Lvoŭski: Nie ŭpeŭnieny, što ŭ biełarusaŭ zachavałasia talerantnaść da inšych narodaŭ

Leŭ Lvoŭski naradziŭsia ŭ Rasii. Skončyŭ fakultet prykładnoj matematyki Piermskaha dziaržaŭnaha techničnaha ŭniviersiteta, atrymaŭ stupieni bakałaŭra i mahistra. Kala šaści hadoŭ žyŭ u ZŠA, dzie ŭ 2017 hodzie abaraniŭ stupień PhD pa ekanamičnaj demahrafii va Univiersitecie Ajovy. Paśla žyŭ u Biełarusi. Ciapier — u Litvie.

Padčas intervju TOKu Lvoŭski adznačyŭ, što histaryčnaja talerantnaść biełarusaŭ — biassprečny fakt. U minułym na biełaruskich ziemlach «pobač žyli roznyja narody i vykarystoŭvalisia roznyja movy, pryčym nivodnaja ź ich nie daminavała nastolki, kab całkam vycieśnić astatnija».

Adnak sučasnaja Biełaruś, jak adznačaje Lvoŭski, značna bolš monaetničnaja. I tamu jon nie ŭpeŭnieny, što talerantnaść da inšych narodaŭ zachavałasia.

«Heta (talerantnaść. — NN) ciažka vymierać. Kali ŭ vas tak mała čarnaskurych ludziej, tak mała jaŭrejaŭ, navat mała tataraŭ, prosta musulman, to vy nie viedajecie, jak vy budziecie da ich stavicca», — adznačyŭ jon.

U jakaści prykładu Lvoŭski pryvioŭ reakcyju častki biełarusaŭ na ideju pryjezdu ŭ krainu vialikaj kolkaści pakistancaŭ.

«Kali ŭrad prapanuje pryvieźci 100 tysiač pakistancaŭ, to biełarusy nie kažuć: «Łaskava prosim, pryjazdžajcie, my voś napiakli dranikaŭ». Kažuć, što nie chočuć. Nie padobna na zvyšvialikuju talerantnaść», — zaŭvažyŭ jon.

Što tyčycca niehatyvu, jaki ŭ svoj adras atrymlivajuć u Threads rasijanie, što vykazvajuć žadańnie pierajechać u Biełaruś, to Lvoŭski adznačyŭ dźvie važnyja akaličnaści.

Na jaho dumku, internet sam pa sabie robić ludziej bolš ahresiŭnymi, čym jany jość u realnym žyćci.

«Samyja kulturnyja, talerantnyja, dobryja ludzi, jakija ŭ asnoŭnym pościać pra kocikaŭ, kali pačynajecca jaki-niebudź kanflikt, akazvajecca, majuć vielmi mocnyja mierkavańni nakont taho, jakuju nacyju treba vyrazać na Blizkim Uschodzie, jakuju nacyju treba vyrazać u Jeŭropie i hetak dalej.

Pry realnaj sustrečy tvar u tvar ludzi značna mienš ahresiŭnyja i značna mienš chočuć adzin adnaho rezać. Nu, jak minimum absalutnaja bolšaść ludziej», — davodzić Lvoŭski.

Druhoj akaličnaściu, jakaja abumoŭlivaje niehatyŭnuju reakcyju biełarusaŭ, Lvoŭski nazvaŭ svojeasablivaje vymiaščeńnie. Na jaho dumku, razdražnieńnie, vyklikanaje dziejańniami Rasii, pieranosicca na rasijan, što pierajazdžajuć u Biełaruś, choć heta «nie najhoršyja z rasijan».

«Najhoršyja z rasijan užo pachavanyja na palach bitvaŭ z Ukrainaj. A inšyja ludzi, jakich mienš za ŭsio chaciełasia b bačyć, — heta takija patryjoty, jakija ni ŭ jakuju Biełaruś, ni za jakim internetam, ni za jakoj adnosnaj svabodaj nie pajechali b. Heta značyć, u nas usio ž vybarka nie z najhoršych».

Jon adznačaje, što rasijanie sapraŭdy drenna viedajuć Biełaruś i inšyja susiednija krainy. U jakaści prykładu jon zhadaŭ svajo navučańnie ŭ rasijskaj škole. Pavodle Lvoŭskaha, na ŭrokach historyi pra Biełaruś tam nie raskazvali ničoha. Pra Ukrainu zhadvali tolki ŭ kantekście Kijeva jak «maci haradoŭ ruskich» i Kijeŭskaj Rusi, a pra krainy Bałtyi — amal ničoha.

Pry hetym, pavodle ekanamista, u jaho škole nie prapahandavali ideju «tryadzinstva» ŭschodniesłavianskich narodaŭ i navat nie raskazvali pra Sajuznuju dziaržavu Rasii i Biełarusi. Pra jaje jon daviedaŭsia ŭžo paśla pierajezdu ŭ Biełaruś.

«Raskazvali pra Francyju, pra Afryku, pra Vialikabrytaniju, nu, zusim krychu pra Kitaj. (…) Napeŭna, heta taksama častka hetaj impierskaści. Heta značyć, rasijanie, budučy žycharami vialikaj krainy, dumajuć pra inšyja vialikija krainy i vielmi mała viedajuć pra krainy mienšyja», — robić vysnovu Lvoŭski.

• 2
• 1
• 0
• 3
• 0
• 0
• 0
• 0