Stancyja mietro «Słucki haściniec» zastaniecca. Nazva «Karžanieŭskaha» techničnaja
U redakcyju «Našaj Nivy» źviarnuŭsia čytač Jaŭhien Sudziłoŭski, jaki zaŭvažyŭ u pastanovie Savieta ministraŭ RB ad 29 kastryčnika 2014 «Ab finansavańni dziaržaŭnych prahram i mierapryjemstvaŭ u 2015 hodzie» ŭzhadku ab stancyi mietro «Karžanieŭskaha».
U płanie finansavańnia AAT «Bank raźvićcia RB» dziarprahram punktam 28 značycca «Dyrekcyja pa budaŭnictvu Minskaha mietrapalitena», a realizujemaja imi prahrama nazyvajecca «Pieršy učastak treciaj linii Minskaha mietrapalitena ad stancyi «Karžanieŭskaha» da stancyi «Jubilejnaja».
«Niaŭžo stancyi mietro pieraimienavali javačnym paradkam?» – pytajecca Jaŭhien Sudziłoŭski. Sapraŭdy, płany nazvać adnu z novych stancyj mietro «Karžanieŭskaha» byli, ale byŭ pryniaty varyjant «Słucki haściniec».
U pres-słužbie Minskaha mietro kažuć, što «stancyi mietro «Karžanieŭskaha» ŭ nas niama. Nidzie takoha nie prachodzić».
Daviałosia źviartacca da namieśnika hałoŭnaha inžyniera «Dyrekcyi pa budaŭnictvu Minskaha mietrapalitena» Dzianisa Zabałotnaha, jon i rastłumačyŭ, u čym reč.
«Heta rabočaja nazva. Jana isnavała jašče na stadyi abhruntavańnia inviestavańnia prajekta, tak zaćviardžałasia. Tamu my nie rabili nijak źmienaŭ. Pravilnyja nazvy mietro siońnia paznačanyja na schiemach u vahonach. A nazva «Karžanieŭskaha» prachodzić pa dakumientacyi jak rabočaja», — skazaŭ sp.Zabałotny.
Nie treba chvalavacca, pryhožyja biełaruskija nazvy treciaj linii Minskaha mietro nikudy nie dzielisia. Budzie i «Słucki haściniec», i «Niemaršanski sad», i «Kavalskaja Słabada».
Kamientary