«Na samoj spravie ludzi nie bajacca pieramienaŭ, naadvarot, jany chočuć ich. Adziny, chto ich baicca pieramienaŭ, - heta moj kankurent na hetych vybarach Alaksandar Łukašenka», - zajaviła kandydat u prezidenty Taćciana Karatkievič padčas svajho druhoha pieradvybarčaha vystupu pa kanale «Biełaruś -1 «24 vieraśnia.
«Tamu što lubyja pieramieny pamienšać kantrol ułady nad ekanomikaj, hramadstvam i čałaviekam», - padkreśliła jana.
Karatkievič paviedamiła, što niadaŭna ŭ jaje była sustreča na prachadnoj MAZa, pracoŭnyja jakoha kazali, što raniej ich pradpryjemstvam hanaryłasia ŭsia kraina, a siońnia jano nie moža zarabić navat na zarpłatu svaim supracoŭnikam. «My bačym, jak buksuje naša pramysłovaść. Našy tavary ŭsio mienš karystajucca popytam, zarobki padajuć. Los jašče dvuch eks-fłahmanaŭ Biełarusi — zavody «Viciaź» i «Haryzont» — lepš za ŭsio adlustroŭvajuć ličby. Strašna skazać, vytvorčaść televizaraŭ za apošni hod ŭpała u čatyry razy «, - skazała jana.
Pa słovach Karatkievič, Łukašenka zachavaŭ pramysłovaść 90-ch hadoŭ minułaha stahodździa, ale «svaim biaździejańniem pryhavorvaje jaje da pavolnaj śmierci».
«Pradpryjemstvy svoječasova nie adaptavali da rynku, da novych umoŭ. Čamu nie zrabili vidavočnych krokaŭ nie tolki na MAZie, «Viciazi», «Haryzoncie», MTZ, «Homsielmašy», «Chimvałaknie» i na inšych zavodach, ale i ŭ dačynieńni da ŭsioj ekanomiki? Kiraŭnik dziaržavy sprabuje pierakanać nas u tym, što heta my baimsia pieramienaŭ. Jašče ŭ 2010 hodzie, pierad minułymi vybarami, jon kazaŭ: «Kali narod choča atrymlivać 1,5-2 tys. dalaraŭ zarpłaty, davajcie damo, ale za pasłuhi budziecie płacić realnuju canu. Prosta vy hetaha nie chočacie «. Prajšło 5 hadoŭ. Za pasłuhi i tavary my płacim z kožnym miesiacam usio bolš, a zarobki ŭsio mienš», - adznačyła kandydat.
Karatkievič ličyć absurdnym, što ŭ krainie traciacca «tryljony biudžetnych hrošaj, heta značyć našy padatki, na toje, kab vyrablać niepatrebnuju pradukcyju, jakaja ŭhaniaje nas u jašče bolšyja daŭhi».
«Adsiul i nizkija zarobki, i vysokija ceny. My pavinny razarvać zahanny kruh. Pazbavić dyrektaraŭ i mieniedžaraŭ ad čynavienskaha dyktatu, zaachvočvać inicyjatyvu. Tyja zavody, jakija jašče možna vyratavać, treba terminova vyciahvać praz stvareńnie i realizacyju śpiecyjalnych antykryzisnych płanaŭ»,— skazała jana.
Ciapier čytajuć
U biełarusaŭ Polščy byli pryčyny nie hałasavać za Tšaskoŭskaha23
Kamientary