Plan‑2008: Ivaškievič choča frakcyju ŭ parlamencie, a Michalevič — być va ŭradzie

U Viciebsku adbyłosia pasiedžańnie Upravy Partyi BNF. Udzieł u im uziali i pretendenty na pasadu staršyni partyi, jakoha buduć abirać na jejnym źjeździe 8‑9 śniežnia: ciapierašni kiraŭnik Vincuk Viačorka i dva jahonyja namieśniki Viktar Ivaškievič i Aleś Michalevič.

Viktar Ivaškievič vykazaŭ spadziavańnie, što va ŭmovach palityčnaha i ekanamičnaha cisku z boku ES na biełaruskija ŭłady atrymajecca pravieści bolš‑mienš svabodnyja parłamienckija vybary, pieramahčy ŭ niekalkich akruhach i stvaryć frakcyju BNF u Pałacie pradstaŭnikoŭ.

Aleś Michalevič bačyć budučyniu BNF u mahčymaści abjadnać vakoł partyi ŭsie nacyjanalnyja niezaležnickija siły, najbolš pratestna‑aktyŭny elektarat, a taksama pryciahnuć da šyrokaha supracoŭnictva ruch «Za Svabodu». Staŭku treba rabić, ličyć Michalevič, na tych, chto zdolny vyjści na Płošču: niezadavolenych pradprymalnikaŭ, jakich čakaje vielmi składany hod, na viernikaŭ roznych kanfiesijaŭ, pradstaŭnikoŭ aktyŭnych maładziovych arhanizacyjaŭ i pracoŭnych vialikich pradpryjemstvaŭ:

— Ja ŭpeŭnieny: usie pabačać, što Biełaruski Narodny Front u chutkim časie pryjdzie da ŭłady. Spadziajusia, što da 2009 hoda ŭklučna dakładna Biełaruski Narodny Front stanie kirujučaj uradavaj partyjaj.

Vincuk Viačorka nastupny hod (partyi spoŭnicca, darečy, 20 hod) taksama ličyć dla raźvićcia BNF vyrašalnym:

— Ja staŭlu pierad saboj, pierad adnadumcami metu viarnuć Frontu liderstva ŭ idejach i spravach, u biełaruskim palityčnym žyćci. My, jak siła niezaležnickaja, nacyjanalna‑demakratyčnaja, jakraz i abaviazany ciapier idejnuju inycyjatyvu ŭziać u svaje ruki. Tamu što balšynia biełaruskaha narodu narešcie zrazumieła kaštoŭnaść niezaležnaści, a značyć, toje, što raniej było našym minusam — nas jarłykavali ŭsialak, ciapier stanovicca našym plusam.

Hałoŭnyja akcyi, na dumku palityka, pavinnyja prajści pad łozunham niezaležnaj Biełarusi i ŭ rečyščy 90‑sta hadovaha jubileju Biełaruskaj Narodnaj Respubliki, bo mienavita ź jaje pačynałasia niezaležnaść. Tamu i treba źjadnacca ŭsim na masavych akcyjach pad bieł‑čyrvona‑biełymi ściahami. Situacyja ŭ krainie budzie hetamu spryjać. Asablivuju ŭvahu, ličyć Viačorka, treba nadavać moładzi, jakaja zaraz masava idzie ŭ BNF. Ale dla pracy z moładziu patrebny sučasnyja mietady. Treba pierachodzić, padkreśliŭ staršynia Partyi BNF, ad «viertykalnaj» pracy na «haryzantalnuju», sietkavaje pakryćcio ideałahična blizkaha elektaratu.

Viačorka ŭchvaliŭ viartańnie da pracy ŭ kaalicyi pradstaŭnikoŭ ruchu «Za svabodu», jakija zastajucca bližejšymi pa duchu paplečnikami.

Alena Hryniavickaja, Radyjo Racyja

• 0
• 0
• 0
• 0
• 0
• 0
• 0
• 0