Alesin pra adstaŭku Žadobina: «Patrebny čałaviek z šyrokim kruhahladam, kab dumaŭ pa-sučasnamu»
Situacyja va Ukrainie prymusić Alaksandra Łukašenku pierahledzieć kurs vajennaj palityki Biełarusi i pryznačyć na pasadu ministra abarony čałavieka «z bolš sučasnym typam myśleńnia».
Takuju dumku vykazaŭ vajenny ekśpiert Alaksandr Alesin, kamientujučy adstaŭku ministra abarony Biełarusi Juryja Žadobina.
Na dumku Alesina, adstaŭka 60-hadovaha kiraŭnika abaronnaha viedamstva jaŭna śviedčyć ab namiery Łukašenki «źmianić kurs u vajennym budaŭnictvie».
«Raźvićcio padziej va Ukrainie pakazvaje, što armiju treba madernizavać, pryčym, jak pakazvaje čas, adkładvać hetu pracu nielha. Były ministr abarony, viadoma, byŭ spraŭnym słužakam i sumlennym sałdatam, ale ŭ hetym płanie jon inicyjatyvy nie prajaŭlaŭ»,
— zaznačyŭ ekśpiert.
Pavodle jaho słoŭ, pry Žadobinie mieła miesca «stabilnaje, umieranaje raźvićcio vajennaj haliny» Biełarusi. «Realizoŭvalisia płany, pryniatyja jaho papiarednikam Leanidam Malcavym. Stała pravodzicca bolš bujnych vučeńniaŭ — tyja ž strelby na rasijskim palihonie Ašułuk. Słovam, pry im bajavaja vučoba išła, i navat była dastatkova napružanaj», — padkreśliŭ Alesin.
Ale ŭ ciapierašniaj situacyi, miarkuje jon, kiraŭniku dziaržavy ad ministra abarony patrabujecca stratehičnaje bačańnie i acenka situacyi ŭ rehijonie, vyznačeńnie aryjenciraŭ, pa jakich budzie ruchacca vajennaja palityka Biełarusi, «budzie patrebny čałaviek z šyrokim kruhahladam, kab dumaŭ pa-sučasnamu».
Na dumku ekśpierta, novamu ministru abarony daviadziecca vykonvać zadačy, jakija Łukašenka pastaviŭ pierad vajenna-pramysłovym kompleksam, a imienna: pieraŭzbroić armiju ŭ paskoranym tempie z vykarystańniem tych niamnohich resursaŭ, jakija majucca ŭ Biełarusi.
Samym vierahodnym kandydatam na pasadu ministra abarony Alesinu bačycca 49-hadovy načalnik Hienieralnaha štaba Uzbrojenych sił Biełarusi hienierał-major Aleh Biełakonieŭ.
«Uličvajučy, što Biełakonieŭ kamandavaŭ siłami śpiecyjalnych apieracyj, a zaraz prezident addaje pryjarytet raźvićciu mienavita SSA, jość vialikaja vierahodnaść taho, što mienavita jon stanie novym ministram abarony», — prahnazuje vajenny ekśpiert.
Braty-bliźniaty pryjšli pracavać u milicyju. Adzin ź ich pierapłyŭ raku i ŭciok ź Biełarusi, kab nie zajmacca palityčnymi spravami. Pahutaryli ź im6
Kamientary