Biełaruś prapanoŭvaje polskamu biźniesu inviestavać u SP pa vytvorčaści i pierapracoŭcy sielhaspradukcyi

Biełaruś prapanoŭvaje polskamu biźniesu stvarać sumiesnyja pradpryjemstvy pa vytvorčaści i pierapracoŭcy pradukcyi žyviołahadoŭli i raślinavodstva z nastupnaj realizacyjaj hatovaj pradukcyi na rynku Mytnaha sajuza,

paviedamiŭ namieśnik ministra sielskaj haspadarki i charčavańnia Uładzimir Hrakun 9 vieraśnia ŭ Minsku padčas pieramoŭ z polskimi biźniesmienami. 

U sustrečy ŭdzielničali pradstaŭniki Minsielhascharča, kancerna «Biełdziaržcharčpram», bolš jak 30 pierapracoŭčych pradpryjemstvaŭ Biełarusi, a taksama bolš jak 10 polskich sadavodčych kampanij. 

Padčas pieramoŭ biełaruski bok prapanavaŭ polskim biźniesmienam nie tolki pastaŭlać syravinu na biełaruskija pierapracoŭčyja pradpryjemstvy dla jaje nastupnaj pierapracoŭki, vyrabu hatovaj pradukcyi i ekspartu na źniešnija rynki, ale i ŭkładvać hrošy ŭ madernizacyju ŭžo isnych i stvareńnie novych pradpryjemstvaŭ. Akramia taho, biełarusy prapanavali polskim inviestaram stvaryć sumiesnyja pradpryjemstvy abo kuplać užo najaŭnyja całkam. 

Jak padkreśliŭ načalnik hałoŭnaha ŭpraŭleńnia źniešnieekanamičnaj dziejnaści Minsielhascharča Alaksiej Bahdanaŭ, va ŭmovach rasijskaha charčovaha embarha biełaruskija i polskija pradpryjemstvy «pavinny znajści najbolš chutkija šlachi vyrašeńnia», kab zapoŭnić nišu, što ŭtvaryłasia na rasijskim rynku. 

Nahadajem, 6 žniŭnia prezident RF Uładzimir Pucin padpisaŭ ukaz, jaki zabaraniaje ŭvoz u Rasiju charčavańnia ź ES, ZŠA, Kanady, Japonii i Aŭstralii. Hetaje rašeńnie stała adkazam na zachodnija sankcyi ŭ dačynieńni da rasijskich čynoŭnikaŭ i arhanizacyj. U śpis zabaronienych tavaraŭ trapili jałavičyna, śvinina, ptuška, sadavina, aharodnina, syry i małočnaja pradukcyja, arechi i inšyja pradukty. 

24 žniŭnia ministr sielskaj haspadarki i raźvićcia vioski Polščy Marak Savicki zajaviŭ, što polski bok hatovy abmiarkoŭvać ź biełarusami stvareńnie sumiesnych pradpryjemstvaŭ. 

«Biełaruski bok pastaviŭ pierad nami peŭnyja ŭmovy — uvachodzić u Biełaruś nie prosta sa svaim tavaram, pierapradavać jaho nichto nie budzie, a sa svaimi inviestycyjami i technałohijami», — skazaŭ polski ministr.

• 0
• 0
• 0
• 0
• 0
• 0