Ź pieršaj pieśni, ciažkija akordy hitaraŭ padniali ŭsich z kresłaŭ. I adrazu piarednija niekalki šerahaŭ zali pieraŭtvarylisia ŭ sucelny tancplac.
21 sakavika ŭ vialikaj zali Doma kultury prafsajuzaŭ pry aficyjnaj arhanizacyi praź Bieraściejskuju abłasnuju filarmoniju N.R.M. adyhraŭ svoj raźvitalny kancert ź zimoju. Pieršy za apošnija čatyry hady, moža tamu zala na 650 miescaŭ była zapoŭnienaja całkam. Ź pieršaj pieśni, ciažkija akordy hitaraŭ padniali ŭsich z kresłaŭ. I adrazu piarednija niekalki šerahaŭ zali pieraŭtvarylisia ŭ sucelny tancplac. Pieśni, jak ź pieršaha alboma «LaLaLaLa», jaki darečy tolki niadaŭna byŭ upieršyniu vydadzieny na dyskach, tak i z apošniaha «06» hučna i razam śpiavała bolšaść prysutnych.
Niahledziačy na šmatlikija zabarony, jakija mieŭ hurt u apošnija hady, adzin z kancertaŭ byŭ admienieny i ŭ Bieraści, N.R.M.aŭcy nie zhubili papularnaści ŭ horadzie nad Buham, bo mała chto ź biełaruskich dy rasiejskich hurtoŭ zmoža trymać na nahach na praciahu ŭsiaho kancertu hledačoŭ dy jašče i prymusić tych paśla vyklikać na «bis», bo niemahčyma być abyjakavym, kali ciabie kliča paŭtysiačny natoŭp. «Pieśnia pra kachańnie» dy «Ja naradziŭsia tut» byli apošnimi kampazycyjami viečaru.
Muzyki šmat razmaŭlali z hledačami, niadrenna žartavali i ździekavalisia adzin z adnoha. Na try chviliny Lavon Volski ŭžo pa składzienaj tradycyi sastupiŭ miesca la mikrafona bubnaču Alezisu Dziemidoviču, jaki praśpiavaŭ pieśniu pra Kitaj, pryčym sam Lavon sieŭ na jaho miesca. Nia kožny prychilnik hurtu viedaje, što teksty šmatlikich piesień N.R.M. napisaŭ mienavita hety ścipły bubnač.
Dziakuj možna skazać administracyi Domu kultury prafsajuzaŭ dy milicyjantam, jany mabyć uśviadomili specyfiku hurta, tamu nie zabaraniali dastavać i machać bieł‑čyrvona‑biełym ściaham, kryčać «Žyvie Biełaruś» dy tančyć u zali, jakaja nia vielmi prystasavanaja dla takoj spravy.
Choć kancert i mieŭ nazvu «Raźvitalny», ale heta było raźvitańnie tolki ź zimoju, sam hurt pakidać scenu dy sychodzić na adpačynak nie źbirajecca, tamu naprykancy lider N.R.M. Lavon Volski, paabiacaŭ viarnucca vosieńniu.
Ciapier čytajuć
Vynieśli prysud Palinie Zyl — błohiercy, jakaja stała nulavym pacyjentam spravy Hajuna, bo ŭ jaje znajšli tuju samuju spasyłku ad Matolki6
Kamientary