonnaść rašeńnia Viarchoŭnaj Rady pra adchileńnie jaho ad ułady.
Voś žyvy efir z Rastova:
Abo tut:
Ustupnaje słova Janukoviča było vielmi karotkim.
Pačalisia pytańni. Pieršaje — ad ITAR-TASS. Zaminačka: mikrafon nie pracuje.
«Ja vieryŭ u paradačnaść jeŭrapiejskich pasiarednikaŭ», — kaža Janukovič. «Ja vieryŭ, što radykalnyja siły pavinny byli razzbroicca i vyzvalić zachoplenyja terytoryi. Ale heta nie było vykanana. Kijeŭ byŭ navodnieny ŭzbrojenymi ludźmi. Jany stali zachoplivać, hramić damy, kultavyja budynki, chramy».
Na pytańnie «Kommiersanta», ci jamu za niešta soramna jon skazaŭ, što jamu soramna za vieteranami, usimi hramadzianami za toje, što jon nie zdoleŭ praduchilić hetyja padziei. Jon paprasiŭ prabačeńnia ŭ naroda za ŭsio, što adbyłosia.
Čamu vy ŭciakli z Ukrainy, pytajecca Pieršy kanał rasijskaha TV.
«Ja nikudy nie źbiahaŭ, ja vyjechaŭ u Charkaŭ. Ale pa darozie ŭ Kijevie maju mašynu abstralali z aŭtamatyčnaj zbroi. U Charkaŭ my pryjechali rankam 22 lutaha. Tady słužba biaśpieki stała atrymlivać infarmacyju, što ŭ Charkaŭ prybyvajuć radykalna nastrojenyja hrupy. Tut nie strach byŭ, a ŭmovy biaśpieki, jakija treba było zachavać [stylistyka vykazvańniaŭ zachavanyja]. Sa mnoj byli Rybak i Klujeŭ. Ja ich paprasiŭ lacieć u Danieck, kab sabrać aktyŭ. A sam rašyŭ pajechać u Łuhansk. Słužba «Aeraruch» i dyśpietčary vajskovyja papiaredzili nas, kab my źmianili kirunak, bo my nibyta źbirajemsia vylecieć u Rasiju. I lotčyki źmianili maršrut i pasadzili viertalot u Daniecku. Paśla ja pierasoŭvaŭsia pa aŭtamabilnych darohach i pierajechaŭ u Krym. Mnie pierazvaniŭ starejšy syn i skazaŭ, što ja ŭ takich umovach nie mahu ryzykavać siamjoj. Voś tak składvałasia situacyja».
Pytańnie: čamu my ŭ Rastovie, a nie ŭ Maskvie i što Vy skažacie pra situacyju ŭ Krymie?
«My ŭ Rastovie, bo kala Rastova ŭ mianie pražyvaje moj stary siabar. I ja pierajechaŭ da jaho, kab znajści časovy prytułak. U Krymie adbyvajecca naturalnaja reakcyja na toj bandycki pieravarot, jaki adbyŭsia ŭ Kijevie, dzie kučka radykałaŭ u paraŭnańni z 45-miljonnym nasielnictvam Ukrainy. Krymčanie nie chočuć i nie buduć padparadkoŭvacca nacyjanalistym i banderaŭcam. Absalutna naturalnaje žadańnie krymčan stvarać atrady samaabarony. Ale ja źviartajusia da krymčan z zaklikam nie dapuścić pralićcia kryvi. I chaču źviarnucca da krymčan jak dziejny prezident Ukrainy: Krym pavinien zastacca aŭtanomnaj terytoryjaj u składzie Ukrainy».
Pytańnie: Ci budziecie źviartacca da Rasii pa vajskovuju padtrymku?
Ja suprać užyvańnia vajennych mietadaŭ i źviartacca pa vajskovuju padtrymku nie budu. Viarnusia va Ukrainu tady, kali budzie harantavana biaśpieka mnie i majoj siamji.
Pytańnie UNIAN: Jak vy ŭsio-taki papali na terytoryju Rasijskaj Fiederacyi? Ci sustrakalisia vy z Pucinym?
U Rasiju ja papaŭ dziakujučy patryjatyčna nastrojenym aficeram, jakija vykanali svoj abaviazak i dapamahli mnie zachavać žyćcio. Ja nie sustrakaŭsia z Pucinym, ja ź im havaryŭ pa telefonie ŭžo z terytoryi Rasii. My damovilisia ź im sustrecca, kali ŭ jaho budzie takaja mahčymaść.
Pytańnie: Russia Today. Ci ličycie Vy, što z pahadnieńniem vam padmanuli?
Mianie nie prosta padmanuli, a cynična padmanuli i padmanuli ŭvieś ukrainski narod. I ja b chacieŭ pačuć adkaz ad tych padpisantaŭ, jakija pracavali. Treba sustrakacca i abmiarkoŭvać.
Pytańnie: Što dumajecie pra zajavy Partyi rehijonaŭ?
Ja ich nie asudžaju, bo zajavy robiacca pad dułami aŭtamataŭ, palili ich damy. Spadziajusia, što ciapierašniaja ŭłada, tak zvanaja ŭłada, apomnicca i spynić toje, što robicca ŭ krainie.
Pytańnie: Z čym źviazany pieraddefołtny stan Ukrainy? I ci Vy płanujecie ŭziać udzieł u vybarach Ukrainy?
Nivodzin ekśpiert nie budzie admaŭlać, što hety stan źjaviŭsia paśla taho, jak u krainie pačałasia destabilizacyja situacyi i Ukraina straciła takoha važnaha partniora jak Rasii. My płacili rehularna zarobki i piensii i źbiralisia ich pavyšać. My davali harantyi, što prahramy raźvićcia buduć vykananyja. My rychtavalisia da vybaraŭ 2015 hoda i hatovyja byli zrabić usio, kab pierakanać ukrainski narod, što lepš žyć u krainie, jakaja maje patencyjał raźvićcia. Zaraz ja ŭskładaju poŭnuju adkaznaść na tych, chto pryvioŭ našu krainu da poŭnaha kryzisu, chaosu i katastrofy, i na tych, chto imi kamanduje na Majdanie, bačnych i niabačnych.
Vybary 25 maja ja liču niezakonnymi i brać u ich udziełu nie budu.
Pytańnie: Vy skazali, što ŭkrainski narod Vam zdradziŭ. Na jakija siły Vy dumajecie abapiracca? (Mikrafony ŭ zale pa-raniejšamu kiepska pracujuć, faniać, i ŭ vyniku Janukovič niedačuvaje pytańniaŭ ci robić vyhlad, što nie čuje).
Pytańnie: A jak vy budziecie zmahacca za budučyniu Ukrainy?
Jak tolki buduć harantyi biaśpieki, ja adrazu viarnusia va Ukrainu. Toje pahadnieńnie, jakoje my padpisvali, nie było vykananaje. Tut Zachad pavinien uziać adkaznaść na siabie.
Pytańnie pra aryšt rachunkaŭ u šviejcarskich bankach. Viadučy chutčej-chutčej abryvaje pytańnie
Janukovič: «U Kijevie tvorycca teror i biezuładździe, i ludzi ad hetaha pakutujuć. I ja chaču źviarnucca da ŭdzielnikaŭ biespradziełu, jaki robicca ŭ krainie. Spynicie jaho, jašče nie pozna viarnucca, razam z vašymi patronami z Zachadu». A pra rachunki ničoha nie skazaŭ.
Pytańnie ad «Komsomolskoj pravdy». Pierad narodam vy prabačylisia, a pierad «Bierkutam» nie chočacie?
Adkaz: Ja prabačajusia pierad imi, mužnymi ludźmi, jakija biaźvinna pakutavali, jakich palivali kaktejlami Mołatava.
Pytańnie: Što dumajecie pra vyzvaleńnie Julii Cimašenki?
Adkaz: Jaje sudziŭ sud, u turmie jana znachodziłasia ŭ davoli dobrych umovach. Jaje palityčnuju budučyniu vyznačyć narod Ukrainy. Što da vyzvaleńnia jaje, to było pryniata takoje rašeńnie. (Jon havoryć tak, što jasna, jon prymaje novuju ŭładu jak dadzienaść.) Ale toje pahadnieńnie, jakoje jana padpisała z Rasijaj, pryniesła Ukrainie 20 miljardaŭ dalaraŭ strataŭ.
Pytańnie «Echa Maskvy»: U Vas niama ni aparata, ni siłvych struktur, ni mahčymaści viarnucca na Radzimu? Čym Vy možacie paćvierdzić, što Vy realny prezident Ukrainy?
Adkaz: Ja zakonaŭ, jakija byli hvałtoŭnym šlacham pryniaty ŭ parłamiencie, ja nie padpisaŭ, a tamu jany nie ŭvajšli ŭ siłu. Heta jurydyčny fakt. Kali dziejny prezident nie padaŭ u adstaŭku i jamu nie byŭ abvieščany impičmient, jon zastajecca dziejnym prezidentam. Impičmient, jaki byŭ abjaŭleny, ja nie pryznaju.
Pytańnie: Jak Rasija moža paŭpłyvać
Adkaz: Ukraina — naš stratehičny partnior (ahavaryŭsia, tak i skazaŭ). Ja liču, što Rasija pavinna i abaviazana dziejničać i, viedajučy charaktar Uładzimira Uładzimiraviča Pucina, ja ździŭlajusia, čamu jon tak dahetul maŭčyć.
Pytańnie ad Rasii-24: Ci była ŭ Vas sustreča z Pravym siektaram i ci škadujecie Vy pra pieramovy?
Adkaz: Aficyjnyja pieramovy ŭ nas byli z aficyjnymi lidarami apazicyi, a nieaficyjnyja byli skiravanyja na ŭrehulavańnie situacyi. Nijakaja ŭłada nie vartaja pralitaj kryvi. Ja nikoli nie addavaŭ nijakaj zahadaŭ milicyi stralać da samaha apošniaha momantu, kali im była pahroza śmierci, kali ŭ ich stali stralać i napady na jaje nabyli masiravany charaktar. Na žal, ja ŭspaminaju 2004 hod, kali była anałahičnaja situacyja i kala 40 tysiač ludziej pryjechali i byli na vakzale. Ja pajechaŭ na čyhunačny vakzał i spyniŭ ludziej ad pralicia kryvi, ja razmaŭlaŭ sa starejšymi i ja skazaŭ im, što vašy maci i žonki nie darujuć nam, kali buduć śmierci i pralijecca kroŭ.
Pytańnie (u zale šum, abureńnie) ad Doždia: Kali budzie rasśledavańnie ŭ Haahu, ci hatovyja Vy zdacca, i što nakont pryznańnia Rasijaj Vaša lehitymnaści?
Adkaz: Što datyčyć Haahi, to spačatku musićbyć niezaležnaje rasśledavańnie z udziełam Rady Jeŭropy, i tolki paśla možna budzie havaryć pra niejkija sudy. Projdzie čas, i praŭda pieramoža, i jaje buduć viedać usie. A pakul idzie žudasnaje teatralizavanaje vidovišča z udziełam bajevikoŭ. Niama bolš zacikaŭlenaha čałavieka, čym ja maja kamanda kab usio skončyłasia mirna. Napeŭna, heta scenar pisaŭsia nie va Ukrainie.
Pytańnie: (nie čuvać)
Pytańnie ad Rojterz: Ci atrymali Vy paćviardžeńnie ad Pucina taho, što jon pryznaje Vas prezidentam? Jakich dziejańniaŭ Rasii Vy čakajecie?
Adkaz: Jašče raz paŭtaraju, što ja zakonnaabrany prezident Ukrainy, abrany na demakratyčnych vybarach. Sustrečy z Pucinym u nas nie było. Jak tolki budzie takaja sustreča, ja zrazumieju jaho pazicyju, i tady buduć adkazy na hetyja pytańni.
Davać Rasii parady mnie było b niekarektna, ale Rasii nielha stajać ubaku ŭ vypadku takoha vialikaha susieda. Rasija pavinna zrabić usio, što ŭ jaje mahčymaściach, kab praduchilić toj chaos i teror, jakija mohuć być va Ukrainie. Ale ja kateharyčna suprać uvarvańnia va Ukrainu i parušeńnia jaje terytaryjalnaj cełasnaściu.
Pytańnie: Ci mahli b prakamientavać infarmacyju, što rasijskija vajskoŭcy biez znakaŭ adroźnieńnia ŭžo znachodziacca va Ukrainie.
Adkaz: Infarmacyi pra rasijski śpiecnaz było šmat, i mianie joj pałochała. Ale dakładnaj infarmacyi i tady nie było, i ciapier niama. Što da ŭschodu Ukrainy, to ja dobra razumieju mientalitet hetaha narodu. Pakul jany pracujuć i zaniatyja i atrymlivajuć zarpatu, jany najchutčej nikudy nie pojduć. Ale jak tolki spyniacca zavody, padymiecca Uschodniaja Ukraina i Danbas i tady ja nikomu nie zajzdrošču, chto papadzie pad hetuju ruku.
Pytańnie: Pra Mižhorje, poni i sabačak, ale dakładna nie čuvać.
Adkaz: Ja źjaŭlajusia ŭłaśnikam doma 627 mietraŭ u Mižhorje. Z taho momantu, kali na mianie byŭ zamach u haścinicy «Nacyjanalnaja», ja tam znachodžusia. Byli ŭkazy prezidentaŭ Kučmy i Juščanki pra pieradaču mnie hetaha doma. Jon vielmi stary, jaho tre było ramantavać. Ja jaho adramantavaŭ. I ŭ vyniku mianie paprasili vykupić jaho. Ja jaho kupiŭ za hrošy, jakija ŭ mianie byli zadekłaravanyja. Za 3,2 miljona dalaraŭ. Usio astatniaje, što tam jość, nie naležyć mnie. Ja ich arandavaŭ, kab vykonvać funkcyi kiraŭnika dziaržavy. Usio, što tam pakazvali, heta pryhožyja karcinki. Jość realnyja ŭłaśniki, hetaja ŭłasnaść nie źjaŭlajecca ŭkrainskaj. Usie razmovy, što moj staršy syn ułaśnik, hetaha nikoli nie było, ja hetaha nikoli nie čuŭ. Usie pryhožyja karcinki — heta ŭsio było zroblena dla majoj dyskredytacyi. U mianie nie było nikoli nijakaj ułasnaści i rachunkaŭ za miažoj Ukrainy. Heta ŭsio pusty zvon.
Viadučy pres-kanfierencyi Husman kaža, što na ŭsie pytańni adkazy atrymali i daje zaklučnaje słova Janukoviču.
«Apomniciesia i spynicie hetyja biasčynstvy, budziecie za heta nieści adkaznaść. Sydzicie i nie dapuskajcie jašče bolšaha biezzakońnia i hora ŭkrainskamu narodu.
I jašče. Pieršaje, chaču paprasić prabačeńnia va ŭsich, chto paciarpieŭ i cierpić. Druhoje, ja budu rabić usio, kab być z narodam Ukrainy, nie z padonkami hetymi, nacyjanalistami i banderaŭcami, a z narodam Ukrainy. Kali b ja byŭ va Ukrainie, ja b sustreŭsia z kožnaj siamjoj, pa kožny bok barykad. Ale praŭda abaviazkova pieramoža».
Niepierakanaŭča, błytana havaryŭ Janukovič. Pafasna i biez kankretyki.
Ciapier čytajuć
U dakumientach pa «spravie Epštejna» znajšli ślady bujnych hrašovych pieravodaŭ u Minsk. Znoŭ uspłyło imia Karyny Šulak44
Kamientary