Bieraściejskaje «Dynama» – adzin z hałoŭnych ńjuśmiejkieraŭ sioletniaha futbolnaha mižsiezońnia. Pryčym naviny byli, skažam tak, nie samyja radasnyja. Usie futbalisty i supracoŭniki bieraściejskaha «Dynama» napisali adkryty list na imia staršyni abłvykankama Anatola Lisa, jaki tut ža raźlacieŭsia pa prastorach internetu i vyklikaŭ vialiki rezanans u spartyŭnym hramadstvie krainy.
Viadoma, ciapierašniaja finansavaja situacyja jaŭna nie spryjaje roskvitu spartyŭnych kłubaŭ, jakija źjaŭlajucca častkaj dziaržaŭnaj sistemy. Ale, kali bačyš, što abviaščajecca ŭ adkrytym liście bieraściejcaŭ, daješsia dzivu.
«Pavažany Anatol Vasiljevič! Hulcy, treniery, supracoŭniki HA FK «Dynama-Brest» źviartajucca da vas u suviazi z katastrafičnaj finansavaj situacyjaj, jakaja skłałasia ŭ našym kłubie. Prablemy ź finansavańniem ciahnucca jašče z pačatku minułaha siezonu. Za 2014 zapazyčanaści pa zarpłacie, u zaležnaści ad umoŭ pracoŭnaha pahadnieńnia abo kantrakta, składajuć ad 5 da 8 zarobkaŭ. Za biahučy 2015 zarpłaty zusim nie vypłačvalisia. Takim čynam, ahulny doŭh kłuba pierad hulcami, trenierami, supracoŭnikami składaje kala 7-10 zarobkaŭ», — voś takimi słovami pačynajecca list.
I nie pryhadaju, ci byli padobnyja vypadki ŭ najnoŭšaj biełaruskaj futbolnaj historyi. Kamanda z abłasnoha centru, jakaja stabilna vystupaje ŭ vyšejšaj lizie i źjaŭlajecca pry hetym prosta kanviejeram pa pastaŭcy jakasnych hulcoŭ, ciapier znachodzicca na samym krai finansavaj prorvy.
Da taho ž, niekalki miesiacaŭ tamu ŭ kłub pryjšoŭ novy kiraŭnik, jaki raniej ŭžo pracavaŭ u «Dynama» – Uładzimir Matusievič na praciahu niekalkich hod zajmaŭ post načalnika kamandy. U svaim intervju Tribuna.com kiraŭnik bieraściejskaha kłuba taksama nie lepšym čynam apisvaŭ jaho finansavaje stanovišča:
«Kiraŭnictva vobłaści pastaviła ŭmovu, što biudžet kłuba pavinien być na ŭzroŭni minułaha hoda. Heta 18 miljardaŭ rubloŭ. Bo častka našych daŭhoŭ i sabrałasia jak raz z-za taho, što ŭ 2014-m biudžet nie byŭ całkam napoŭnieny hrašyma. I ja realna razumieju, što zaćvierdzić na papiery možna adno, a realnych hrošaj my nie znojdziem. Transpartnyja vydatki ŭzrastuć, charčavańnie budzie daražeć. I daviadziecca dzieści uciskacca. I vierahodnaść atrymańnia ŭsioj sumy nievialikaja. Voś i vychodzić, mała zapłanavać biudžet. Na hetyja hrošy nam treba padpisać sponsarskija kantrakty. Žalezna my budziem mieć 6,6 miljardaŭ. Heta harantavanaja suma, vydzielenaja dziaržavaj. Astatnija 12 pavinny znajści sami. Kali nie zmožam, faktyčna biudžet budzie zrezany na tracinu».
Karcina zusim nie radasnaja. Mienavita hetakija pierśpiektyvy razam ź ciapierašnim stanam spraŭ i stali pryčynaj zvarotu futbalistaŭ i supracoŭnikaŭ «Dynama» da kiraŭnictva horada i vobłaści. Kali kłub nikomu nie patrebien, našto tady trymać ludziej i davać im niejkija abiacańni?
Bieraściejskija čynoŭniki adreahavali – i 13 sakavika adbyłasia sustreča pamiž dynamaŭcami i abłasnym kiraŭnictvam. Pa jaje vynikach my parazmaŭlali z pres-sakratarom «Dynama» Anatolem Levaniukom.
«Na sustrečy byli ŭsie – i namieśnik kiraŭnika vobłaści Leanid Cupryk, i litaralna ŭsio praŭleńnie kłuba, i ŭvieś skład futbalistaŭ i supracoŭnikaŭ kłuba, – raskazvaje Anatol. — Byli davoli vostryja pytańni, i nie tolki pa hrašach. Ale znajšli ahulnuju movu. Cupryk zapeŭniŭ, što kłub pierad pačatkam siezonu biez hrošaj nie pakinuć i zapazyčanaści buduć pahašanyja. Da dapamohi nam padklučanyja i «Brestenierha», i «Savuškaŭ pradukt», i inšyja pradpryjemstvy. Plus biarom kredyt, kab raźličycca».
«Na pačatku sustrečy futbalisty byli nastrojenyja davoli surjozna, asnoŭnym pytańniem było «Kali buduć hrošy?». Ale paśla vystupleńnia Cupryka jany bolš-mienš supakoilisia. Taksama ciapier razhladajecca pytańnie ab dastojnym stymulavańni kamandy ŭ vystupleńni ŭ Kubku Biełarusi. Plus jašče płanujucca kropkavyja ŭzmacnieńni ŭ składzie – 1-2 čałavieki. Paśla hetaha zadačaj budzie znachodzicca ŭ siaredzinie turnirnaj tablicy», – dzielicca pres-sakratar kłuba aptymistyčnymi płanami kiraŭnictva vobłaści.
Da taho ž spadar Levaniuk raspavioŭ ab tym, jakija krynicy finansavańnia moža mieć kłub:
«Akramia sponsarskaj dapamohi, u nas jość i inšyja krynicy srodkaŭ. Tak, nam buduć dapamahać pradpryjemstvy, pieraličvajučy hrošy z padatkaŭ na nieruchomaść pa 300-m ukazie. Taksama našy aŭtobusy prynosiać nam prybytak – my dajem imi karystacca roznym arhanizacyjam. Jašče my zdajom u arendu futbolnyja pali – ciapier na našaj bazie dabudoŭvajecca čaćviortaja naša placoŭka. I, viadoma, prodaž hulcoŭ. My starajemsia padpisvać doŭhaterminovyja kantrakty z maładymi hulcami, jakija źjaŭlajucca našymi vychavancami, kab paśla mieć mahčymaść atrymać adekvatnuju kampiensacyju ŭ vypadku ich pierachodu ŭ inšy kłub.
I jašče pracujem nad mahčymaściu prodažu kłubnaha ofisa, jaki znachodzicca ŭ centry horada. Hety budynak maje histaryčnaje značeńnie, tamu jahony košt składaje davoli značnuju sumu. Atrymanych hrošaj chopić, kab raźličycca z zapazyčanaściami i skončyć budaŭničyja pracy na našaj bazie».
Vidavočna, u čynoŭnikaŭ atrymałasia pierakanać hulcoŭ i supracoŭnikaŭ «Dynama» ŭ svaich ćviordych namierach akazvać padtrymku futbolnamu kłubu, pakolki dahetul, pry nie samaj lepšaj, skažam tak, finansavaj situacyi jašče nichto ź bieraściejskich futbalistaŭ nie padavaŭ u sud na kłub za niavypłaty zarobkaŭ.
Navat tyja, chto ŭžo pierajšoŭ u inšyja kamandy. Varta vykazać pavahu chłopcam, jakija z razumieńniem staviacca da prablem kłuba. Kab razabracca, jak bačycca situacyja z boku samaj zacikaŭlenaj častki ŭsioj historyi, źviazvajemsia ź Dzianisam Kavaleŭskim, abaroncam «Dynama», a taksama hulcom moładzievaj zbornaj Biełarusi, jaki papoŭniŭ skład bieraściejcaŭ u minułym siezonie.
«Na sustrečy z nami 13 sakavika čynoŭniki skazali, što situacyja naładzicca. Chočuć uziać kredyt, kab addać nam zapazyčanaści, zaraz źbirajuć patrebnyja papiery. Jość damoŭlenaść z pradpryjemstvami, jakija mohuć padtrymać kłub – ź Jeŭraoptam, jašče kimści. Patrochu, kažuć, da krasavika pavinny raźličycca. Nie chočacca ŭžo ich dušyć. Chočacca zrabić usio pa-ludsku. Tym bolš što kiraŭnictva adkryta da nas stavicca, choča vyrašyć hetuju situacyju.
Taksama skazali, što nam pojduć nasustrač pa pytańniach pražyvańnia, charčavańnia, farmakałohii. Usio-taki Leanid Cupryk (namieśnik staršyni Bresckaha abłvykankama) – nie apošni čałaviek u horadzie. Jon skazaŭ, što voźmie pytańnie pad svoj kantrol, pastarajecca dapamahčy nam pa svaich suviaziach. Zdajecca, znajšli kropki dotyku. Ale nie viedaju, jak budzie. Heta pakul što słovy. Chočacca vieryć u lepšaje.
Z novym dyrektaram kłuba prablemy zastalisia tyja samyja. Ja, u pryncypie, jaho razumieju: jon pryjšoŭ na karabiel, jaki tonie. Zrazumieła, što ciažka. Ale kali pradaduć kłubny budynak u centry, to spravy naładziacca. A tak dla trenirovak stvoranyja ŭsie ŭmovy. Pali dobryja. Kab hulać i raźvivacca ŭsio jość, hrech skardzicca.
My vierym kiraŭnictvu. Zrazumieła, što niechta moh psichanuć i pajści ŭ sud. Heta apošniaja sprava, jakuju možna rabić. Nikomu nie chočacca hetych razborak. Treba vyrašyć usio pa-ludsku: skazali – zrabili. Prosta chacia b nie dumać ab hetych finansavych prablemach, kab bolš-mienš raźličylisia. Ty ž svajmu dziciaci nie skažaš: «Małaka siońnia nie budzie, pačakaj tydzień». I kab my mahli dumać tolki ab hulni i vynikach.
A pakul zapazyčanaści ŭ nas ad 7 da 11 miesiačnych zarpłat. U mianie prynamsi 8. Kantrakty ŭ nas u paraŭnańni ź minułym siezonam zastalisia tyja ž. U ich byli prapisanyja punkty ab pavyšeńni zarobku, ale my pajšli na kampramis u suviazi z takoj situacyjaj i pahadzilisia pakinuć kantrakty na raniejšych ža ŭmovach. Tak što z aptymizmam hladzim u budučyniu».
I tolki kali b usie dynamaŭskija prablemy byli źviazanyja ź finansami! Taksama stała viadoma, što bieraściejskija fanaty abviaścili bajkot na naviedvańnie chatnich matčaŭ kłuba. Pryčyna – nieparazumieńnie ź miascovaj milicyjaj. Sprava ŭ tym, što ŭ minułym siezonie supracoŭniki pravaachovy prymianili svojeasablivy mietad dahladu ludziej (nieviadoma, kim jon byŭ prydumany, čym abhruntavany i na padstavie čaho ŭvohule prymianiajecca), jakija iduć na fanacki siektar, kab padtrymać kamandu. Kožny fanat pierad tym, jak trapić na trybunu, musiŭ prajści praz aŭtazak, dzie patrebna było amal całkam raździecca. Varta adznačyć, što hetakuju praceduru supracoŭniki milicyi prymianiali nie tolki ŭ Breście, ale stałaj praktykaj jana zrabiłasia tolki ŭ horadzie nad Buham. Samomu prychodziłasia nieadnarazova praz takoje prachodzić – nie samyja lepšyja uražańni, jak vy možacie zdahadacca.
Pierad pačatkam hetaha siezona bieraściejskija fanaty chacieli dabicca spynieńnia hetaj haniebnaj praktyki, ale padčas aficyjnaj sustrečy z supracoŭnikami MUS atrymali admovu.
«Na sustrečy byli kiraŭniki roznych padraździaleńniaŭ UUS, u tym liku UBAZ (baraćba z arhzłačynnaściu), – raskazvaje aktyŭny fanat «Dynama» Jaŭhien. — Ad nas byli chłopcy z kłuba zaŭziataraŭ. Hałoŭnym pytańniem była adsutnaść aŭtazaka na ŭvachodzie na siektar. Atrymali admovu. Maŭlaŭ, spačatku ŭsio zastajecca na ichnich umovach, a tam jany pahladziać, mo i prybiaruć aŭtazak. Nas heta nie zadavalniaje, tamu bajkot».
Padobnaja rytoryka hučyć i ŭ zajavie supołki zaŭziataraŭ «Dynama»: «Čakana rytoryka pradstaŭnikoŭ milicyi ŭ karotkim vykładzie całkam supała z kreda adnaho z kiraŭnikoŭ horada Hłupava: «Nie paciarplu!» Nijakich kampramisaŭ z fanatami nie budzie… U čarhovy raz tryvać raspranańni ŭ aŭtazakach, nieprychavanaje chamstva AMAPa pry ŭvachodzie i na siektary ŭ nas niama nijakaha žadańnia. Apryčniki ŭ čornym, jakija, biez sumnievu, atrymajuć u hetym hodzie poŭny kart-błanš na lubyja nieadekvatnyja dziejańni, buduć achoŭvać pustyja kresły pustoha stadyjona».
U toj ža čas varta adznačyć fakt, što kiraŭnictva futbolnaha kłuba ŭstupiłasia za svaich fanataŭ pierad milicyjaj.
Tak, kiraŭnik «Dynama» Uładzimir Matusievič, jak jon kazaŭ Tribuna.com, taksama nie razumieje takoj žorstkaści supracoŭnikaŭ słužbaŭ achovy pravaparadku: «Ja byŭ na toj sustrečy ź milicyjaj. My byli inicyjatarami i chacieli pamiryć baki. Fanaty ž nie prosiać ničoha zvyšnaturalnaha. Dahlad, ale cyvilizavany: biez raspranańnia i propusku ŭsich pahałoŭna praz aŭtazak. Heta narmalnaje žadańnie. Ale ŭ adkaz prahučała, što ŭ suviazi z tym, što hod vybaraŭ, staić ahulnaja zadača fanacki ruch jak najbolš ahresiŭny i niebiaśpiečny ŭ śviatle ŭkrainskich padziej pastavić na miesca. Praściej u hetym hodzie nikomu nie budzie, i dahlad stanie bolš žorstkim. Ja zastupiŭsia za chłopcaŭ. Skazaŭ, što heta niapravilna. Što treba znachodzić ahulnuju movu».
Takim čynam, kali ŭ bližejšy čas situacyja nie źmienicca ŭ lepšy bok, kłub ź vialikimi tradycyjami, jakim, biez sumnievu, źjaŭlajecca bieraściejskaje «Dynama», moža apynucca pad pahrozaj źniknieńnia nie tolki finansavaj, ale i, što bolš važna, maralnaj padtrymki horada. A heta dla biełaruskaha futboła, jakomu i tak nie sałodka, budzie jašče adnym ćvikom u trunu.
Kali Kanapackaja stała całkam padkantrolnaja Łukašenku?16
Kamientary