— U lubym vypadku heta lepš, čym niesankcyjanavanaja akcyja, -- kaža namieśnik staršyni BNF Viktar Ivaškievič
Minharvykankam daŭ dazvoł na praviadzieńnie «Čarnobylskaha šlachu-2006», adnak zapatrabavaŭ ad arhanizataraŭ źmianić jaho maršrut. Pradstaŭniki demakratyčnych sił pahadzilisia. Šeście pavinna prajści ad Akademii Navuk da płoščy Banhałor, chacia ŭ zajaŭcy da haradskich uład arhanizatary mitynhu prasili dazvołu sabracca na Kastryčnickaj płoščy.
— U lubym vypadku heta lepš, čym niesankcyjanavanaja akcyja, -- kaža namieśnik staršyni BNF Viktar Ivaškievič, jaki asabista padavaŭ zajaŭku ŭ Minharvykankam. – Navat kali b nam uvohule zabaranili šeście, akcyja ŭsio roŭna adbyłasia b. Lepš zrabić heta lehalna. Nam patłumačyli, što źbiracca na Kastryčnickaj płoščy nielha tamu, što pobač znachodzicca rezidencyja kiraŭnika krainy. Vieści dyskusiju z čynoŭnikami było biessensoŭna: zrazumieła, što hetaje rašeńnie im było spuščana źvierchu.
Viktar Ivaškievič zapeŭniŭ, što farmat samoha šeścia zachavajecca, a pakolki nie ŭsie žadajučyja pryniać u im udzieł mohuć viedać pra źmieny maršruta, z haradskimi ŭładami była dasiahnuta damoŭlenaść: milicyja budzie infarmavać pra novaje miesca zboru tych ludziej, jakija pryjduć 26 krasavika na Kastryčnickuju płošču, i nie budzie pieraškadžać im ruchacca da Akademii Navuk.
Miž tym načalnik HUUS Minska Alaksandr Najdzienka ŭ intervju «Interfaksu» siońnia adznačyŭ, što źbirajecca rekamiendavać arhanizataram akcyi «Čarnobylski šlach» pravieści mierapryjemstva niepasredna ŭ čarnobylskaj zonie. «Niachaj pajeduć u Brahin, Chojniki, Naroŭlu i tam praviaduć i šeście, i mitynh, heta budzie mieć bolš šyroki i hramadski, i palityčny rezanans, čym parušeńnie hramadskaha paradku ŭ centry Minska», -- skazaŭ jon. Jon taksama padkreśliŭ, što ŭ tym vypadku, kali «paradak u horadzie budzie parušany, to arhanizatary dadzienaha mierapryjemstva buduć pryciahnuty da adkaznaści».
Anastasija Zielankova, «Salidarnaść»
Ciapier čytajuć
Top sučasnych elitnych žyllovych kompleksaŭ Minska. Kvadrat tam kaštuje da 11 000 dalaraŭ3
Kamientary