Baćka daradcy Cichanoŭskaj Dzianisa Kučynskaha pracuje ŭ kiraŭnictvie vykankama? Nie, heta nie tak
Były palitviazień i aktyvist «Narodnaj hramady» Siarhiej Sparyš zajaviŭ, što baćka daradcy Śviatłany Cichanoŭskaj pracuje čynoŭnikam i letaś atrymaŭ hramatu. Ale pamyliŭsia i ŭ pieršym, i ŭ druhim.
Sparyš zajaviŭ u fejsbuku, što baćka Kučynskaha «łukašenkaŭski čynoŭnik».
«Jon spakojna pracuje ŭ Lidskim vykankamie na kiroŭnych pasadach, a ŭ 2025 navat atrymaŭ niejkuju hramatu», — napisaŭ Sparyš.
Jon apublikavaŭ taksama dakumient za 2021 hod, dzie ad rabotnikaŭ patrabujuć adpisacca ad lidskich niezaležnych telehram-kanałaŭ i dałučycca da aficyjnaha. Dać spravazdaču pra vykanańnie treba było Hienadziu Kučynskamu.
Mnohija pad jaho pastom aburylisia — kali i tak, to syn za baćku nie adkazvaje.
Za infarmacyju Sparyš padziakavaŭ Alesi Parchomiency — biełaruskaj aktyvistcy z Kipra. Taja ŭ fejsbuku taksama napisała pra baćku Kučynskaha:
«Užo bolš za 10 hadoŭ zajmaje adnu z kiroŭnych pasad u Lidskim abłvykankamie — namieśnik dyrektara ŭ śfiery žyllova-kamunalnaj haspadarki horada Lida. (…) Bolš za toje, jon praciahvaje zajmać svaju pasadu i siońnia — heta paćviardžajecca aficyjnymi krynicami».
Apuścim toje, što Lida nie abłasny centr, a tamu takoha abłvykankama nie isnuje.
Dyk kim pracuje baćka Kučynskaha? U vykankamie jon nie pracavaŭ, a byŭ hałoŭnym miechanikam i namieśnikam dyrektara ŭ haradskim unitarnym pradpryjemstvie «Lidskaja ŽKH». Na pačatku 2024 hoda jon źnikaje z navin i resursaŭ, datyčnych ŽKH.
Paśla hetaha, kali mierkavać pa sacsietkach, Hienadź Kučynski ŭładkavaŭsia na pracu ŭ Darožna-ekspłuatacyjnaje ŭpraŭleńnie №55 na pasadu načalnika adździeła miechanizacyi i enierhietyki. Heta arhanizacyja, jakaja absłuhoŭvaje darohi, filijał «Hrodnaaŭtadara». Ale ŭznaharodu Hienadź Kučynski nie atrymlivaŭ — Sparyš pierabłytaŭ uznaharodu i vinšavańnie z 60‑hadovym jubilejem.
Dzianis Kučynski prakamientavaŭ infarmacyju pra svajho baćku:
«Paśla 2020 hoda maja kamunikacyja ź siamjoj, blizkimi i siabrami ŭ Biełarusi abmiežavanaja, na žal, ja mała viedaju detalaŭ z žyćcia blizkich. Ale raniej baćka pracavaŭ ŭsio žyćcio u ŽKH miechanikam, u niejki čas, zdajecca, hałoŭnym miechanikam. Nakolki ja viedaju, vykanaŭča-ideałahičnych aficyjnych pasadaŭ u jaho nie było. Hady dva tamu kantrakt u ŽKH nie praciahnuli».
Ci ličycca Hienadź Kučynski čynoŭnikam? Nie. Čynoŭnik — heta dziaržaŭny słužboviec, a kiraŭnik ci inšy supracoŭnik dziaržaŭnaha pradpryjemstva nie źjaŭlajecca dziaržaŭnym słužboŭcam. Heta vynikaje z zakona № 175‑3 «Pra dziaržsłužbu» i ŭkaza Łukašenki №195 «Pra dziaržaŭnyja hramadzianskija pasady».
U dziaržaŭnym siektary ŭ Biełarusi pracuje kala 39% rabotnikaŭ.
«Naša Niva» — bastyjon biełaruščyny
PADTRYMAĆCiapier čytajuć
U milicejskim konkursie pryhažości pieramahła amapaŭka, jakaja ŭ 2020 hodie razhaniała pratesty44
Kamientary