Nieprykmietny siłavik z Hłybokaha: Piać faktaŭ pra zvolnienaha staršyniu Śledčaha kamiteta Valancina Šajeva
Alaksandr Łukašenka vyzvaliŭ Valancina Šajeva ad abaviazkaŭ kiraŭnika Śledčaha kamiteta «pa zhodzie bakoŭ». Novy staršynia SK pakul nie pryznačany. «NN» sabrała cikavyja fakty ź bijahrafii siłavika.
Nastupnik Vakulčyka
Valancin Šajeŭ naradziŭsia ŭ 1964-m u Hłybokim. I da 2006 hoda jahonaja bijahrafija ŭvieś čas była ciesna źviazanaja ź Viciebskaj vobłaściu. Paśla taho, jak u 1991 Šajeŭ skončyŭ BDU pa śpiecyjalnaści «pravaznaŭstva», jon pačaŭ pracavać u orhanach prakuratury. Byŭ prakuroram Rasonskaha i Viciebskaha rajonaŭ, a taksama Homielskaj vobłaści. Mienavita z Homielščyny jaho zabrali ŭ Minsk.
U 2011 u Biełarusi pačałosia stvareńnie Śledčaha kamiteta, jaki zabiraŭ častku funkcyj u Hienieralnaj prakuratury i milicyi. Mienavita na Śledčy kamitet ciapier kładziecca rasśledvańnie bolšaści kryminalnych spravaŭ. Pieršym kiraŭnikom SK byŭ Valeryj Vakulčyk, jakoha praz hod pracy pavysili da staršyni KDB.
U listapadzie 2012 Valancin Šajeŭ staŭ kiravać Śledčym kamitetam. Choć samomu Šajevu nie asabliva ŭdałosia abraści aŭtarytetam i važnaściu — charyzmy jamu vidavočna nie stavała, — ale struktura zapracavała davoli spraŭna. Na siońnia SK – heta samaje adkrytaje i prazrystaje siłavoje viedamstva ŭ krainie. Pahladzim, ci zastaniecca takaja palityka pry novym kiraŭniku.
Adziny, chto nie atrymaŭ novyja pahony
Pra adstaŭku Šajeva zahavaryli jašče ŭ mai. Hetkaja kanśpirałahičnaja viersija, ale jana taksama maje prava na žyćcio. Napiaredadni Dnia Pieramohi Alaksandr Łukašenka razdavaŭ novyja zvańni kiraŭnikam praktyčna ŭsich siłavych viedamstvaŭ. Hienierał-lejtenantami stali ministr abarony Andrej Raŭkoŭ, kiraŭnik MUS Ihar Šunievič, staršynia KDB Valeryj Vakulčyk, ministr pa nadzvyčajnych situacyjach Uładzimir Vaščanka. A hienieralny prakuror Alaksandr Kaniuk atrymaŭ čyn «dziaržaŭny daradca justycyi pieršaha kłasa». Faktyčna adzinym siłavikom z klučavych viedamstvaŭ, chto nie atrymaŭ pavyšeńnia, byŭ jakraz Šajeŭ.
Baćka troch synoŭ
U Valancina Šajeva vialikaja siamja, jon źjaŭlajecca baćkam troch synoŭ. Dvoje małodšych pa stanie na pačatak hodu jašče chadzili ŭ sadok, starejšy – u himnaziju. Šajeŭ pryznavaŭsia, što žonka ŭsio ž pravodzić bolš času ź dziećmi, ale «asnovy psichiki i charaktaru» zakładvaje jon sam: «Ja nikoli nie bajaŭsia zastavacca ź dziećmi adzin. Ja starajusia navučyć dziaciej samastojnaści. Starejšy syn ad pačatku chadziŭ sam u škołu i na treniroŭki pa karate».
Kaža, što lubić katacca ź dziećmi na karusielach u parku Čaluskincaŭ. A voś baćkoŭ Valancina Šajeva ŭ žyvych užo niama.
«Sustrakać Novy hod abaviazkova treba z baćkami. Raniej ja adznačaŭ śviata dzie zaŭhodna: z kalehami, siabrami, na pracy, u asiarodździ žonki i dziaciej. A kali ŭśviadomiŭ, što chočacca ŭ hety momant znachodzicca pobač z baćkami, takoj mahčymaści nie stała…», — raskazvaŭ Šajeŭ letaś.
Nadzieł u Drazdach
Vialikaj siamji – vialiki dom. U krasaviku 2014 hoda Valancin Šajeŭ atrymaŭ nadzieł płoščaj 0,12 ha ŭ tak zvanych «Drazdach-2», minskim rajonie «Viaśninka». Realnaja rynkavaja cana takoha pustoha nadzieła – $600-700 tysiač dalaraŭ. Kolki heta aficyjnych hadavych zarobkaŭ dla biełaruskaha čynoŭnika?
Cikava, što pierad hetym Valancin Šajeŭ prapanavaŭ uvieści dadatkovuju adkaznaść dla zanadta bahatych čynoŭnikaŭ: «Takaja adkaznaść mahła b być u vyhladzie spahnańnia ŭ dachod dziaržavy majomasci, pamier jakoj značna pieravyšaje dachody čynoŭnika i pachodžańnie jakoj heta słužbovaja asoba nie moža paćvierdzić». Załatyja słovy.
Amatar valejboła
Jak i bolšaść vysokich čynoŭnikaŭ, Valancin Šajeŭ mieŭ nahruzku ŭ vyhladzie kiraŭnictva adnoj z spartyŭnych fiederacyj. Hod tamu siłavik uznačaliŭ fiederacyju valejboła. Heta vid sporta, u jakim biełarusy majuć niebłahija vyniki. Naprykład, traplajuć na čempijanat Jeŭropy. Ale valejboł u hramadstvie zusim nie raskručany, jaho redka pakazvajuć pa televizary, pišuć u hazietach. Ździejśnić niejki praryŭ u hetym nakirunku tak i nie atrymałasia. U Biełarusi čaściej za ŭsio, stračvajučy asnoŭnuju pasadu, čynoŭnik pazbaŭlajecca i pracy ŭ fiederacyi. Chiba Uładzimir Kanaploŭ u handbole byŭ vyklučeńniem z hetaj sieryi.
Łukašenka: Bamžoŭ, darmajedaŭ u krainie nie budzie7
Kamientary