Taćciana Karatkievič apublikavała svaju pieradvybarnuju prahramu «Za mirnyja pieramieny»

Ad redaktara

Jość try fakty.

1) U Biełarusi vybarčyja kamisii ŭznačalvajuć asoby, padkantrolnyja Alaksandru Łukašenku. 2) Vybarcaŭ zmušajuć hałasavać daterminova, što ŭžo samo saboj padazrona. 3) Padlik biuleteniaŭ paśla hałasavańnia viadziecca takim čynam, što naziralniki nie mohuć ich pieraličvać.

U takich vybarach niemahčyma «pieramahčy» taho, chto ich arhanizoŭvaje. Heta śpiektakl, a nie vybary, kažuć Mikałaj Statkievič, Anatol Labiedźka i Pavieł Sieviaryniec.

Jany zaklikali Taćcianu Karatkievič źniacca na adnym z etapaŭ kampanii, kab svaim udziełam nie nadavać śpiektaklu lehitymnaści.

Taćciana Karatkievič, ź niejkich pryčyn, zdymacca nie choča.

Heta što datyčyć udziełu ci niaŭdziełu.

Adnak što datyčyć prahramy, to prahrama Taćciany Karatkievič – heta prahrama ŭsioj apazicyi.

Što ž prapanuje apazicyja? Prapanujem Vašaj uvazie.

Prezident pavinien nakiravać svaju pracu ŭ pieršuju čarhu na stvareńnie ŭmoŭ dla pavyšeńnia ŭzroŭniu i jakaści žyćcia hramadzian Biełarusi, što moža być ažyćcioŭlena tolki na asnovie efiektyŭnaj ekanomiki. Pazityŭnyja pieramieny niemahčymyja biez praviadzieńnia hłybokich palityčnych reformaŭ i ekanamičnych reformaŭ.

Prahrama zasnavana na pytańniach «Narodnaha refierendumu».

Sacyjalnaja palityka: kłopat pra ludziej i sacyjalnaja spraviadlivaść

Hałoŭnym pryncypam sacyjalnaj palityki pavinien stać pryncyp roŭnych mahčymaściaŭ, zasnavany na sacyjalnaj spraviadlivaści i sacyjalnaj salidarnaści mocnych i słabych.

U sacyjalnaj śfiery nieabchodna viarnucca da ŭžo pradekłaravanych u Kanstytucyi harantyjaŭ i ažyćciavić šerah reformaŭ:

Biaspłatnaja dziaržaŭnaja miedycyna — zabiaśpiečyć dostup usich hramadzian da jakasnaha miedycynskaha absłuhoŭvańnia pry paralelnym raźvićci sistemy strachavoj i pryvatnaj miedycyny.

Biaspłatnaja dziaržaŭnaja vyšejšaja adukacyja — admianić płatu za vučobu ŭ dziaržaŭnych navučalnych ustanovach jak supiarečnuju Kanstytucyi. Viarnuć studentam ilhoty na prajezd transpartam usich vidaŭ i inšyja lhoty.

Piensijnaja reforma — nie pavyšać piensijny ŭzrost da narmalizacyi demahrafičnaj situacyi. Płacić poŭnyja piensii pracujučym piensijanieram. Raspracavać sistemu nakaplalnych piensij, spryjać stvareńniu pryvatnych niezaležnych piensijnych fondaŭ razam ź dziaržaŭnymi.

Adrasnaja sacyjalnaja dapamoha — raspracavać efiektyŭnuju sistemu sacyjalnaj dapamohi ŭ vyhladzie adrasnych hrašovych vypłat, asabliva hramadzianam z abmiežavanymi mahčymaściami, u tym liku na prajezd u hramadskim transparcie i kamunalnyja płaciažy. Pašyryć udzieł hramadskich arhanizacyj u sacyjalnaj dapamozie nasielnictvu praź dziaržaŭnuju sacyjalnuju zamovu.

Reforma pracoŭnych uzajemaadnosin — pierahledzieć kabalnuju kantraktnuju sistemu najmu na pracu, Admianić pabory dziaržavy z hramadzian, jakija stracili pracu ŭ vyniku ekanamičnaha kryzisu. Akazać efiektyŭnuju dapamohu ŭ nabyćci novaj śpiecyjalnaści i ŭ adkryćci ŭłasnaj spravy. Abarona pravoŭ rabotnikaŭ pavinna ažyćciaŭlacca nie butaforskimi, a niezaležnymi prafsajuzami na asnovie efiektyŭna dziejnych kalektyŭnych damovaŭ.

Pieraadoleńnie nastupstvaŭ Čarnobylskaj katastrofy — adnavić «čarnobylskija prahramy»: u poŭnym abjomie viarnuć ilhoty paciarpiełym hramadzianam i zabiaśpiečyć biezumoŭnaje vykanańnie mier pa pieraadoleńni nastupstvaŭ katastrofy. Stvaryć nie farmalnuju, a sapraŭdy efiektyŭnuju sistemu miedycynskaha abśledavańnia ŭsich katehoryj paciarpiełaha nasielnictva — abśledavacca pavinny ŭsie žychary na rehularnaj asnovie z užyvańniem sučasnych mietodyk i abstalavańnia

Dapamoha siemjam — akazvać aktyŭnuju padtrymku siemjam ź dziećmi, stvaryć sistemu padatkovych ilhot u intaresach siamji, sadziejničać usim formam pradprymalnickaj dziejnaści siemjaŭ. Raspracavać prahramu budaŭnictva ź dziaržaŭnaj padtrymkaj indyvidualnych žyłych damoŭ na ŭłasnym ziamielnym učastku.

Moładzievaja palityka — raspracavać i realizavać prahramu moładzievaj palityki, jakaja ŭklučaje dziaržaŭnuju padtrymku hramadskaj i pryvatnaj inicyjatyvy moładzi. Spryjać atrymańniu adukacyi za miažoj.

Biznes na słužbie sacyjalnaj palityki — raspracavać sistemu padtrymki sacyjalna adkaznaha biznesu, stymulavać inviestycyi pracadaŭcy ŭ sistemu sacyjalnaj abarony rabotnikaŭ svajho pradpryjemstva.

Dastupnaje žyllo — raspracavać doŭhaterminovyja horadabudaŭničyja płany kožnaha nasielenaha punkta z ulikam naturalnych demahrafičnych pracesaŭ. Aptymizavać usie etapy budaŭničaha pracesu z metaj pryvieści košt standartnaha mietra žylla jaki dastupny dla siaredniaj biełaruskaj siamji.

Ekanamičnaje abnaŭleńnie: raźvićcio pradprymalnictva i pramysłovaści, pryciahnieńnie inviestycyj

Tolki efiektyŭnaja ekanomika, jakaja raźvivajecca na asnovie pryncypaŭ i padychodaŭ, užo realizavanych u paśpiachovych krainach, moža stać asnovaj pavyšeńnia ŭzroŭniu i jakaści žyćcia hramadzian.

Dziaržaŭnyja finansy — stabilnaja valuta i abarona układaŭ, zabieśpiačeńnie niezaležnaści nacyjanalnaha banka, strymlivańnie inflacyi, absalutnaja zachavanaść i tajamnica pryvatnych układaŭ, dastupnaść bankaŭskaha kredytu, spynieńnie rastraty dziaržaŭnych srodkaŭ pa zapytach halinovych łabistaŭ.

Pryciahnieńnie inviestycyj — stabilnaja padatkovaja sistema i prazrystaść: uviadzieńnie 5-hadovaha maratoryja na zakanadaŭčyja źmieny ŭ padatkovaj sistemie, sproščanaje padatkaabkładańnie, stvareńnie stabilnaj zakanadaŭčaj bazy, uklučajučy Inviestycyjny kodeks, jaki budzie harantavać niaźmiennaść umoŭ zaklučeńnia damovy ź inviestaram. Kanfiskacyjnyja miery, vysokija štrafnyja sankcyi ŭ dačynieńni da biznesu i sakretnyja rasparadžeńni vykanaŭčych orhanaŭ buduć admienieny.

Dziaržaŭnaja dapamoha — madernizacyja stratehičnych pradpryjemstvaŭ i pryjarytet u raźvićci novych siektaraŭ ekanomiki: stratehičnyja pradpryjemstvy buduć madernizavany ź dziaržaŭnaj padtrymkaj i stanuć kankurentazdolnymi nie tolki ŭ Rasii, ale i va ŭsim śviecie. Rašeńnie ab madernizacyi budzie prymacca nie adnym čałaviekam, a antykryzisnaj kamisijaj, jakaja stvarajecca dla pracy z kožnym prablemnym pradpryjemstvam. Dziaržava budzie sadziejničać raźvićciu najbolš kankurentazdolnych halin: infarmacyjnych technałohij, ekałahičnaha turyzmu, tranzitu i łahistyki, vajenna-pramysłovaha kompleksu, alternatyŭnaj enierhietyki. Biełaruś stanie zboračnym cecham Jeŭropy i Jeŭrazii i apornaj placoŭkaj ekanamičnych abmienaŭ pamiž Uschodam i Zachadam.

Samastojnaść pradpryjemstvaŭ — kiraŭnictvu pradpryjemstvaŭ budzie dadziena prava na ryzyku i dziełavuju inicyjatyvu, jany buduć vyzvalenyja ad vykanańnia zadańniaŭ ministerstvaŭ i viedamstvaŭ pa naroščvańni vypusku niekankurentazdolnaj pradukcyi i niametavaha ŭkładańnia srodkaŭ.

Raźvićcio enierhietyčnaha siektara — budzie realizavany ahulnajeŭrapiejski padychod: ukaranieńnie enierhaźbierahalnych technałohij i vykarystańnie adnaŭlalnych krynic enierhii biez ekstensiŭnaha naroščvańnia hienieryrujučych mahutnaściaŭ. Asabliva niebiaśpiečnaj i darahoj AES.

Stvareńnie pracoŭnych miescaŭ — kankurentnaja i inviestycyjna pryvabnaja ekanomika budzie sadziejničać stvareńniu novych pracoŭnych miescaŭ i samazaniataści.

Raźvićcio navuki — biełaruskaja navuka pavinna adnavić zhublenyja pazicyi šlacham stymulavańnia ŭciahnutaści ŭ suśvietnuju navukovuju kaapieracyju i akazańnia metavaj dziaržaŭnaj padtrymki efiektyŭnych raspracovak.

Svabodny finansavy rynak — vypusk u svabodnaje abaračeńnie akcyj. Heta stvoryć novyja mahčymaści źbieražeńniaŭ, kredytu i inviestycyj dla hramadzian i pradpryjemstvaŭ, budzie sadziejničać źnižeńniu kredytnaj pracentnaj staŭki.

Raźvićcio ipateki i ŭładkavańnie małych haradoŭ — kamfortnyja miesca pražyvańnia i pracy, novyja pradpryjemstvy i krynicy zarobku, raźvićcio ipateki, uzrovień dachodaŭ pavinien dazvalać siemjam nabyć ułasnaje žyllo ŭ siarednim na praciahu piaci hadoŭ.

Raźvićcio biznes-asiarodku — stabilnaja valuta, stabilnaja padatkovaja sistema, abarona układaŭ, prazrystaść dziaržaŭnaj ekanamičnaj palityki, raźvićcio finansavaha rynku, źnižeńnie dyktatu dziaržavy ŭ dačynieńni da dziejnaści pradpryjemstvaŭ usich formaŭ ułasnaści pryviadzie da dynamičnaha raźvićcia biznesu. Roŭnyja ŭmovy dla kankurencyi dziaržaŭnych i pryvatnych pradpryjemstvaŭ.

Sielskaja haspadarka — pryniać i realizavać prahramu refarmavańnia sielskaj haspadarki na asnovie šmatukładnaści, svabodnaha raźvićcia ŭsich formaŭ ułasnaści i stvareńnia rynku ziamli, z achoŭvańniem efiektyŭnych kalektyŭnych haspadarak i padtrymki fiermieraŭ.

Sučasnaja i efiektyŭnaja dziaržava

Zakon stanie padmurkam biełaruskaj dziaržavy. Bieśpiarečnaje vykanańnie razumnych zakonaŭ zrobić Biełaruś bahataj i stabilnaj krainaj. Ale zakon zapracuje tolki tady, kali my stvorym bałans uładaŭ.

Kanstytucyjnaja reforma — Biełaruś pavinna być parłamiencka-prezidenckaj krainaj. Adzin čałaviek nie moža viečna kiravać dziaržavaj. Prezident budzie abiracca terminam na 5 hadoŭ i nie bolš, čym na dva terminy. U sučasnaj krainie ŭłada kalektyŭnaja, a nie adnaasobnaja. Parłamient z pradstaŭnikami kožnaha rehijonu pavinien stać na abaronu intaresaŭ usich biełarusaŭ. Deputaty buduć mieć realnuju ŭładu na pryniaćcie rašeńniaŭ.

Reforma sistemy miascovaha samakiravańnia — Biełaruś padpiša Jeŭrapiejskuju Chartyju miascovaha samakiravańnia i budzie prytrymlivacca jaje asnoŭnych pałažeńniaŭ. U novaj Biełarusi žychary sami vybieruć miascovych kiraŭnikoŭ. Pramyja łakalnyja vybary zrobiać čynoŭnikaŭ zaležnymi ad ludziej. Miascovyja lidary, jakija pryjduć pa inicyjatyvie źnizu, buduć razumieć i vyrašać prablemy ich hramadzian, a nie vykonvać žadańni minskich čynoŭnikaŭ.

Niezaležnaść sudovaj ułady — sudździ buduć adkazvać tolki pierad orhanami sudovaha samakiravańnia, jany atrymajuć hodnuju zarpłatu i sapraŭdny imunitet. Viaršenstva prava zrobić Biełaruś bahaciejšaj, čym lubaja ekanamičnaja reforma.

Efiektyŭny dziaržaparat — my skarocim kolkaść čynoŭnikaŭ, ale prybiarem ad ich niepatrebnyja funkcyi i pavysim ich zarpłaty. Adkryty konkurs stanie adzinaj formaj najmu na kirujučyja dziaržaŭnyja pasady. Talenavityja kiraŭniki buduć mieć mahčymaść atrymać adukacyju abo pavysić kvalifikacyju ŭ najlepšych suśvietnych univiersitetach i prajści stažyroŭki ŭ profilnych ustanovach za miažoj.

Elektronny ŭrad — biudžety ŭsich uzroŭniaŭ, uklučajučy zarpłaty słužboŭcaŭ, rašeńni sudoŭ, infarmacyja ab tendarach, konkursach na dziaržaŭnyja pasady i ŭsia inšaja infarmacyja, jakaja cikavić hramadzian, budzie publikavacca ŭ internecie. Zakrytaj moža być infarmacyja, jakaja znachodzicca ŭ stroha abmiežavanym zakanadaŭstvam vuzkim śpisie. U novaj Biełarusi pradprymalniki zmohuć rehistravać biznes praź internet, kožny biełarus zmoža atrymać pašpart i inšyja dakumienty za 15 chvilin.

Hramadzianskaja supolnaść — my stvorym spryjalnyja ŭmovy dla raźvićcia niekamiercyjnych arhanizacyj, a najbolš efiektyŭnyja zmohuć atrymać dziaržaŭnaje finansavańnie, praz udzieł u tendarach i konkursach naroŭni ź dziaržaŭnymi.

Zamiežnaja palityka: adkaznaje susiedstva i niejtralitet

Biełaruś pavinna budavać raŭnapraŭnyja i ŭzajemavyhadnyja adnosiny jak sa svaimi susiedziami, tak i z astatnimi krainami śvietu. Źniešniaja palityka pavinna hruntavacca na nacyjanalnych intaresach i sadziejničać miru i biaśpiecy ŭ našym rehijonie.

Sapraŭdny niejtralitet — my budziem realizoŭvać pa-sapraŭdnamu šmatviektarnuju źniešniuju palityku bieź niepatrebnych pierakosaŭ va ŭschodni ci zachodni bok. Na terytoryi našaj krainy nie pavinna być zamiežnych vajennych baz. Biełaruś nie pavinna ŭvachodzić ni ŭ jakija vajennyja błoki, jakija mohuć uciahnuć nas va ŭzbrojeny kanflikt.

Adkaznaje susiedstva — my budziem vybudoŭvać adnolkava dobryja i ŭzajemavyhadnyja adnosiny jak z Zachadam, tak i z Uschodam, niaŭchilna vykonvajučy ŭziatyja na siabie mižnarodnyja abaviazalnictvy i patrabujučy hetaha ad našych partnioraŭ. My zaklučym ź Jeŭrasajuzam damovu ab supracoŭnictvie i partniorstvie i dabjemsia biaźvizavaha režymu jak minimum z usimi susiedziami Biełarusi. My budziem damahacca admieny abmiežavańniaŭ u handli ŭ ramkach Jeŭrazijskaj sajuza, kab nie dapuścić bolš «miasnych» abo «małočnych» vojnaŭ.

Rehijanalnaja biaśpieka — Biełaruś budzie sadziejničać miru i biaśpiecy ŭ rehijonie, u tym liku ŭdzielničajučy ŭ mirnym urehulavańni kanfliktu va Ukrainie. Pry hetym my zojmiemsia madernizacyjaj i ŭmacavańniem našych uzbrojenych siłaŭ, jakija pavinny stać harantam biaśpieki našaj krainy va ŭmovach narastańnia mižnarodnaj niestabilnaści.

Adradžeńnie nacyjanalnaj kultury — asnova biełaruskaj dziaržaŭnaści

Naša kraina nie stanie stabilnaj dziaržavaj, kali nie budzie abapiracca na histaryčnyja i kulturnyja tradycyi biełaruskaha naroda. Palityka ŭłady budzie nakiravana na adradžeńnie biełaruskaj kultury i ŭmacavańnie nacyjanalnaj samaśviadomaści jak asnovy biełaruskaj dziaržaŭnaści i faktaru nacyjanalnaj biaśpieki.

Śfiera kultury — pryjarytetnaja padtrymka. Buduć uviedzieny padatkovyja lhoty i stvorany ŭmovy dla svabodnaj realizacyi inicyjatyŭ hramadzianskaj supolnaści i biznesu, nakiravanyja na raźvićcio biełaruskaj kultury i histaryčnaj spadčyny, movy i nacyjanalnych kaštoŭnaściaŭ, duchoŭnych tradycyj. Z udziełam biełarusaŭ zamiežža budzie raspracavana prahrama viartańnia na radzimu našych kulturnych kaštoŭnaściaŭ, jakija znachodziacca za miažoj. Nastaŭnik i rabotnik kultury ŭ dziaržaŭnaj ci pryvatnaj ustanovie buduć mieć zarobak, nie nižejšy za siaredni pa krainie.

Biełaruskaja mova — naša bahaćcie. Biełaruskaj movie budzie harantavanaja admysłovaja dziaržaŭnaja padtrymka i hodnaje miesca ŭ žyćci hramadstva, jakoje adpaviadaje statutu dziaržaŭnaj movy, u tym liku ŭ halinie vyšejšaj siaredniaj i daškolnaj adukacyi. Čynoŭnik, deputat abo kiraŭnik dziaržavy budzie abaviazany vałodać abiedźviuma dziaržaŭnymi movami.

Svabody słova i druku — buduć źniatyja isnujučyja barjery dla stvareńnia i svabodnaj dziejnaści ŚMI i žurnalistaŭ. Haziety i internet-sajty nie buduć bajacca krytykavać uładu i vykryvać vypadki karupcyi i parušeńnia pravoŭ hramadzian. Dziaržava stvoryć umovy dla svabodnaj kankurencyi ajčynnych ŚMI, pry hetym stymulujučy raźvićcio nacyjanalnaha infarmacyjnaha rynku. Dziaržaŭnyja datacyi buduć abmiežavanyja śfieraj vučebnaj, krajaznaŭčaj, navukovaj i dziciača-junackaj litaratury.

Biełaruś — naš supolny dom. Usie kanfiesii i nacyjanalna-kulturnyja mienšaści buduć karystacca roŭnymi pravami. Palityka dziaržavy pavinna być takaja, kab kožny žychar krainy moh hanarycca tym, što žyvie ŭ volnaj biełaruskaj dziaržavie, jakaja pavažaje hodnaść kožnaha hramadzianina.

• 0
• 0
• 0
• 0
• 0
• 0
• 0
• 0