Zachodnija sankcyi suprać Rasii mohuć być admienienyja tolki ŭ tym vypadku, kali Maskva vykanaje pahadnieńnie ab spynieńni ahniu, padpisanaje ŭ lutym u Minsku, i budzie pavažać suvierenitet Ukrainy.
Pra heta havorycca ŭ sumiesnym kamiunikie, jakoje ministry zamiežnych spraŭ krain G7 (ZŠA, Hiermanija, Francyja, Italija, Kanada, Vialikabrytanija, Japonija) pryniali ŭ sieradu na sustrečy ŭ niamieckim horadzie Lubiek, pieradaje Reuters.
«G7 padkreślivaje ciesnuju suviaź pamiž poŭnym vykanańniem Minskich pahadnieńniaŭ i mižnarodnymi sankcyjami», — padkreślivajecca ŭ dakumiencie.
«Sankcyi nie źjaŭlajucca samametaj: ich praciahłaść pavinna być dakładna ŭviazanaja z poŭnaj realizacyjaj Rasijaj Minskich pahadnieńniaŭ i pavahaj suvierenitetu Ukrainy», — adznačyli kiraŭniki źniešniepalityčnych viedamstvaŭ.
Ministry vitali pieršyja kroki Ukrainy i Rasii na šlachu da vykanańnia pahadnieńnia ab spynieńni ahniu, adznačyŭšy «nieabchodnaść adčuvalnaha i chutkaha prahresu va ŭrehulavańni detalaŭ, jakija zastalisia».
Jany zaklikali ŭsie baki vykonvać damoŭlenaści, a taksama da «dalejšaha i realnaha prahresu» ŭ pytańniach spynieńnia ahniu i vyvadu ciažkich uzbrajeńniaŭ. Kiraŭniki źniešniepalityčnych viedamstvaŭ taksama zajavili, što Rasija pavinna skarystacca svaim «značnym upłyvam» na bajevikoŭ.
Paśla sustrečy ŭ Lubieku ministr zamiežnych spraŭ Hiermanii Frank-Valter Štajnmajer nazvaŭ vykanańnie Rasijaj Minskich pahadnieńniaŭ umovaj jaje viartańnia ŭ pašyranuju hrupu G8. Jon nahadaŭ, što mienavita dziejańni Rasii va Ukrainie pryviali da prypynieńnia jaje ŭdziełu ŭ «vaśmiorcy».
«Z majho boku niama intaresu, jak i, nakolki ja viedaju, ni ŭ kaho inšaha, pravodzić palityku strymlivańnia ci navat izalacyi Rasii, — skazaŭ Štajnmajer. — My b vielmi chacieli, kab nastupili ŭmovy, pry jakich Rasija mahła b znoŭ pryniać ŭdzieł u G8».
«Ale zastajecca fakt, što šlach da hetaha prachodzić praz vykanańnie Minskich pahadnieńniaŭ i ŭrehulavańnie kanfliktu va Ukrainie i vykanańnie abaviazacielstvaŭ, jakija Rasija na siabie pryniała. Pra heta nie moža być sprečki. Takoje ahulnaje mierkavańnie ŭ G7», — zajaviŭ niamiecki ministr na pres-kanfierencyi.
U 2014 hodzie paśla anieksii Kryma krainy «Vialikaj vaśmiorki» vyrašyli nie dasyłać svaich lidaraŭ na samit niefarmalnaha kłuba raźvitych krain u Sočy i sabralisia ŭ Brusieli biez udziełu pradstaŭnikoŭ Rasii. Paśla hetaha «vaśmiorka» pieratvaryłasia ŭ «siamiorku».
Kamientary