Stali viadomyja niekatoryja detali bijahrafii Andreja Kanaŭca, jaki padaŭ dakumienty ŭ CVK na rehistracyju inicyjatyŭnaj hrupy pa vyłučeńni kandydata ŭ prezidenty.
Nahadajem, Kanaviec — 36-hadovy vychadziec Navapołacka, dyrektar turystyčnaj i transpartnaj firmaŭ, zajaviŭ, što ŭ jahonaj inicyjatyŭnaj hrupie 100 čałaviek, a ŭ prezidenty jon idzie, kab «pabudavać novaje žyćcio ŭ Biełarusi»
Jak paviedamlała Jeŭraradyjo, niekalki hadoŭ tamu Kanaviec sprabavaŭ pryvieźci ŭ Minsk kultavuju hrupu Metallica, adnak historyja skončyłasia skandałam. Hrupa nie dajechała ŭ Biełaruś i nibyta navat nie mieła takich płanaŭ.
«A praź niekatory čas na Kanaŭca pakryŭdziłasia viadomaja rasijskaja śpiavačka Palina Haharyna. Maŭlaŭ, arhanizatary jaje biełaruskaha kancertu nie vypłacili abiacanaha hanararu», — paviedamiła Jeŭraradyjo. «Arhanizatary kancertu da hetaha času nie raspłacilisia z nami. Havorka pra sumu pamieram prykładna 12 tysiač jeŭra. My padali zajavu ŭ našu prakuraturu. Nakolki ja viedaju, sprava razhladajecca», — cytuje Jeŭraradyjo PR-menedžara śpiavački.
Sam Kanaviec hetyja pretenzii admaŭlaje, zajaŭlajučy, što jaho firma raspłaciłasia z Haharynaj.
Adnak na hetym historyja nie skončyłasia. U redakcyju TUT.BY źviarnuŭsia čałaviek, jaki byŭ znajomy z Kanaŭcom niekalki hadoŭ tamu. Ad surazmoŭcy my daviedalisia, što Kanaviec źmianiŭ proźvišča i raniej jaho klikali Andrej Kahaloŭ.
Pa słovach surazmoŭcy, Kanaviec (Kahaloŭ) u 2012 hodzie pravodziŭ u Biełarusi muzyčny konkurs «Novaja zorka» dla maładych talenavitych vykanaŭcaŭ, dla čaho nibyta vykarystaŭ čužyja hrošy.
Adnak paśla taho jak paŭfinał nie akupiŭsia, jon, pa słovach znajomaha, źjechaŭ u Rasiju, nie addaŭšy hrošaj, jakija byŭ vinien, i «padvioŭ udzielnikaŭ konkursu, jakija čakali finału». «Akramia taho, Kahaloŭ kazaŭ, što ŭ jaho jość sudzimaść ŭ Rasii pa ekanamičnym artykule», — skazaŭ znajomy pretendenta na prezidencki post. Pa dadzienych surazmoŭcy TUT.BY, Kahaloŭ taksama byŭ datyčny i da inšych pravaparušeńniach u Rasii.
Infarmacyja ab konkursie «Novaja zorka» jość u sacyjalnaj sietcy «Ukantakcie», dzie finał konkursu tolki anansavany. Tam ža jość fota Andreja Kanaŭca (Kahalova) z rasijskimi znakamitaściami na dabračynnym kancercie ŭ Maskvie.
Akramia taho, rachunak Kanaŭca (Kahalova) jość u «Fejsbuku», dzie jon stvorany pad raniejšym proźviščam pradziusara.
TUT.BY źviazaŭsia z samim pretendentam na prezidencki post. Jon zajaviŭ, što ŭsio jašče płanuje vyłučacca: «Nazad darohi niama».
U tym, što tyčycca artykuła na Jeŭraradyjo pra kancert Haharynaj i niepryjezd hrupy Metallica, Kanaviec zajaviŭ: «Ja padaju na Alesia Pileckaha (žurnalist Jeŭraradyjo. - TUT.BY) u sud za toje, što jon vynies na ahlad. Dyrektaram firmy, jakaja pryvoziła Palinu Haharynu, byŭ nie ja… Ja tam byŭ usiaho tolki muzyčnym pradziusaram «.
«Tak, «Mietaliku» chacieli pryvieźci, ale byŭ zapytany vialiki hanarar, i my admovilisia», — dadaŭ Kanaviec.
Jon paćvierdziŭ, što byŭ pradziusaram konkursu «Novaja zorka». «Finał nie prajšoŭ pa toj pryčynie, što ja pasvaryŭsia sa svaimi partniorami, było niedastojnaje partniorstva», — skazaŭ Kanaviec.
Jon adchiliŭ abvinavačvańni ŭ tym, što braŭ u kahości hrošy na praviadzieńnie konkursu.
Kanaviec skazaŭ, što pamianiaŭ proźvišča, tamu što «zachacieŭ proźvišča žonki», i heta rašeńnie nijak nie było źviazana ź jaho biznesam.
Najaŭnaść sudzimaści ŭ Rasii Kanaviec admaŭlaje, adnak pryznaŭ, što ŭ jaho była sudzimaść ŭ Biełarusi ŭ 1990-ja, adnak nie staŭ udakładniać, pa jakim artykule. «Davajcie na dadzieny momant heta naohuł nie abmiarkoŭvać, tamu što ja jašče nie kandydat i nijakaha sensu abmiarkoŭvać majo byłoje asabistaje žyćcio niama», — zajaviŭ Kanaviec.
Ciapier čytajuć
Mikoła Statkievič pavinšavaŭ biełarusaŭ z Dniom Voli, zapisaŭšy pieršaje VIDEA paśla vyzvaleńnia4
Kamientary