Sotni ludziej sustrakali Statkieviča ŭ Minsku skandavańniem «Hieroj!» FOTA, VIDEA
«Žyvie Biełaruś!» — z takimi słovami Mikoła Statkievič vyskačyŭ z maršrutki. Sotni ludziej vystrailisia ŭ žyvy kalidor i sustreli jaho avacyjami, skandujučy «Hieroj!», «Žyvie Biełaruś!» i «Mikoła!». Mužčyny padniali Statkieviča na rukach i kačali.
Voś poŭnaje videa sustrečy, zroblenaje radyjo «Svaboda»:
Statkievič vydatna vyhladaŭ, turma jaho ni trochi nie padkasiła. Jon dziakuje ŭsim, chto padtrymlivaŭ jaho.
Statkievič źbirajecca raicca ź dziejačami hramadstva i kultury dy apazicyjnymi palitykami, jak dziejničać dalej. «Dajcie mnie trochi času, kab razabracca ŭ palityčnaj situacyi», — kaža palityk. Kaža, što mieŭ płan na vypadak svajho znachodžańnia za kratami.
Na jaho dumku, vyzvaleńnie moža być źviazana z žadańniem Alaksandra Łukašenki narmalizavać adnosiny z Zachadam: «Majo vyzvaleńnie źviazana z tym, što ŭ dyktatury skončylisia hrošy».
Palityk miarkuje, što jaho mohuć vyciskać z krainy.
«Ni za što nie źjedu ź Biełarusi. Ja budu zmahacca za narmalnuju krainu», — abiacaje Statkievič.
«My razam zrobim hetuju krainu narmalnaj i volnaj, — skazaŭ Statkievič. — Ja čakaŭ sustreć krainu zapałochanaj. A tut lepš, čym było!» — pažartavaŭ jon.
Statkievič sam padyšoŭ da karespandenta «NN» Źmitra Pankaŭca i padziakavaŭ za hazietu, padpisčykam jakoj jon byŭ u turmie.
Adzin z mastakoŭ padaryŭ Statkieviču karcinu.
«Dziakuj!» — skandavali ludzi na raźvitańnie i zaśpiavali pieśniu «Voiny śvietu».
Ź viadomych ludziej Statkieviča sustrakali Uładzimir Arłoŭ, Andrej Dźmitryjeŭ, Valancin Stefanovič, Pavieł Biełavus, Hanna Šapućka, Alaksiej Janukievič, Alaksandr Dabravolski. Byŭ i jahony advakat Alaksandr Halijeŭ.
Statkievič viarnuŭsia na svabodu ŭ dobrym, pieramožnym nastroi, niazłomlenym i niastomlenym, adznačajuć našy karespandenty na aŭtavakzale.
«Statkievič fiejeryčny, — piša historyk Alaksandr Paškievič u svaim fejsbuku. — Viasioły, žyćciaradasny, enierhičny. Nibyta nie z turmy viarnuŭsia, a z adpačynku. Mocny mužyk, ničoha nie skažaš!
Što ž, siońnia ŭ biełaruskaj demakratyčnaj supolnaści ŭnikalny šaniec, kab zajmieć narešcie sapraŭdnaha mocnaha lidara. A nakolki jon budzie skarystany — šmat ad samoha Statkieviča zaležyć. Vielmi chaciełasia b nie rasčaravacca čarhovy raz», — padsumoŭvaje Paškievič.
Maryna Adamovič, žonka Mikoły Statkieviča, za dźvie hadziny pieraadoleła 200 km, kab spatkać muža ŭ Minsku. Navina pra vyzvaleńnie muža sustreła jaje va Ušačach (Viciebskaja vobłaść).
Palityka pryjšło sustreć kala 300 čałaviek. Na aŭtavakzale panavała atmaśfiera radaści i raźniavolenaści.
«Budzie zdymać maštabnyja prajekty z saboj u hałoŭnaj roli». Što dumajuć pra novaha ministra kultury Čarnieckaha jaho kalehi?1
Kamientary