Andrej Dźmitryjeŭ: 10 hałoŭnych nazirańniaŭ z kamunikacyi ź ludźmi ŭ pieradvybarnych pikietach

1. Za Łukašenku staviać podpisy pieravažna žančyny piensijnaha ŭzrostu.

2. Kali ŭ 90-ch hałoŭnym było pytańnie «Za Łukašenku ci suprać?», ciapier hałoŭnaje pytańnie — «Za Rasiju ci za Jeŭropu?»

3. U paraŭnańni z 2014 hodam, kali my stajali ŭ pikietach na miascovych vybarach, «ukrainskaja tema» asłabła i sastupiła miesca ekanomicy i ahulnamu pačućciu niepaźbiežnaha, ź jakim ničoha nielha zrabić.

4. Rasijskaje TB značna hłybiej pranikła ŭ hałovy ludziej, i prosta jarłykami «vatniki» situacyju nie vypravić.

5. Jak i ŭ 2010 hodzie ludzi staviać podpisy za demakratyčnych kandydataŭ. Heta značyć, što tych, chto naceleny na kankretnaha kandydata nie tak šmat, jak tych, chto choča prosta padtrymać alternatyvu i ŭsich, chto jaje ŭjaŭlaje.

6. Ułada ŭsio bolš udzielničaje ŭ vybarčym pracesie. Pikietaŭ «Biełaj Rusi»—FPB—BRSM bolš za ŭsio. Usie jany brendavanyja i dobra padrychtavanyja technična. Siońnia, naprykład, u kožnaha byŭ parason. Kali b dem. siły nie prymali ŭdziełu, to ludzi b bačyli tolki pikiety za Łukašenku. U rehijonach, dzie sił mienš, asabliva ŭ małych i siarednich haradach, dumaju tak i jość.

7. Internet jašče vielmi nie chutka dahonić TB pa svaim uździejańni. U pieršy dzień podpisaŭ stavili niašmat, u druhi dzień patok značna pavialičyŭsia, što adbyłosia? Uviečary pa BT-kanałach pakazali naviny i skazali, što možna padpisvacca.

8. Strach u ludziach vielmi vialiki. Asabliva heta adčuvajem u rehijonach. Šmat ludziej žadajuć pośpiechaŭ, ale admaŭlajucca stavić podpisy, tamu što baicca stracić pracu, naprykład.

9. Dla bolšaści vybary — heta nie fars ci fiejk. Jany padychodziać, zadajuć surjoznyja pytańni, sprabujuć razabracca ŭ kandydatach i roźnicy pamiž imi. Navat kali nie vierać, što Łukašenku možna pieramahčy, da svajho vybaru staviacca surjozna. Kali b nie było nas, jany taksama surjozna vybirali b pamiž tymi, chto jość i chutčej za ŭsio b źjaviŭsia.

10. U Minsku staŭleńnie da BČB-ściaha ŭ cełym spakojnaje, moładzi padabajecca fatahrafavacca na jaho fonie.

I historyja ŭ zaviaršeńnie. Staim u pikiecie, padychodzić čałaviek i kaža: «U mianie jość usie dakumienty nakont daśledavańnia adkryćcia viečnaha žyćcia. My, hrupa daśledčykaŭ, heta vynajšli jašče ŭ 2009 hodzie, ale vyrašyli pakul nie patentavać, tamu što baimsia, što «Hety» skarystajecca i tady naohuł nikoli ad jaho nie pazbavimsia. Budziem čakać, kali vy pieramožacie, i tady zrobim adkryćcio publičnym».

Dumaju, šmat hramadzian padzialajuć hetuju aściarohu. Takija časy: varjaty kažuć razumna, a razumnyja robiać varjackija rečy.

A žyviom u hetym my z vami.

• 0
• 0
• 0
• 0
• 0
• 0
• 0
• 0