Pientahon razhladaje mahčymaść dapamohi Kijevu ŭ źniščeńni rakietnych kompleksaŭ sieparatystaŭ

Pentahon i vyviedka ZŠA raspracoŭvajuć plany, jakija dazvolać administracyi Baraka Abamy paviedamlać ukrainskamu ŭradu ab kankretnym miescaznachodžańni rakietnych kompleksaŭ «ziamla-pavietra» separatystaŭ va ŭschodniaj Ukrainie, kab ukraincy mahli źniščać hetyja ŭstanoŭki.

Pakul što, adnak, jak śćviardžaje The New York Times sa spasyłkaj na ananimnych amerykanskich čynoŭnikaŭ, hetaja prapanova nie vynosiłasia na abmierkavańnie ŭ Biełym domie.

Raniej Barak Abama ŭchvaliŭ pieradaču amerykanskaj vyviednaj infarmacyi Ŭkrainie ŭ abmiežavanych maštabach. Pakul niajasna, ci prezydent ZŠA pahodzicca na pierasyłku bolš vyraznaj infarmacyi ŭkraincam ab patencyjnych mišeniach.

«Hety krok aznačaŭ by bolš hłybokaje ŭciahvańnie ZŠA ŭ kanflikt», — tłumačyć hazeta.

Pavodle krynicaŭ infarmacyi hazety, u centry abmierkavańnia ŭ amerykanskich vajskovych i vyviednych kołach znachodzicca pytańnie ab tym, jakaja pavinna być meta ZŠA — «prosta padtrymać ukrainski ŭrad, jaki nie paśpiavaje ačuńvać ad atakaŭ separatystaŭ, ci padać suvory syhnał Pucinu, aktyŭna dapamahajučy Ŭkrainie nanosić udary pa rakietnych ustanoŭkach, jakija pastaviła Rasieja». «Za apošnija 10 dzion hetyja ŭstanoŭki źbili nia mienš za 5 samalotaŭ, u tym liku małajzijski avijałajner», — pišuć žurnalisty The New York Times Dejvid Sendžer i Eryk Šmit.

Administracyja Abamy ŭžo dzielicca z ukrainskaj bokam spadarožnikavymi fota i inšymi dokazami ruchaŭ vojskaŭ i techniki pablizu ŭkrainska-rasiejskaj miažy.

Ale adzin vysokapastaŭleny supracoŭnik administracyi ZŠA skazaŭ hazecie, što takija dadzienyja, atrymanyja niekalki hadzin ci navat niekalki dzion raniej, niedastatkova śviežyja, kab vykarystoŭvać ich pry atakach na separatystaŭ.

Prapanova davać ŭkrainskamu boku infarmacyju ŭ realnym časie «pakul nie dajšła da prezydenta», dadaŭ zhadany čynoŭnik. Adna z pryčyn, pavodle hazety — u tym, što Bieły dom byŭ zaniaty inšymi spravami: jon pierakonvaŭ eŭrapiejskich sajuźnikaŭ ŭvieści žorstkija ekanamičnyja sankcyi suprać Maskvy, a taksama damahaŭsia, kab na miesca krušeńnia małajzijskaha łajnera dapuścili mižnarodnych inspektaraŭ.

Kiraŭniki Pentahonu adnaznačna ŭchvalajuć plany pieradačy bolš karysnych vyviednych źviestak Ukrainie.

«Hetyja plany ŭ cełym upišucca ŭ źniešniepalityčnuju daktrynu Abamy, jakaja składvajecca ciapier. Jaje ideja — dapamahać sajuźnikam i krainam-partneram z abaronaj ich terytoryi bieź niepasrednaha ŭdziełu amerykanskich vajskoŭcaŭ», — havorycca ŭ artykule.

• 0
• 0
• 0
• 0
• 0
• 0
• 0
• 0