Takim čynam RF reahuje na ŭstupleńnie ŭ siłu z 1 studzienia 2016 pahadnieńnia ab asacyjacyi Ukrainy i ES.
Rasija z 1 studzienia 2016 hoda ŭzmacniaje mytnuju abaronu i ŭvodzić ekanamičnyja sankcyi ŭ dačynieńni da Ukrainy, napisaŭ u Facebook premjer-ministr RF Dźmitryj Miadźviedzieŭ.
«Z 1 studzienia 2016 hoda budzie pavyšany ŭzrovień mytna-taryfnaj abarony ŭ dačynieńni da Ukrainy. Heta źviazana z rašeńniem našych susiedziaŭ uvieści ŭ dziejańnie pahadnieńnie ab asacyjacyi ź ES. Akramia taho, na Ukrainu jak krainu, jakaja dałučyłasia da antyrasiejskich sankcyj, budzie raspaŭsiudžanaje dziejańnie našych ekanamičnych mier u adkaz», — napisaŭ Miadźviedzieŭ.
Ukpaina nieadnojčy zajaŭlała, što adterminovak ustupleńnia ŭ siłu ekanamičnaj častki Pahadnieńnia ab asacyjacyi ź ES nie budzie.
«Niachaj nichto nie sumniavajecca, pahadnieńnie ab ZVH zapracuje z 1 studzienia 2016 hoda», — zajaŭlaŭ nie raz premjer-ministr Ukrainy Arsienij Jacaniuk. Anałahičnuju pazicyju ahučvali i ŭ ES.
Rasija z kanca kastryčnika 2014 hoda zabaraniła ŭvoz z Ukrainy ŭsioj raślinnaj pradukcyi — harodniny, sadaviny, złakaŭ. Jašče raniej Maskva ŭviała abmiežavańnie na ŭvoz sokaŭ, małočnaj i syrnaj pradukcyi, kandytarskich vyrabaŭ, rybnych i płodaaharodninnych kansiervaŭ i asobnych vidaŭ ałkaholu z Ukrainy.
Ukraina 21 kastryčnika 2015 hoda padała pieršy ź sieryi budučych pazovaŭ u Suśvietnuju handlovuju arhanizacyju suprać Rasii, jaki tyčycca handlovych abmiežavańniaŭ u dačynieńni da vahonaŭ i strełačnych pieravodaŭ ajčynnaj vytvorčaści.
Pa słovach handlovaha pradstaŭnika Natalli Mikolskaj, ekspart Ukrainy z-za hetych abmiežavańniaŭ pa 86 tavarnych hrupach skaraciŭsia z 1,7 młrd dalaraŭ u 2013 hodzie da 51 młn dalaraŭ za 7 miesiacaŭ 2015 hoda.
Raniej Ukraina ŭniesła na razhlad Kamiteta Suśvietnaj handlovaj arhanizacyi pa techničnych barjerach u handli ŭviedzienuju Rasijaj zabaronu na ŭvoz kandytarskich vyrabaŭ, małočnaj i sokavaj pradukcyi, uklučajučy dziciačaje charčavańnie, a taksama piva ŭkrainskaha pachodžańnia.
Ciapier čytajuć
Paśla vystupleńnia Łuhanskaha teatra ŭ Minsku adna z hladačak vyhuknuła «Słava Ukrainie!»3
Kamientary