Syn Piatkievič viarnuŭsia z ZŠA, zajmajecca kansultacyjami pa kryptavalucie. I zaadno padpracoŭvaje stažoram u BDU
Filip Piatkievič, syn ad pieršaha šlubu samaj upłyvovaj žančyny Biełarusi, vučyŭsia ŭ Štatach, ale sprabuje prabić sabie darohu ŭ Biełarusi.
Filipu Piatkieviču 27 hadoŭ. Jon syn pieršaj namieśnicy kiraŭnika Administracyi Łukašenki Natalli Piatkievič i byłoha kiraŭnika Nacyjanalnych spartyŭnych łatarej Uładzisłava Piatkieviča. Možna śmieła kazać, što chłopiec — pradstaŭnik biełaruskaj załatoj moładzi, jaho žyćcio pačynałasia pry vydatnych startavych danych — bahatyja i ŭpłyvovyja baćki, zajzdrosnyja miescy vučoby.
Filip skončyŭ elitny Licej BDU, bakałaŭra atrymaŭ na jurydyčnym fakultecie BDU (z adznakaj), a mahistra prava (taksama z adznakaj) — u choć i nie samym prestyžnym, ale ŭsio ž ńju-jorkskim Fordham University, kudy chłopiec razam z mamaj pierabraŭsia da druhoha pa liku svajho ajčyma — dypłamata Valancina Rybakova.
Natalla Piatkievič praz šeść hadoŭ žyćcia ŭ Štatach viarnułasia ŭ Minsk, va ŭładu. A jak tym časam składvajecca los syna-vunderkinda? Ci ŭdałosia jamu začapicca ŭ Štatach?
Filipu pa rodzie prafiesii treba być publičnym i padkreślivać svaju kampietentnaść — heta asnova vyžyvańnia jurysta. Chłopiec hetym i zajmajecca. Pa mnostvie publikacyj u internecie možna adsačyć trajektoryju jaho losu.
Paśla zakančeńnia mahistratury ŭ Ńju-Jorku, sa žniŭnia 2019 pa krasavik 2020-ha Filip, miarkujučy pa jahonaj staroncy ŭ Linkedin, pracavaŭ stažoram (associate attorney) u adnoj ź jurydyčnych praktyk Ńju-Jorka.
Paśla hetaha chłopiec raźvitaŭsia sa Štatami.
Sa žniŭnia 2020 pa červień 2022 miescam pracy Filipa Piatkieviča paznačana litoŭskaja jurydyčnaja kampanija Sorainen, aktyŭnaja ŭ krainach Bałtyi i Biełarusi. Filip pakinuŭ adznaku, što pracavaŭ on-site — na miescy, na pasadzie — associate. Inšymi słovami, znoŭ byŭ pamočnikam u darosłych.
Vierahodna, hety čas jon pravioŭ u Minsku. Tamu što ŭ pieryjad 2021-2022 hoda prachodziŭ kursy pavyšeńnia kvalifikacyi pry biełaruskim Ministerstvie finansaŭ adrazu pa troch prahramach: «Karparatyŭnaje kiravańnie. Vypusk i raźmiaščeńnie kaštoŭnych papier», «Prafiesijnaja i biržavaja dziejnaść pa kaštoŭnych papierach u Respublicy Biełaruś» i «Padatkovaje kansultavańnie arhanizacyj, indyvidualnych pradprymalnikaŭ i fizičnych asobaŭ».
Ź leta 2022 chłopiec znoŭ źmianiŭ rabotu i pajšoŭ u najm da ruskich jurystaŭ u kampaniju treciaha ešałonu «Buzko Krasnov». Źjaŭlajecca Filip partnioram abo najomnym rabotnikam — niajasna.
Svajoj śpiecyjalizacyjaj chłopiec vybraŭ ćmianuju śfieru kryptavalut i błakčejnu.
Pavodle apisańnia, Filip prapanuje klijentam kansultacyi pa rehistracyi kampanij u ZŠA, AAE i inšych jurysdykcyjach. A taksama kansultacyi pa adpaviednaści ich dziejnaści miascovamu zakanadaŭstvu.
Śfiera kampietencyj maładoha jurysta maksimalna šyrokaja: biaśpieka, vienčurnyja fondy i startapy, fintech, karparatyŭnaje prava, źlićcio i pahłynańnie biznesu, tranzakcyi.
Na staroncy chłopca paznačana, što jon pracuje ź Ńju-Jorka, ale heta naŭrad ci moža być praŭdaj — adnačasova Filip vykładaje na jurydyčnym fakultecie BDU.
Vykładčykam-stažoram jon staŭ u 2024 hodzie. Kursy Piatkieviča — «Pravavoje rehulavańnie ličbavych technałohij u haspadarčaj dziejnaści» i «Arhanizacyjna-pravavyja asnovy ličbavaj ekanomiki».
U chłopca jość nievialiki telehram-kanał, kudy jon piša svaje razvahi na finansavyja temy albo pierapracavanyja čužyja idei: jak inviestavać, jakaja budzie situacyja na rynkach, jak rašeńni palitykaŭ upłyvajuć na ekanomiku, što cikavaha ŭ kryptavalucie.
Časam siarod hetaha prabivajecca i asabistaje. Voś jak jon apisaŭ vyniki 2024 hoda: «U mianie byŭ hod aktyŭny: naviedaŭ dziasiatak krain, staŭ kiraŭnikom praktyki krypty i pierasabraŭ skład jurystaŭ u joj, pačaŭ vykładać va ŭniviery».
A što ž Štaty? Vyhladaje, što ničoha.
U internecie možna znajści dva pracesy, u jakich udzielničaŭ Filip.
U abodvuch jon razam ź inšymi jurystami pradstaŭlaŭ ruskamoŭnych zajaŭnikaŭ, adzin ź jakich chacieŭ, kab Binance razmaroziŭ jahony kryptakašalok, a druhi spadziavaŭsia viarnuć hrošy, jakija addaŭ machlaram sa skam-prajekta CryptoKG. Vyniki razhladu nieviadomyja.
«Jak by ja ni lubiŭ svaju prafiesiju, treba pryznaść, što jurysty ŭ inavacyjnych śfierach (krypta, ŠI, bijatech i kibiernietyka) vystupajuć u roli bałastu, jaki strymlivaje raźvićcio», — zrabiŭ niejak pryznańnie Filip u svaim telehram-kanale, mahčyma, u momant prafiesijnaj rospačy.
Ciapier čytajuć
Źniknieńnie śpikierki KR Anžaliki Mielnikavaj. Usio važnaje, što viadoma na hety momant19
Kamientary