Biełaruś i Vjetnam u ramkach pravodzimaha ŭ Chanoi dvuchbakovaha biźnies-forumu padpisali amal dva dziasiatki dakumientaŭ na pastaŭku biełaruskaj pradukcyi na $24 młn.
U pryvatnaści, padpisany kantrakty na pastaŭku ŭ Vjetnam techniki MAZ, MTZ, BiełAZ, dahavory, pahadnieńni i miemarandumy na pastaŭku likiora-harełačnaj, šynnaj pradukcyi, kalijnych uhnajeńniaŭ, suchoha małaka, suchich dziciačych, spartyŭnych praduktaŭ charčavańnia.
U biźnies-forumie ŭdzielničajuć 22 biełaruskija kampanii i bolš za 70 pradstaŭnikoŭ biźniesu Vjetnama.
«Napeŭna, upieršyniu pamiž bakami zaklučana takaja kolkaść kantraktaŭ, tym bolš heta biez uliku kantrakta na pastaŭku kalijnych uhnajeńniaŭ u Vjetnam», — adznačyŭ staršynia Biełaruskaj handlova-pramysłovaj pałaty Michaił Miatlikaŭ.
Handlova-pramysłovyja pałaty Biełarusi i Vjetnama štohod pravodziać mierapryjemstvy, abmien biźnies-misijami. Adnak hety biźnies-forum najbolš rezultatyŭny pa kolkaści padpisanych dakumientaŭ, kantraktaŭ z kankretnymi ličbami na pastaŭku pradukcyi.
Michaił Miatlikaŭ nahadaŭ, što pamiž JEAES i Vjetnamam paŭhoda dziejničaje režym svabodnaha handlu, jaki daje šerah pieravah na pastaŭku biełaruskaj pradukcyi. U pryvatnaści, staršynia BiełHPP zhadaŭ kantrakt, padpisany siońnia AAT «Biełłakt». «Heta śviedčyć ab tym, što ŭžo abnuleny pošliny, i my stanovimsia bolš kankurentnymi na vjetnamskim rynku», — adznačyŭ subiasiednik. Jon padkreśliŭ, što režym svabodnaha handlu daje mahčymaść vychodzić nie tolki ŭ Vjetnam, a na rynki 10 krain — členaŭ ASIEAN. «Ale dla hetaha nieabchodna vyznačać technałahičnyja ŭmovy dla pradukcyi, naprykład, traktarakamplektaŭ abo mašynakamplektaŭ da našych aŭtobusaŭ MAZ, što daść mahčymaść u dalejšym pry ŭmovie łakalizacyi ŭžo vychodzić na inšyja krainy», — skazaŭ jon.
Michaił Miatlikaŭ dadaŭ, što vialikuju rolu ŭ vybudoŭvańni adnosin pamiž dźviuma krainami adyhryvaje vjetnamskaja asacyjacyja vypusknikoŭ biełaruskich VNU, jakija taksama prysutničali na biźnies-forumie. «Jany viedajuć naš mientalitet, pracujuć u ekanomicy svajoj krainy, i mienavita jany, na naš pohlad, - asnoŭnyja pravadniki biełaruskaha ekspartu ŭ Vjetnamie. Mienavita vypuskniki biełaruskich VNU, hramadzianie Vjetnama», — ličyć staršynia BiełHPP.
Ciapier čytajuć
«Miesiačny płaciež paciahnie na 340 rubloŭ». Što budzie ŭ Biełarusi z mabilnym internetam?12
Kamientary