Siońnia ŭstupajuć u siłu niekatoryja pałažeńni zakona «Ab uniasieńni źmianieńniaŭ i dapaŭnieńniaŭ u niekatoryja zakony Respubliki Biełaruś pa pytańniach biaśpieki darožnaha ruchu».
U pryvatnaści, papraŭki datyčacca pieravyšeńnia chutkaści, zafiksavanaha aŭtamatyčnymi pryborami. Kali kiroŭca pieravysiŭ chutkasny režym na 10—20 km/h, nakładajecca štraf 0,5 bazavaj vieličyni (adna bazavaja vieličynia ciapier składaje Br150 tys.), na 20-30 km/h — 2 bazavyja, na 30-40 km/h — 4, zvyš 40 km/h — 6.
Pry hetym kali parušeńnie zafiksavana mienavita aŭtamatyčnaj kamieraj, to pryncyp paŭtornaści pry nakładańni štrafu nie dziejničaje.
Akramia taho, za nievykanańnie patrabavańnia supracoŭnika milicyi ab spynieńni transpartnaha srodku — štraf ad 2 da 8 bazavych vieličyń, a za nieadnarazovaje nievykanańnie takich — ad 3 da 10 bazavych vieličyń abo pazbaŭleńnie pravoŭ terminam da 6 miesiacaŭ.
Za dziejańni, što pryviali da pieraśledu supracoŭnikami milicyi, — ad 5 da 20 bazavych vieličyń z pazbaŭleńniem pravoŭ na dva hady (abo biez pazbaŭleńnia).
Taksama papraŭki praduhledžvajuć uviadzieńnie aŭtamatyčnaj fotafiksacyi parušeńniaŭ pravił parkoŭki.
Jak paviedamlaŭ raniej načalnik DAI Minska Dźmitryj Karziuk, niekalki takich pryboraŭ užo teścirujucca ŭ stalicy. Jon taksama adznačyŭ, što zakon daje darožnaj milicyi try miesiacy na toje, kab padrychtavacca technična da zapusku fotafiksacyi parušeńniaŭ pravił parkoŭki. Faktyčna heta sistema pavinna pačać pracavać u kastryčniku 2014 hoda.
Za parušeńnie pravił parkoŭki abo niepravamiernuju parkoŭku na miescy dla invalidaŭ, zafiksavanyja aŭtamatyčnymi kamierami, budzie nakładacca štraf 1 bazavaja, a dla vielikahruznaj techniki — 3 bazavyja vieličyni.
Ciapier čytajuć
Načalnik milicyi Brahina stralaŭ u svaju žonku. Jana cudam vyžyła10
Kamientary