Dzie i kali za miažoj adznačać Dzień Voli

97-ja ŭhodki abviaščeńnia Biełaruskaj Narodnaj Respubliki śviatkujuć 25 sakavika nie tolki ŭ Biełarusi, ale i za miažoj, paviedamlaje BiełaPAN sa spasyłkaj na Radu BNR.

Polšča

U Biełaruskim domie ŭ Varšavie projdzie cyrymonija ŭručeńnia «Nacyjanalnaj premii Chartyi'97» u śfiery abarony pravoŭ čałavieka imia Viktara Ivaškieviča za 2014 hod. Jaje łaŭreatami stali byłyja palitviaźni Vasil Parfiankoŭ i Eduard Łobaŭ, zasłužany majstar sportu Biełarusi Vital Hurkoŭ i režysior Anton Cialežnikaŭ. Paśla ŭručeńnia premii adbudziecca tvorčaja sustreča z mastakom i hramadskim dziejačam Alaksiejem Maračkinym. 

U Biełastoku ŭ kafe Zmiana Klimatu u 18:00 pačniecca kancert dziciačaha hurtu «Bałamutki» i Vinsent, jakija vystupiać ź biełaruskimi pieśniami. 

Akramia taho, Dzień Voli ŭžo adznačyli ŭ Varšavie šeściem 22 sakavika.

Litva

U Vilniusie apoŭdni na mohiłkach Rasu adbudziecca ŭskładańnie kvietak na mahiły padpisantaŭ Akta niezaležnaści BNR. U siejmie Litvy z 14:00 da 16:00 adbudziecca dyskusija «2015 hod u Biełarusi — kali hieapalityka biare vierch nad kaštoŭnaściami demakratyi» z udziełam biełaruskich i litoŭskich palitykaŭ, pravaabaroncaŭ, hramadskich dziejačaŭ i svajakoŭ palitviaźniaŭ. U 18:00 va Uzupio kavine projdzie śviatočny kancert Lavona Volskaha i Paŭła Arakielana.

Ukraina

U Kijevie śviatočnyja mierapryjemstvy pačnucca ŭ 15:00 pierad pomnikam Uładzimiru Karatkieviču kala pasolstva Biełarusi, a ŭ Čarnihavie Dzień Voli adznačać viečaram u bary «Falvarak». 

Rasija

Maskoŭskaje tavarystva biełaruskaj kultury imia F.Skaryny zaklikaje ŭsich achvotnych u 18:30 prynieści kvietki da pomnika Janku Kupału na Kutuzaŭskim praśpiekcie. Paśla ŭskładańnia kvietak adbudziecca viačera dla ŭsich, chto pažadaje.

Inšyja krainy Jeŭropy

U Brusieli na płoščy Šumana z 11:00 da 13:00 projdzie pikiet, arhanizavany Biełaruska-jeŭrapiejskim abjadnańniem.

U Prazie ŭ 12:00 adbudziecca tradycyjnaje ŭskładańnie kvietak na mahiły kiraŭnikoŭ BNR na Alšanskich mohiłkach, a viečaram u kłubie Music City Club vystupić biełaruski bard Źmicier Vajciuškievič. 

U Biełaruskim domie ŭ Łondanie ŭ 14:00 pačniecca vystupleńnie prafiesara Łundskaha ŭniviersiteta doktara histaryčnych navuk Piera Andersa Rudlinha na temu «Savieckaja biełarusizacyja: mif ci realnaść?».

***

U Minsku šeście i mitynh z nahody Dnia Voli projduć z 15:00 da 18:00. Vuličnyja śviatkavańni ŭ inšych haradach, u tym liku ŭ Viciebsku, Hrodnie, Biarozie, Lidzie, zabaronienyja. Kancert na Dzień Voli ŭ Minsku admienieny.

• 0
• 0
• 0
• 0
• 0
• 0