Zoaabaroncy paŭtorna źviernucca va ŭrad z prośbaj uvieści kryminalnuju adkaznaść za žorstkaje abychodžańnie z žyviołami

Šerah zoaabarončych arhanizacyj Biełarusi («Zaaśviet», «Ehida», «Abaronim žyćcio», «Abarona žyvioł», «Siabry žyvioł» i inšyja) majuć namier paŭtorna źviarnucca va ŭrad z prośbaj ab uviadzieńni kryminalnaj adkaznaści za žorstkaje abychodžańnie z žyviołami, paviedamiła staršynia HAAŽ «Zaaśviet» Marharyta Puškievič. 

Nahadajem, u Biełarusi dziejničaje tolki administracyjnaja adkaznaść za žorstkaje abychodžańnie z žyviołami, jakaja praduhledžvaje štraf ad 10 da 30 bazavych vieličyń abo administracyjny aryšt. Prapanova hramadzian ab uzmacnieńni adkaznaści ŭ lutym hetaha hoda była padtrymanaja Hienieralnaj prakuraturaj. Viedamstva ŭzhadniła redakcyju art. 339-1 Kryminalnaha kodeksa (žorstkaje abychodžańnie z žyviołami) i padtrymała prapanovu ab nadzialeńni słužbovych asob MUS pravam składać pratakoły na padstavie art. 15.45 KoAP. 

Adnak hetaja inicyjatyva dahetul nie realizavanaja. «Pakul voz i ciapier tam, i našy arhanizacyi źbirajucca znoŭ źviartacca va ŭrad z pytańniem, kali ž narešcie źjavicca chacia b kryminalny artykuł», — adznačyła Puškievič. 

Pavodle jaje słoŭ, kolkaść biazdomnych žyvioł u Biełarusi štohod pavialičvajecca prykładna na tysiaču asobinaŭ. «Za minuły hod było adłoŭlena i źniščana 72 tysiačy biazdomnych žyviolin, a 10 hadoŭ tamu ich źniščałasia 65 tysiač», — skazała jana. 

Puškievič ličyć, što rost kolkaści biazdomnych žyvioł u krainie śviedčyć pra nieefiektyŭnaść isnaj palityki ŭ dačynieńni da ich. «Pryrodaj naładžana tak, što kali źniščajecca žyviolina, naradžajucca ŭ asnoŭnym asobiny žanočaha połu. Naprykład, naradžajecca 12 ščaniat, ź ich 10 — žanočaha połu. Pryroda reahuje tak, kryčyć: zabivać nielha», — adznačyła zoaabaronca. 

Źmianić situacyju, na jaje dumku, možna ŭviadzieńniem licenzavańnia na raźviadzieńnie parodzistych žyvioł i sterylizacyjaj biesparodnych. «Ale dla hetaha treba, kab dziaržava prajaviła svaju palityčnuju volu i prymusiła heta rabić. Ludzi sami pa sabie heta rabić nie buduć», — ličyć Puškievič. 

U toj ža čas jana adznačaje, što apošnimi hadami «adbyŭsia zruch» u staŭleńni nasielnictva da biazdomnych žyvioł. «My miarkujem ab hetym navat pa tym, jak ludzi čakajuć i pytajucca ŭ našaj haziety («Druźja životnych»), jak pišuć nam. Navat ź viosak ludzi pišuć nam pra žorstkaje abychodžańnie z žyviołami. Dziesiać hadoŭ tamu takoha i blizka nie było, kab chtości z hłuchoj vioski dasłaŭ nam takuju zajavu. My zajmajemsia hetymi zajavami, i ŭsio-taki niekalki čałaviek za hod atrymlivajuć administracyjnaje pakarańnie», — adznačyła jana. 

U Biełarusi ŭžo bolš za 10 hadoŭ nie mohuć pryniać zakon ab abaronie žyvioł: parłamient rabiŭ try sproby, adnak va ŭsich vypadkach zakonaprajekty byli adklikanyja z-za rezkaj krytyki hramadskaści. Pradstaŭniki zoaabarončych arhanizacyj nieadnarazova zajaŭlali, što prapanavanyja prajekty zakona nie zabiaśpiečvajuć abaronu žyvioł ad žorstkaha abychodžańnia. 

16 žniŭnia adznačajecca Dzień biazdomnych žyvioł, zasnavany ŭ 1992 hodzie ź inicyjatyvy Mižnarodnaha tavarystva pravoŭ žyvioł (ZŠA). U hety dzień u roznych krainach pryniata naviedvać prytułki dla biazdomnych žyvioł, kab dapamahčy im abo vybrać sabie hadavanca. 

U Biełarusi hety dzień adznačajuć roznymi akcyjami, meta jakich — uładkavać biazdomnych žyvioł i pryciahnuć uvahu hramadskaści da hetaj prablemy. U pryvatnaści HAAŽ «Ehida» z 13.00 da 17.00 pravodzić u minskim parku imia 50-hodździa Kastryčnika akcyju pa razdačy biazdomnych žyvioł «Davaj dapamožam!»

• 0
• 0
• 0
• 0
• 0
• 0
• 0
• 0