Staršynioj AHP na čarhovy termin pieraabrany Anatol Labiedźka, atrymaŭšy 80% hałasoŭ

Staršynioj Abjadnanaj hramadzianskaj partyi na novy termin pieraabrany Anatol Labiedźka.

Adpaviednaje rašeńnie pryniali delehaty 16-ha spravazdačna-vybarčaha źjezda partyi, jaki prachodzić 31 maja ŭ Minsku.

Hałasavańnie pa vybarach staršyni AHP adbyłosia na biezalternatyŭnaj asnovie.

Akramia dziejučaha kiraŭnika Anatola Labiedźki prapanoŭvalisia kandydatury Alaksandra Dabravolskaha, Vasila Palakova, Hienadzia Anańjeva, Siarhieja Bałykina, ale ŭsie jany ŭziali samaadvody. U vyniku adzinym pretendentam na pasadu staršyni AHP staŭ Anatol Labiedźka.

Usiaho ŭ tajemnym hałasavańni brali ŭdzieł 127 čałaviek. Za Labiedźku prahałasavali 102 delehaty, suprać — 22, try biuleteni byli pryznanyja niesapraŭdnymi.

«Na moj pohlad, vybary staršyni AHP našmat bolš cyničnaja pracedura, čym, naprykład, vybary prezidenta Biełarusi, — prakamientavaŭ rašeńnie ab źniaćci svajoj kandydatury na vybarach Siarhiej Bałykin. —

Navat Łukašenka nie dazvalaje sabie biezalternatyŭnych vybaraŭ, u toj čas jak u biuleteniach AHP značyłasia tolki adna kandydatura.

Bolš za toje, kali litaralna praz paru chvilin paśla źniaćcia svajoj kandydatury ja vyjšaŭ u faje atrymlivać vybarčy biuleteń, patrebnaja kolkaść biuleteniaŭ ŭžo było nadrukavanaja z adnym proźviščam. Ja sumniavajusia, što za taki karotki termin ich paśpieli vyrabić».

Bałykin zajaviŭ, što, kali ŭładu abvinavačvajuć u falsifikacyi na vybarčych učastkach, to ŭ AHP sielekcyja adbyvajecca na etapie adboru delehataŭ źjezda.

«Pieramahčy, vyskačyŭšy jak čort z tabakierki na partyjnym źjeździe całkam nierealna. Tamu ja nie pažadaŭ stać dekaratyŭnym sparynh-partnioram niaźmiennaha kiraŭnika AHP, pakinuŭšy za im prava adnamu hulać va ŭłasnaj piasočnicy», — skazaŭ na zakančeńnie Bałykin.

Anatol Labiedźka taksama budzie pradstaŭlać AHP na prezidenckich vybarach 2015 hoda.

Napiaredadni źjezdu AHP na rehijanalnych kanfierencyjach arhanizavała unutrypartyjnyja prajmieryz — hałasavańnie za pradstaŭnikoŭ partyi, jakija mohuć pryniać udzieł u prezidenckich vybarach. Śpisy dla hałasavańnia byli adkrytymi, u ich byli ŭklučanyja 33 proźviščy.

Pa vynikach hałasavańnia najbolšuju kolkaść hałasoŭ nabrali Alaksandr Dabravolski (kiraŭnik ekśpiertnaj kamisii), Anatol Labiedźka i Vasil Palakoŭ (namieśnik staršyni).

Płanavałasia, što hałasavańnie na źjeździe adbudziecca pa ŭsich troch kandydatach. Adnak było vyrašana, što partyjnym pretendentam na ŭdzieł u prezidenckich vybarach maje stać lidar arhanizacyi.

Labiedźka budzie ŭdzielničać u jakaści pretendenta ad AHP u pracedury vybaraŭ adzinaha kandydata ŭ prezidenty ad demakratyčnych sił albo, kali damoŭlenaści pa pracedury dasiahnuta nie budzie, — u jakaści kandydata ŭ prezidenty ad AHP.

Raniej Labiedźka užo ŭdzielničaŭ u pracedury abrańnia adzinaha kandydata ad demakratyčnych sił na prezidenckich vybarach 2006 hoda.

Adnak z roźnicaj mienš za dziesiać hałasoŭ prajhraŭ lidaru ruchu «Za Svabodu» Alaksandru Milinkieviču.

• 0
• 0
• 0
• 0
• 0
• 0
• 0
• 0