Nabor školnikaŭ u profilnyja kłasy budzie prachodzić na konkursnaj asnovie — Minadukacyi
Napramki profilnaha navučańnia ŭ škole buduć farmiravacca z ulikam patrebnaściej rynku pracy i inšych faktaraŭ. Ab hetym zajaviła namieśnik ministra adukacyi Biełarusi Raisa Sidarenka na pasiadžeńni kalehii Ministerstva adukacyi.
«Prajekt typavoha vučebnaha płana ahulnaj siaredniaj adukacyi na 2015-2016 navučalny hod nie praduhledžvaje dakładnaj fiksacyi napramkaŭ, pa jakich budzie ažyćciaŭlacca profilnaje navučańnie. Jany buduć farmiravacca z ulikam realnych patrebnaściej rynku pracy, pieraliku ŭstupnych ispytaŭ va ŭstanovy vyšejšaj adukacyi, adukacyjnych zapytaŭ navučencaŭ i ich baćkoŭ, mahčymaściej i tradycyj ustanovy ahulnaj siaredniaj adukacyi», - skazała Raisa Sidarenka.
Akramia taho, namieśnik ministra adznačyła, što zaličeńnie navučencaŭ u profilnyja kłasy na druhoj stupieni ahulnaj siaredniaj adukacyi ciapier budzie prachodzić na konkursnaj asnovie pa vynikach navučańnia: adznaki nie nižejšyja za 7 bałaŭ pa prafilujučych vučebnych pradmietach, siaredni bał paśviedčańnia ab ahulnaj siaredniaj adukacyi pavinien być nie nižejšym za 6. Mahčyma ŭstanavić ilhoty pry zaličeńni ŭ profilnyja kłasy dla pieramožcaŭ druhoha, treciaha i zaklučnaha etapaŭ respublikanskaj alimpijady pa adpaviednych (profilnych) vučebnych pradmietach.
Adna z asablivaściej profilnaha navučańnia, jakoje ŭvodzicca z 1 vieraśnia 2015 hoda, — heta jaho prafiesijna aryjentavanaja nakiravanaść.
U čas fakultatyŭnych zaniatkaŭ (u tym liku i mižškolnych) arhanizujecca praviadzieńnie prafiesijna aryjentavanych kursaŭ (naprykład, «Uvodziny ŭ prafiesiju», «Prafiesija - piedahoh») dla aryjentacyi na atrymańnie piedahahičnych, vajennych i inšych śpiecyjalnaściej.
Treba adznačyć, što pry ŭviadzieńni profilnaha navučańnia ŭ adukacyjnym standarcie ahulnaj siaredniaj adukacyi zakładziena 2 uzroŭni - bazavy i pavyšany. Vykładańnie vučebnych pradmietaŭ na bazavym uzroŭni aryjentavana na zabieśpiačeńnie pieravažna ahulnaadukacyjnaj i ahulnakulturnaj padrychtoŭki vučniaŭ. Vyvučeńnie pradmietaŭ na pavyšanym uzroŭni aryjentuje navučencaŭ na padrychtoŭku da nastupnaj prafiesijnaj adukacyi, raźvićcio indyvidualnych zdolnaściej šlacham bolš hłybokaha, čym heta praduhledžvajecca bazavym kursam, vyvučeńnia asnoŭ navuk, sistematyčnych viedaŭ i sposabaŭ dziejańniaŭ, ułaścivych hetamu vučebnamu pradmietu.
«Asablivaje značeńnie siońnia nabyvaje arhanizacyja ŭzajemadziejańnia z ustanovami vyšejšaj adukacyi, jakija rychtujuć piedahahičnyja kadry. Važna, kab praz 5 hadoŭ u škołu pryjšli maładyja piedahohi, hatovyja da realizacyi profilnaha navučańnia», - padkreśliła Raisa Sidarenka.
Płan pierachodu na profilnaje navučańnie daviedzieny da rehijonaŭ.
Užo ciapier na Nacyjanalnym adukacyjnym partale pačałosia raźmiaščeńnie mietadyčnych materyjałaŭ, jakija možna vykarystoŭvać pry arhanizacyi profilnaha navučańnia. Pa miery padrychtoŭki mietadyčnych rekamiendacyj, vučebnych prahram jany taksama buduć raźmiaščacca na partale. Typavy vučebny płan na 2015-2016 navučalny hod ciapier prachodzić uzhadnieńni i ŭ bližejšy čas budzie pradstaŭleny.
Kamientary